საათნახევრიანი პაუზის შემდეგ განახლებული მატჩი - პირველი ტაიმი საქართველოს ნაკრებმა 0:1 წააგო

ევროპის ჩემპიონატის საკვალიფიკაციო ტურნირის მეოთხე ტურში საქართველოს ნაკრები პირველი ტაიმის შემდეგ გასვლაზე შოტლანდიასთან 0:1 მარცხდება.

კვიპროსთან მატჩთან შედარებით, „ჯვაროსნების“ მწვრთნელმა სანიოლმა სასტარტოში ოთხი ფეხბურთელი შეცვალა, დაცვითი სტრატეგია აირჩია, უკან ტანმაღალი მცველები დააყენა, ორი საყრდენი და წინ სწრაფი შემტევები. ფრანგის გათვლა გასაგები გახლდათ და იმის იმედიც გვქონდა, რომ ჩვენს გუნდს მეორე ნომრად თამაში უფრო ეხერხება.

შეხვედრის წინ მოსული ნალექი მოედნის დრენაჟმა ვერ გაატარა, მოედანი კატასტროფულ მდგომარეობაში იყო, ორივე გუნდს თამაში უჭირდა და მასპინძლები მაკგრეგორმა დააწინაურა, რის შემდეგაც მსაჯმა უამინდობის გამო შეხვედრა მინიმუმ 20 წუთით შეწყვიტა. BBC Radio Scotland-ი აღნიშნავდა, რომ საქართველოს ნაკრები ასეთ პირობებსა და მდგომარეობაში თამაშს ვერ შეძლებდა, გადადებას მოითხოვდა და თავადაც ასე მოიქცეოდნენ. ყოველ შემთხვევაში, არბიტრს მატჩი გოლამდე უნდა შეეჩერებინა.

დაპირისპირება საათნახევრიანი პაუზის შემდეგ განახლდა. საქართველოს ნაკრებს მძიმე მოედანზე ბურთის დაჭერა და შეტევების ორგანიზება უძნელდებოდა, შეცდომებს უშვებდნენ. მასპინძლები უკეთ მოქმედებდნენ. მაკგინმა შესანიშნავი შანსი ვერ გამოიყენა, მაკტომინის გატანა მამარდაშვილმა არ დაანება და პირველი ტაიმი 0:1 წავაგეთ.

გლაზგო. „ჰემპდენ პარკი“
შოტლანდია - საქართველო
გოლი: მაკგრეგორი (6)