ჩემპიონთა ლიგის განმეორებით მეოთხედფინალურ მატჩში "ლივერპულმა" გასვლაზეც დაამარცხა "მანჩესტერ სიტი" და 1/2-ფინალში გავიდა."ენფილდზე" დამარცხებული (0:3) "მანჩესტერ სიტი" თითქოს უშანსოდ იყო, მაგრამ შეხვედრა წესიერად დაწყებული არ იყო, როდესაც გაბრიელ ჟეზუშმა სტერლინგის პასით ანგარიში გახსნა, ტურნირის ინგლისურ დერბის ინტრიგა დაუბრუნდა და ცალკარა თამაში წავიდა.
"ქალაქელები" დიდ ტერიტორიულ და სათამაშო უპირატესობას ფლობდნენ, რამოდენიმე მომენტიც ჰქონდათ, რომელთაგან ყველაზე რეალური შესაძლებლობა 41-ე წუთზე ბერნარდუ სილვას ჰქონდა, რომელმაც ბურთი ძელს გაარტყა. მომდევნო იერიშისას კი აქტიურმა სანემ გაიტანა გოლი, მაგრამ მსაჯმა ოფსაიდი დააფიქსირა. პირველი ტაიმის დასრულების შემდეგ "სიტის" მწვრთნელი გვარდიოლა მოედანზე შევიდა, მსაჯს კამათი დაუწყო და გააძევეს.
შესვენების შემდეგ "წითლებმა" თამაში დაალაგეს და 56-ე წუთზე სალაჰმა, რომლის ამ მატჩში მონაწილეობა ტრავმის გამო საეჭვო გახლდათ, საპასუხო გოლი გაიტანა და ფაქტიურად გადაწყვიტა ნახევარფინალისტის ვინაობა. ეგვიპტელმა წელს 16 მატჩში 17 გოლი გაიტანა.
77-ე წუთზე კი ფირმინომ ანგარიში 1:2 გახადა და ყველაფერი დასრულდა. "ლივერპული" 2008 წლის შემდეგ პირველად გავიდა ამ ტურნირის ნახევარფინალში. კლოპი პირველი მწვრთნელია, რომელმაც გვარდიოლა შვიდჯერ დაამარცხა. გვარდიოლამ 2015 წლის მაისის შემდეგ პირველად წააგო ზედიზედ სამი მატჩი.
მანჩესტერი. "ეტიჰადი". 53 461 მაყურებელი
მანჩესტერ სიტი - ლივერპული 1:2
გოლები: 1:0 გაბრიელ ჟეზუში (2), 1:1 სალაჰი (1:1), 1:2 ფირმინო (77)
მანჩესტერ სიტი: ედერსონი, უოლკერი, ლაპორტი, ოტამენდი, ფერნანდინიო, დე ბრიუნე, დავიდ სილვა (აგუერო 66), სანე, ბერნარდუ სილვა (გიუნდოგანი 74), სტერლინგი, გაბრიელ ჟეზუში
ლივერპული: კარიუსი, ალექსანდერ - არნოლდი (კლაინი 80), ლოვრენი, ვან დეიკი, რობერტსონი, ვაინალდუმი, მილნერი, ოქსლეიდ - ჩემბერლენი, სალაჰი ინგზსი 89), ფირმინო (კლავანი 82), მანე
მწვრთნელების კომენტარები:
▶ იურგენ კლოპი: ცუდი გუნდი არ ვართ, მაგრამ სამუშაო კიდევ გვაქვს
▶ პეპ გვარდიოლა: მსაჯს ვუთხარი, რომ სანემ ნაღდი გოლი გაიტანა და გამაძევა
