ვლადიმერ ხაჩიძე: ჩვენი ჩემპიონატი ნაკრებისთვის კონვეიერად ვერ გამოდგება

ცხინვალის "სპარტაკისთვის" წინა სეზონი წარმატებული გამოდგა - ვლადიმერ ხაჩიძის გაწვრთნილი გუნდი უმაღლეს ლიგაში აღზევდა, თასის გათამაშებაში კი მეოთხედფინალამდე მიაღწია.

"სპარტაკში" არაერთი საინტერესო ახალგაზრდა ფეხბურთელია. მათ შორის ისეთებიც არიან, უმაღლეს ლიგასა და სხვადასხვა ასაკობრივ ნაკრებში თამაშის გამოცდილება რომ აქვთ.

ერთი სიტყვით, "სპარტაკის" უმაღლეს ლიგაში დაბრუნება მოულოდნელობა არ ყოფილა.

რაც შეეხება გუნდის თავკაცს, ხაჩიძეს საკმაოდ ბევრი ქართული გუნდი გაუწვრთნია და საქართველოს ჩემპიონატის ავან-ჩავანს კარგად იცნობს, შეიძლება ითქვას, რომ ამ საქმეში ჭიპმოჭრილი სპეციალისტია...

- ამ დროისთვის

რა ვითარებაა "სპარტაკში"? არის ჯერ ცნობილი, თუ რა გაქანების გუნდი იქნება "სპარტაკი" დამდეგ სეზონში?
- როგორც თითქმის ყველა ქართული კლუბი, ჩვენც მთავრობის გადაწყვეტილებას ველოდებით, ჯერ არ ვიცით, რა ბიუჯეტი გვექნება. ფეხბურთელები შვებულებაში არიან. 16 ივნისს შევიკრიბებით, 25 ივნისიდან კი ბაკურიანში წავალთ თორმეტდღიან შეკრებაზე. მერე კი ყველაფერი იმაზე იქნება დამოკიდებული, თუ რა დაფინანსება გვექნება.

- "სპარტაკი" რომელიმე ფეხბურთელმა დატოვა?
- ზოგიერთ მოთამაშეს კლუბთან კონტრაქტი დაუმთავრდა და როცა შევიკრიბებით, მერე გაირკვევა მათი საკითხი. გუნდიდან არავინ გაგვიშვია.

- წინა სეზონის პირველ ლიგაზე რას გვეტყოდით? ძალიან დიდი იყო სხვაობა უმაღლეს ლიგასთან?
- პირველ ლიგაში მუშაობა სამჯერ მომიწია - ჯერ ხაშურის "ივერია" გადავიყვანე უმაღლეს ლიგაში, 2002 წელს კი გორის "დილა". ისე გამოვიდა, რომ ყოველ ათ წელიწადში მომიწია პირველი ლიგის გუნდის გაწვრთნა და უმაღლესში გადასვლა. ახლანდელი პირველი ლიგა უწინდელ პირველ ლიგებთან შედარებით სუსტია. ცხადია, ამ უმაღლეს ლიგასთანაც დიდი სხვაობაა.

- წინა სეზონში, თასის გათამაშების მერვედფინალში უმაღლესლიგელი "ვიტ ჯორჯია" დაამარცხეთ, მერე კი რუსთავის "მეტალურგს" დაუპირისპირდით და ნახევარფინალში გასვლის არცთუ ურიგო შანსი გქონდათ - ალბათ, კმაყოფილი დარჩით თქვენი გუნდის სათასო შეხვედრებით...
- "მეტალურგთან" მეტიც შეგვეძლო, თუმცა რამდენიმე წამყვანი ფეხბურთელის ტრავმიანობამ შეგვიშალა ხელი - დავით გელაშვილმა და თორნიკე თუხარელმა ვერ ითამაშეს, უჩა ბურძენაძე კი ახალგამოჯანმრთელებული გახლდათ.

რაც შეეხება "ვიტ ჯორჯიასთან" დაპირისპირებას, სტუმრად მცხეთაში 1:0 ვიგებდით. მერე 11-მეტრიანი ვერ გამოვიყენეთ, საპასუხო შეხვედრაშიც პირველი გოლი ჩვენ გავიტანეთ...

"ვიტ ჯორჯიას" უმაღლეს ლიგაში ჰქონდა პატარა ჩავარდნა. არა მგონია, რომ ჩვენზე ბევრად მაღლა იდგა იმ მომენტში. ცოტა იღბალმაც გადმოგვხედა, თუმცა საერთო ჯამში. ღირსეულად გავიარეთ თასის მერვედფინალი. ისიცაა, რომ პირველ ლიგაში შედარებით დაბალი სისწრაფეა და ძნელია, როცა უმაღლესი ლიგის გუნდთან გიწევს პაექრობა.

- "სპარტაკის" თავდამსხმელ დავით გელაშვილს პერსპექტიულ თავდამსხმელად მიიჩნევდნენ - თქვენ როგორ დაახასიათებდით მას?
- წინა სეზონში, პირველი წრის დასაწყისში ის მართლაც კარგად გამოიყურებოდა, გუნდის ბომბარდირიც იყო, მაგრამ მერე არ გაუმართლა, ოპერაცია გაიკეთა და ვეღარ დაეხმარა გუნდს.

