რას გვიმზადებენ ქართული კლუბები ევროტურნირებზე? - პოზიტიური დინამიკის გაგრძელება თუ მორიგი წარუმატებლობა?!

ქართველ გულშემატკივრებს ერთი რამ ახასიათებთ, თუკი ჩვენს ფეხბურთში წარმატებული პერიოდია, საოცარი თანადგომა იგრძნობა, სტადიონებზე ხალხმრავლობაა, კრიზისის დროს კი "ქრებიან". ჯერ ხვიჩა კვარაცხელიას ფაქტორის, ახლახან კი ევროპის 21-წლამდელთა ჩემპიონატის გამო პოზიტიური დინამიკა და განწყობაა, თუმცა ეს როდემდე გაგრძელდება?!

მთავარ შიშებს ისევ ევროტურნირები იწვევს, სადაც ქართული კლუბები მალე ჩაერთვებიან. წარსულის მწარე გამოცდილება და ერთგვარი კომპლექსები სულ იმაზე გვაფიქრებს, თავს ხომ არ შევირცხვენთ, ყველაფერს ისევ დაწყებისთანავე ხომ არ დავემშვიდობებით?! შემდეგ ვუყურებთ სხვა ჩვენი მსგავსი ქვეყნების მაგალითებს და შედარება გულს გვტკენს.

იმავეს ვიტყვით, რაც გასულ სეზონში დავწერეთ. შესაძლოა, ძლიერი ლეგიონერებისა და ფინანსების ხარჯზე ამა თუ იმ ქვეყნის წარმომადგენლებმა საკლუბო წარმატებას მიაღწიონ, თუმცა სანაკრებო დონეზე ეს მათთვის ბევრს არაფერს ცვლის და საქართველოს სხვადასხვა ასაკობრივი და ეროვნული ნაკრები მათზე წარმატებული იქნებიან. ფაქტია, ჩვენი ფეხბურთის მომავალი კარიერას ქართულ კლუბებში უნდა იწყებდეს, რაც 21-წლამდელთა ნაკრების შემთხვევაში კარგად ვნახეთ და მათი პროგრესი ამის შემდეგ უნდა მოხდეს.

რასაც ვხედავთ, წინა წლებისგან განსხვავებით, ევროტურნირების წინ გუნდების ფაქტობრივად დაშლა და ხელახლა აწყობა არ მომხდარა. ქართულმა კლუბებმა, რომლებმაც ევროტურნირებზე უნდა ითამაშონ, ძალები ერთმანეთში, სუპერთასისთვის ჩატარებულ შეხვედრებში გამოსცადეს. საუკეთესო თბილისის "დინამო" გახდა, მწვრთნელებმა კი კიდევ ერთხელ დაინახეს, რისი შეცვლაა საჭირო გუნდებში და რა მიდის უკეთ...



ევროპის უმთავრეს საკლუბო ფორუმზე ჯგუფურ ეტაპზე ოცნება უფრო რეალური მას შემდეგ გახდა, რაც უეფა ე.წ. საჩემპიონო ზონაზე გადავიდა, თუმცა ჩვენთვის ეს ამბავი მაინც მიუწვდომელს ჰგავს. დასახული უფრო ლოკალური მიზანი გვაქვს, პირველი ეტაპი დავძლიოთ, რაც შემდეგ გზას ამარტივებს, რანგით მესამე, კონფერენს ლიგის ჯგუფში მაინც ვითამაშოთ. გვახსოვს წინა წლის დრამა, როცა ბათუმის "დინამო" ვლადიმირ ვაისის "სლოვანთან" ძალიან დრამატულად დამარცხდა, უფრო ადრე კი ამ მისიას თბილისის "დინამო" ვერ ასრულებდა.

