11 დეკემბერს ანდრეი შევჩენკო ოფიციალურად წამოაყენებს საკუთარ კანდიდატურას უკრაინის ფეხბურთის ასოციაციის პრეზიდენტის პოსტზე, - ამის შესახებ ინფორმაციას ჟურნალისტი იგორ ბურბასი თავისი ტელეგრამ-არხით ავრცელებს.
კანდიდატად რეგისტრაციისთვის შევჩენკოს ოცდაშვიდი მუდმივი წევრიდან მინიმუმ ცხრის შესაბამისი განცხადება სჭირდება. განაცხადის შეტანის ბოლო ვადა 26 დეკემბერია.
უკრაინის ფეხბურთის ასოციაციის რიგგარეშე კონგრესი 25 იანვარს ჩატარდება, რომელზეც ახალ პრეზიდენტს აირჩევენ. ადგილობრივი მედიის მტკიცებით, შევჩენკოს პრეზიდენტად არჩევა უკვე გადაწყვეტილია.
უკრაინის ფეხბურთის ასოციაციის ამჟამინდელი პრეზიდენტი ანდრეი პაველკო და გენერალური მდივანი იური ზაპისოცკი ამჟამად დაკავებული არიან. მათ ბრალად დიდი ოდენობით თანხის მითვისება ედებათ.
