საქართველოს ფეხბურთის ფედერაციის პრეზიდენტმა გასულ კვირას დაადასტურა, რომ საქართველო აღარ იბრძოლებს ევროპის 2020 წლის ჩემპიონატის მასპინძლობისთვის, თუმცა... "როცა რაღაცას თმობ, სანაცვლოდ სხვა რამ უნდა მიიღო და დარწმუნებული ვარ, უეფა არანაკლებ მნიშვნელოვანი ტურნირის მასპინძლობას გვანდობს", - ამბობს სფფ-ის სპორტული დირექტორი არჩილ არველაძე, რომელსაც სხვა არანაკლებ საინტერესო თემებზეც ვესაუბრეთ:
- რეალობის გრძნობა არ უნდა დავკარგოთ, ევროპის ჩემპიონატის ერთ-ერთი ეტაპის მასპინძლობისთვის ბრძოლა ძალიან რთული იქნებოდა, რადგან აღმოჩნდა, რომ არა ერთი თამაშის, არამედ მთელი ჯგუფის, ანუ ოთხი ნაკრების მატჩების მასპინძლობაზე იყო ლაპარაკი.
გარდა იმისა,
- სფფ-ის პრეზიდენტის თქმით, უეფას ხელმძღვანელობა საკმაოდ მაღალი დონის ტურნირის მასპინძლობას დაგვპირდა. იქნებ თქვენ მაინც დააკონკრეტოთ, რა ტურნირს გულისხმობდა ზვიად სიჭინავა?
- რადგან ბატონმა ზვიადმა შეიკავა თავი, ჯერ არც მე დავაკონკრეტებ. თუმცა, როცა რაღაცას თმობ, სანაცვლოდ სხვა რამ უნდა მიიღო...
საქართველოს ფეხბურთის ფედერაციასა და უეფას შორის ძალიან კარგი დამოკიდებულებაა, უეფას თავკაცებს ჩვენთვის მოცემული სიტყვა აქამდე არასდროს გაუტეხიათ, დარწმუნებული ვარ, დანაპირებს ამჯერადაც შეასრულებენ და 2015 წლის სუპერთასის მასპინძლობის გარდა, 2016 ან 2017 წელს კიდევ ერთ საინტერესო პროექტს გვანდობენ.
- ნაკრებზე გადავიდეთ - საფრანგეთთან და ფინეთთან მატჩებზე რას იტყვით?
- მსოფლიო ჩემპიონ ფრანგებთან ნათამაშები ფრე ჩვენი ნაკრებისთვის ძალიან მნიშვნელოვანი იყო. დასანანია, რომ ფინეთთან წავაგეთ და ქვეჯგუფში მესამე ადგილის დაკავება ვერ მოვახერხეთ. ჩვენთვის მინიმალური მიზანიც ეგ იყო და მაქსიმალურიც და რადგან ვერ შევასრულეთ, კმაყოფილი ვერავინ იქნება.
რა ობიექტური თუ სუბიექტური მიზეზითაც არ უნდა გავიმართლოთ თავი, ფაქტია, რომ ვერ მოვიგეთ! მიუხედავად იმისა, რომ ფინეთი ნამდვილად არ არის ხელწამოსაკრავი გუნდი, მიმაჩნია, რომ გვაქვს იმის უნარი და პრეტენზია, ფინეთი საშინაო მატჩში აუცილებლად დავამარცხოთ.
- თემურ ქეცბაიას მუშაობას როგორ შეაფასებთ?
- ეს შესარჩევი ციკლი წარუმატებელი იყო, მაგრამ აშკარაა, რომ თემურმა ბრძოლისუნარიანი გუნდის ჩამოყალიბება შეძლო და ჩვენთან იოლად მოგებას გრანდებიც კი ვეღარ ახერხებენ. საკმარისია თუ არა ეს, ამაზე მას შემდეგ ვილაპარაკოთ, ნაკრები ესპანეთშიც რომ ითამაშებს.
როცა მიმდინარე შესარჩევი ციკლი დამთავრდება, ბევრი რამ ამის შემდეგ გაირკვევა.
- სამწუხარო ტენდენცია გრძელდება და კიდევ უფრო გამწვავდა კონფლიქტი მწვრთნელსა და ნაკრების რამდენიმე ფეხბურთელს შორის...
- შესაძლოა, პირადი საუბრისას მწვრთნელმა რაღაც უთხრას კიდეც ფეხბურთელს და ეს ბუნებრივია. რაგინდ მართალი იყოს, სად გინახავთ, მოსწავლე აძლევდეს შენიშვნას მასწავლებელს?! ცუდი ის არის, ეს ყველაფერი საჯარო რომ გახდა და რა დონის ფეხბურთელიც არ უნდა იყოს, არ ვამართლებ იმ მოთამაშეებს, ვისგანაც ეს წამოვიდა.
თორმეტი წელიწადი ვითამაშე ნაკრებში და როგორც არ უნდა დაძაბულიყო ურთიერთობა მწვრთნელსა და მოთამაშეს შორის, საჯარო განხილვის თემად თითქმის არასდროს ქცეულა. ფეხბურთელებისთვის არაერთხელ მითქვამს და ვიმეორებ - თუ რამე პრობლემაა, არის შესაძლებლობები, ეს ყოველივე ნაკრებს შიგნით მოვაგვაროთ. როგორც კი საჯარო ხდება, მერე ამ ყველაფრის მოგვარება ძალიან რთულდება.
ცუდია, ფეხბურთელებმა ეს წესი რომ არ დაიცვეს და ამ სიტუაციაში მათ უფრო მეტად ვადანაშაულებ. ყოველ შემთხვევაში, პირველი ნაბიჯი თემურს არ გადაუდგამს. როცა მწვრთნელს საჯაროდ ლანძღავ, ე.ი. არ გინდა არც მასთან ურთიერთობა და არც ნაკრებში თამაში...
- ბოლოს, ხიზანიშვილზეც გკითხავთ - როგორ ფიქრობთ, ზურამ ხომ არ იჩქარა? საქართველოს ნაკრებისთვის სარგებლის მოტანა აღარ შეეძლო?
- ზურას პირადადაც ვუთხარი, რომ არასწორად და არაპროფესიონალურად მოიქცა. როგორი ნაწყენიც არ უნდა იყოს, ავტობუსში მაინც უნდა ასულიყო.
რაც შეეხება ნაკრებიდან წასვლას, რა თქმა უნდა, იჩქარა - დარწმუნებული ვარ, ისეთი კარგი და გამოცდილი ფეხბურთელი, როგორიც ხიზანაა, 2-3 წლის განმავლობაში კიდევ დაეხმარებოდა საქართველოს ნაკრებს.
რატი შელეგია
გაზეთი "ყველა სიახლე"
ასევე იხილეთ:
თემურ ქეცბაია: ვისაც არ უნდა საქართველოს ნაკრებში, არავის შევეხვეწებით!
ზურაბ ხიზანიშვილი: ამ ნაკრებში ჩემი ადგილი აღარ არის
შოთა არველაძე: ვნახე ის საქართველოს ნაკრები, რასაც ველოდი
საქართველოს ნაკრები საფრანგეთ-ფინეთთან მატჩების შემდეგ: ვინ როგორ...
საქართველო-ფინეთი 0:1 - მაჩანჩალობისთვის განწირულნი [VIDEO]
საქართველო-საფრანგეთი 0:0 - ფრე, რომელიც ისტორიას დარჩება [VIDEO]
