ცივი შხაპი ჩემპიონთა ლიგის მეოთხედფინალებამდე - "ნაპოლი" "მილანთან" განადგურდა [VIDEO]

სერია A-ს 28-ე ტურში „ნაპოლი“ საკუთარ მოედანზე „მილანთან“ 0:4 დამარცხდა.

„ნაპოლი“ ტრავმირებული ოსიმენის გარეშე უნიათოდ გაისარჯა, მისი ნახევარდაცვის თამაში ვერავითარ კრიტიკას ვერ უძლებდა და „როსონერისთან“ ჩემპიონთა ლიგის მატჩების წინ კარგი გაკვეთილი მიიღო, რაც შესაძლოა, სასარგებლოც აღმოჩნდეს.

თამაში ორმხრივი შეტევებით დაიწყო. კვარაცხელიამ კრუნიჩი და სხვა მეურვეები ლამაზი ფინტებით ჩამოიცილა, მაგრამ ვერ გაიტანა, სწრაფი კონტრიერიშისას კი ლეაომ სტუმრები დააწინაურა. შემდეგ ბრაიმ დიასმა დალაშქრა მერეტის კარი და „როსონერი“ ორი გოლით გავიდა წინ. მილანელებს ზონები გადაკეტილი ჰქონდათ, ნეაპოლელები ხიფათის შექმნას თითქმის ვერ ახერხებდნენ და პირველი ტაიმი 0:2 წააგეს.

მეორე ტაიმის დასაწყისში პიოლის შეგირდებმა „ნაპოლის“ მაღალი პრესინგი შესთავაზეს, დაცვაში კომპაქტურად მოქმედებდნენ. ხვიჩას ბურთის მისაღებად ღრმად უკან ჩასვლა უწევდა, ხოლო ოსიმენის ნაცვლად ძირითად შემადგენლობაში დაყენებული სიმეონე პასიური იყო. „მილანმა“ კი კინაღამ მესამე გოლი გაიტანა - ჟირუმ ოდნავ ააცილა ბურთი მიზანს. შემდეგ „კვარამ“ მარიო რუი ხელსაყრელ პოზიციაზე გაიყვანა და მას გატანა მეკარემ არ დაანება. „ნაპოლი“ სრულ უპირატესობას ფლობდა, თუმცა ლეაომ მორიგი კონტრიერიშისას დუბლი შეასრულა, მერე სალემაკერსმაც გაიტანა და აშკარად უკეთესმა გუნდმა დამაჯერებელი გამარჯვება მოიპოვა.

„ნაპოლი“ 71 ქულით ლიდერია და 7 აპრილს ჩემპიონატზე გასვლაზე „ლეჩეს“, ხოლო 12 აპრილს, ჩემპიონთა ლიგის პირველ მეოთხედფინალურ შეხვედრაში, „სან სიროზე“ „მილანს“ დაუპირისპირდება.

ნეაპოლი. „დიეგო მარადონა“
ნაპოლი - მილანი 0:4