გიორგი ჭიაბრიშვილის გუნდს ახლა "ასტანას" ბარიერი აქვთ გადასალახი. იყო დრო, ყაზახურ გუნდებთან მარცხს იმას ვაბრალებდით, რომ მათთან ამ დროს გახურებული სეზონი იყო. ახლა ჩვენც ამ რეჟიმში ვთამაშობთ. თბილისის "დინამოში" რამდენიმე მოთამაშე საქართველოს ახალგაზრდული ნაკრებიდანაა. მათ ახლა დიდი გამოცდილება მიიღეს და ისიც ნახეს, ნიდერლანდელ თუ პორტუგალიელ თანატოლებთან ტოლ-სწორად თამაში რომ შეძლეს. შეუძლებელია, ყოველივე ეს არ გამოადგეთ. მათ იციან, რომ სატრანსფერო დაინტერესებაც გაზრდილია, მაგრამ ამ ეტაპზე მხოლოდ საქართველოს ჩემპიონსა და მის ევროპულ შანსებზე უნდა იფიქრონ.

თბილისის "დინამო" გიორგი ლორიათი გაძლიერდა და სუპერთასის მოპოვებაში გამოცდილმა მეკარემ დიდი როლი შეასრულა. ის გუნდს ახლაც ძალიან გამოადგება.

თუკი თბილისის "დინამო" პირველ ბარიერს (12 და 19 ივლისს) გადალახავს, ძალიან ძლიერი მეტოქე ელის - ზაგრების "დინამო".



უეფა მაქსიმალურად უწყობს ხელს პატარა ქვეყნებსა და ლიგებს, კონფერენს ლიგის ჯგუფურ ეტაპზე თამაში მაინც შეძლონ. ორი წლის წინ ამ გზაზე ბათუმის "დინამო" საკმაოდ შორს იყო და შემდეგ თურქული ბარიერი ვერ გადალახა. გია გეგუჩაძის გუნდი მიზნის მიღწევას წელსაც ეცდება. ბათუმელები ალბანურ "ტირანასთან" იწყებენ (13 და 20 ივლისს), შემდეგ კი ურთულესი ბარიერი ელით - თურქული "ბეშიქთაში". გიორგი წიტაიშვილით გაძლიერება მართლაც სერიოზული ტრანსფერია.



მთელი საქართველო ნიკა გაგნიძითაა აღფრთოვანებული, რომელიც საქართველოს 21-წლამდელთა ნაკრებს ტრავმირებულიც ენერგიულად ქომაგობდა. რა თქმა უნდა, ბევრს მანამდე არ ეცოდინებოდა, ეს ბიჭი გორის "დილაში" როგორ თამაშობს და რისთვის დაიმსახურა ნაკრებში მიწვევა. ამიტომაც ვწერთ, რომ დაბალი სათამაშო დონის მიუხედავად, ეროვნულ ლიგას მნიშვნელოვანი ადგილი უნდა დავუთმოთ.

კონფერენს ლიგის იმავე სათამაშო დღეებში გორელები სლოვაკურ "დუნაიკა სტრედასთან" ორმატჩიან დუელს ჩაატარებენ, წარმატების შემთხვევაში კი უკრაინული კლუბი ელით - პოლტავის "ვორსკლა".



რაც შეეხება ქუთაისის "ტორპედოს", გარკვეული ჩავარდნის შემდეგ იმერული კლუბი ევროტურნირებზე დაბრუნდა. გუნდში ბევრი საინტერესო მოთამაშეა. მაგალითად, გიორგი არაბიძისგან ჯერ კიდევ ველით, რომ საკუთარი სიტყვის თქმა შეუძლია. 25 წლის შემტევს რესურსი ნამდვილად აქვს. ქუთაისელებს ურთიერთობის გარკვევა ბოსნიურ "სარაევოსთან" უწევთ და თუკი მათ ბარიერს წარმატებით გაივლიან, ყაზახური "აქტობე" ელით.

ქართულ კლუბებს წარმატება უნდა ვუსურვოთ!..

წიტაიშვილი კარიერას ბათუმის "დინამოში" გააგრძელებს

ოფიციალურად - გიორგი ლორია თბილისის "დინამოში" დაბრუნდა

ქუთაისის "ტორპედომ" სამი ახალი ფეხბურთელი დაიმატა