ლეგიონის ანონსი: ქართველთა ბრძოლები კოპენჰაგენში, მოსკოვში, ვაშინგტონში...

"კოპენჰაგენი"-"სილკებორგი": თუ ჯერ კიდევ ვერ გადაგიწყვეტიათ, საღამოს რომელ თამაშს უყუროთ, სწორედ დანიის ჩემპიონატის X ტურის ამ მატჩის ყურებას გირჩევთ - კოპენჰაგენელების წინააღმდეგ ძალიან კარგ ფორმაში მყოფი ქართველი შემტევები: მათე ვაწაძე და დავით სხირტლაძე იასპარეზებენ. ბოლო ორ თამაშში ქართველების მონაგარი: ოთხი გოლი და ორი საგოლე გადაცემაა. ვნახოთ, შეძლებს თუ არა ევროტურნირის საგზურისთვის მებრძოლი "სილკებორგი" დანიურ გრანდთან ჭიდილს.

"პოგონი"-"გორნიკი": ლაშა დვალს გუნდში ენდობიან და თითქმის ყველა მატჩში ძირითად შემადგენლობაშია. პრობლემებია აქვს მათე ცინცაძეს, რომელსაც სკამიდან უწევს თამაშის ყურება და ჯერჯერობით ვერ მოიპოვა მთავარი მწვრთნელის ნდობა. "პოგონს" სატურნირო მდგომარეობა არცთუ სახარბიელო აქვს, 8 ქულით მე-13 ადგილზე იმყოფება.

"სპარტაკი"-"ანჟი": ამ თამაშში შეიძლება ერთბაშად სამი ქართველი ვიხილოთ ძირითადში ან სამივე - სკამზე. დავიწყოთ მასპინძელი "სპარტაკით", რომელსაც ჯანო ანანიძე სათასო მატჩში ორი საგოლე პასით დაუბრუნდა. სამწუხაროდ ამ სეზონში ქართველ ნახევარმცველს მთავარი მწვრთნელი ნაკლებად ენდობოდა, ჯანო კი ყველა თამაშში ამტკიცებდა, რომ ძირითად შემადგენლობას იმსახურებდა. ვნახოთ, ამჯერად რას გადაწყვეტს მასიმო კარერა.

რაც შეეხება მახაჭყალის გუნდს, ჯაბა ლიპარტია სათასო დაპირისპირებაში ძირითადში ვიხილეთ, მაგრამ ჩემპიონატში სულ სათადარიგო შემადგენლობაშია. საქართველოს ნაკრების მეკარე გიორგი ლორიას კი ჯერ დებიუტიც არ ჰქონია ახალ გუნდში.