[ლეგიონი ყაზახეთში] გოგუას გოლი, ცხადაძის მორიგი გამარჯვება, დვალის "მშრალი" თამაში [VIDEO]

ყაზახეთის პრემიერლიგაში მორიგი ტურის თამაშები გაიმართა. ამ ტურში გოლით თავი გოგიტა გოგუამ გამოიჩინა.

გოგუასა და ოთარ მარცვალაძის (განაცხადში არ ყოფილა) "ორდაბასიმ" "თარაზს" უმასპინძლა და 3:0 მოუგო. ჩვენებური მოედანზე მე-80 წუთზე გამოვიდა და 86-ე წუთზე ბრწყინვალე გოლი გაიტანა, ის დრიბლინგით შეიჭრა საჯარიმოში და თანაგუნდელთან კედელი გაითამაშა. ეს გოლი 33 წლის ქართველი ნახევარმცველისთვის სეზონში მეორეა (მანამდე თასზე შეაგდო). "ორდაბასი" 32 ქულით მესამე ადგილზეა.

კახა ცხადაძის "ქაირათმა" 4:1 გაანადგურა "შახტიორი". ეს ქართველი სპეციალისტის ზედიზედ მესამე გამარჯვებაა ჩემპიონატში. "ქაირათი" 34 ქულით მეორე ადგილზეა. "მეორე ტაიმში უკვე მაყურებელზე ვითამაშეთ", - განაცხადა გამარჯვებულთა თავკაცმა.

ომარ თეთრაძის "ტობოლი" შინ 0:0 დაუზავდა "კაისარს". "ტობოლის" შემადგენლობაში ნიკა კვეკვესკირი მას მერე ითამაშებს, რაც კლუბს მისი დარეგისტრირების უფლება ექნება (13 ივნისის მერე). "ტობოლი" 25 ქულით მეხუთე ადგილზეა.

ქართველთა "ატირაუ" ლიდერ "ასტანას" ესტუმრა და 0:4 დამარცხდა. უჩა ლობჟანიძე და ლადო დვალიშვილი სასტარტო შემადგენლობაში იყვნენ. ლობჟანიძე შესვენებაზე შეცვალეს. "ატირაუ" 14 ქულით მეშვიდე ადგილზეა.

ლაშა დვალის "ირტიში" შინ "ოკჟეტპესს" 0:0 დაუზავდა, ქართველმა მცველმა შეუცვლელად ითამაშა. "ირტიში" 28 ქულით მეოთხე ადგილზეა.