- აღნიშნეთ, სხვაობა უმაღლეს და პირველ ლიგას შორის მნიშვნელოვანი არისო. ეს იმას უნდა ნიშნავდეს, რომ სათანადო დაფინანსების შემთხვევაში "სპარტაკი" გამოცდილი ფეხბურთელებით გაძლიერდება?
- ასე არ ვიტყოდი. უკვე გვაქვს გარკვეული მონახაზი სელექციის მხრივ და ვაპირებთ, ახალგაზრდა ფეხბურთელებზე გადავიტანოთ აქცენტი.

- ანუ "სპარტაკს" ისევ მხოლოდ ორი გამოცდილი ფეხბურთელი ეყოლება?
- ზვიად მეტრეველი და ნიკა მგელაძე - ისევ ისინი იქნებიან "სპარტაკის" გამოცდილ მოთამაშეთა სიაში.

- ყოველივე ეს, ალბათ, იმას უნდა ნიშნავდეს, რომ 2013/14 წლების სეზონში "სპარტაკი" უმაღლეს ლიგაში ადგილის შენარჩუნებისთვის იბრძოლებს...
- რა თქმა უნდა, არა. თუ იმ პროექტის განხორციელება მოვახერხეთ, რაც ჩაფიქრებული გვაქვს, დამდეგ სეზონში საკმაოდ ბრძოლისუნარიანი გუნდი გვეყოლება.

- რომელ მოედანზე გამართავს საშინაო შეხვედრებს "სპარტაკი" მომავალ სეზონში და სად ივარჯიშებს - ესეც არ არის ჯერ გარკვეული?
- თითქმის გადაწყვეტილია, რომ მიხეილ მესხის სახელობის სტადიონის მეორე მოედანზე ვუმასპინძლებთ მეტოქეებს. რადგან მინდორზე ვითამაშებთ, გვინდა, რომ ტრავმებს ავერიდოთ და ასევე მინდორზე ვივარჯიშოთ, ასეთი მოედანი კი ძალიან ცოტაა. ერთი სიტყვით, ვნახოთ, რა როგორ იქნება.

- რომ არა კლუბის პრეზიდენტის ფაქტორი, "სპარტაკს" უმაღლეს ლიგაში დაბრუნება, ალბათ, ძალიან გაუჭირდებოდა...
- რა თქმა უნდა, მიზნის შესრულება გიადვილდება, როცა კლუბის პრეზიდენტი ყველანაირ პირობას გიქმნის. პირველი ლიგის კვალობაზე მართლაც კარგი პირობები გვქონდა, შეკრება ზაფხულშიც გავიარეთ და ზამთარშიც. ძალიან მნიშვნელოვანია, როცა კლუბის პრეზიდენტს ძალიან უყვარს ფეხბურთი.

- პარალელურად, ალბათ, წინა სეზონის უმაღლეს ლიგასაც ადევნებდით თვალყურს. რომელი გუნდები მოგეწონათ? რაიმე სიახლე დაინახეთ?
- "დინამო" ჩემპიონი გახდა და თასიც მოიპოვა, საუკეთესოც, ცხადია, ის იყო. მომეწონა გორის "დილაც", ამ გუნდმა რამდენიმე შეხვედრაში მართლაც კარგი თამაში აჩვენა. რაც შეეხება სიახლეს, ვერ ვიტყვი, რომ წინა სეზონში ვიღაცამ გამაკვირვა.

- საქართველოს ჩემპიონატიდან შეუძლებლად მიგაჩნიათ სელექციის წარმართვა ეროვნული ნაკრებისთვის? ფაქტია, ჩვენს ასაკობრივ ნაკრებებს აქვთ გარკვეული წარმატებები, ანუ არცთუ ურიგო თაობა მოდის...
- პირდაპირ გეტყვით - ჩვენი ჩემპიონატი არ არის იმ დონის, რომ კონვეიერივით მიაწოდოს ფეხბურთელები ეროვნულ ნაკრებს.

ყველაფერს რომ თავი დავანებოთ, სანაკრებო დონეს სულ სხვა სისწრაფეზე თამაში სჭირდება. ამას ემატება ისიც, რომ ლეგიონერთა უმეტესობას სათამაშო პრაქტიკა არ აქვს - ამიტომაც უჭირს ასე ძალიან საქართველოს ნაკრებს.

თუ ფული არ ჩაიდება საკლუბო ფეხბურთში, ვერ გამოვზრდით ისეთ ფეხბურთელებს, საერთაშორისო დონეზე კონკურენციის უნარი რომ ექნებათ.

(იბეჭდება მცირე ცვლილებით)
ყოველდღიური სპორტული გაზეთი "ლელო"

ასევე იხილეთ:
ვლადიმერ ხაჩიძე: ცხინვალის "სპარტაკის" კოზირი გუნდის ხელწერაა
ვლადიმერ ხაჩიძე: ქომაგი რომ გვყოლოდა, არ დავქვეითდებოდით
ზვიად მეტრეველი: მადლობა პრეზიდენტს, დიმა სანაკოევი სულ გვერდში გვედგა!
ცხინვალის "სპარტაკი" საქართველოს უმაღლეს ლიგას უბრუნდება!
ზვიად მეტრეველი: ფრთხილად უნდა ვითამაშოთ, შანსი კი გვექნება
გიორგი ნადირაძე: ასეთ რამეს არ გავაკეთებდი, მე ჩემი საქმე მაქვს