ბოლნისის "სიონი": ზამთრის მოსამზადებელი პერიოდი და თურქული შეკრება

ბოლნისის "სიონმა", საქართველოს ეროვნულ ჩემპიონატში მოკრძალებული, მე-14 ადგილი რომ უჭირავს, ზამთრის მოსამზადებელი პერიოდი დაგეგმა.

ლადო ბურდული და მისი შეგირდები იმედოვნებენ, რომ გუნდის სატურნირო მდგომარეობა კარდინალურად გაუმჯობესდება.

13-14 იანვარს "სიონის" ფეხბურთელები სამედიცინო შემოწმებას გაივლიან, 15-დან კი გუნდი თბილისში დაბანაკდება და ვარჯიშს დაიწყებს. საქართველოში "სიონმა" უკვე დაგეგმა 5 ამხანაგური მატჩი.

21 იანვარს ბოლნისელები ცხინვალის "სპარტაკს" დაუპირისპირდებიან, 27-ში მათი მეტოქე გორის "დილა" იქნება, 28 იანვარს ბურდულის გუნდი დედაქალაქურ "ვიტ ჯორჯიასთან" ისპარინგებს, 30-ში კი - პირველლიგელ "საბურთალოსთან".

ამჟამად, ბოლნისელთა ხელმძღვანელობა მოლაპარაკებას აწარმოებს ბაქოს აზალ-თან და საკითხის დადებითად გადაწყვეტის შემთხვევაში, აზერებთან სპარინგი 24 იანვარს გაიმართება.

ბოლნისელებმა თურქული შეკრებაც დაგეგმეს. გუნდი ბელეკში 1-ელ თებერვალს გაემგზავრება და იქ 14 თებერვლამდე დარჩება. ბელეკში "სიონი" ხუთ ამხანაგურ მატჩს ჩაატარებს. მოწინააღმდეგე გუნდების ვინაობა ზუსტდება.

ამ დროისთვის, "სიონს" ერთადერთი ახალწვეული ჰყავს - ფოთის "კოლხეთის" ყოფილი ლიდერი დათა სიჭინავა. ტრანსფერი სოლიდურია, თუმცა, ცხადია, ეს ვერ იქნება საკმარისი სიტუაციის გასაუმჯობესებლად. ამიტომ "სიონისგან" სატრანსფერო ბაზარზე გვარიანი აქტიურობაა მოსალოდნელი.

(იბეჭდება მცირე ცვლილებით)
ყოველდღიური სპორტული გაზეთი "ლელო"