"ასტანასა" და "დინამოს" პირველმა მატჩმა რეკორდი დაამყარა, თბილისში ის უნდა დაიმხოს - შედიევს საკუთარი გუნდის გასვლის არ სჯერა

Sport.kz Sputnik Azerbaijan-ზე დაყრდნობით წერს, რომ ჩემპიონთა ლიგის საკვალიფიკაციო ეტაპის პირველ მატჩზე, სადაც "ასტანამ" თბილისის "დინამოს" უმასპინძლა და 1:1 ითამაშა, რეკორდი დამყარდა.

როგორც ირკვვევა, ევროპის ყველაზე პრესტიჟული ტურნირის საკვალიფიკაციო ეტაპის პირველ შეხვედრაში ყველაზე მეტი ადამიანი სწორედ ამ დაპირისპირებას დაესწრო.

Astana Arena-ზე 27 328 ადამიანი შეიკრიბა. იმედია და ამის დიდი სურვილი გვაქვს, რომ ხვალ თბილისში, განმეორებით შეხვედრაში, ტრიბუნებზე გაცილებით მეტი ადამიანი იქნება და "დინამოს" შემდეგ ეტაპზე გასვლაში დაეხმარება.

Sport.kz-მ ვეტერანი ყაზახი ფეხბურთელის, იუსუფ შედიევის კომენტარიც გამოაქვეყნა, რომელსაც თავისი ქვეყნის კლუბის გასვლის არ სჯერა.

"ვფიქრობ, უპირატესობა ქართველებს ექნებათ. ისინი ხელოვნურ საფარს მიჩვეული არ იყვნენ, მაგრამ ყაზახეთშიც მოედანზე თავს საკმაოდ კომფორტულად გრძნობდნენ.

მგონია, რომ სახლში კიდევ უფრო უკეთ ითამაშებენ. მათ გუნდში ჰყავთ პერსპექტიული, ახალგაზრდა ბიჭები, რომლებსაც სურთ წავიდნენ ძლიერ ევროპულ ლიგებში სათამაშოდ. ვფიქრობ, შემდეგ ეტაპზე "დინამო" გავა", - ამბობს შედიევი.

ინფორმაციისთვის, "დინამოსა" და "ასტანას" მატჩი 19 ივლისს, 20:00 საათზე დაიწყება.