გიორგი მერებაშვილი მატჩის საუკეთესო ფეხბურთელად დაასახელეს

საბერძნეთის ჩემპიონატის მორიგ ტურში ოფი შინ ვერ უგებდა "ერგოტელისს" დერბის, რომ არა გიორგი მერებაშვილის შეჭრა საჯარიმოში მსაჯის მიერ კომპენსირებულ დროში, რასაც პენალტი მოყვა - 1:0. გიორგი ლორიამ თანაგუნდელის მსგავსად 90 წუთი ითამაშა და კარი მშრალად შეინახა.

კრეტულ გუნდს 11 თამაშიდან 13 ქულა აქვს და მე-12 ადგილზეა. ქართველთა გუნდმა ოქტომბრის მერე პირველად მოიგო. "მძიმე მატჩი იყო, მიუხედავად უამრავი შეცდომისა, გახარებულნი ვართ, რომ ბოლოს ვიმარჯვეთ", - განაცხადა ჯენარო გატუზომ.

sport24.gr ამტკიცებს, რომ მსაჯის მიერ მე-6 დამატებულ წუთზე დანიშნული პენალტი არ არსებობდა.

"ყველაზე მეტად თამაშში მერებაშვილი აქტიურობდა. ის ითხოვდა ხშირად პასს და ცდილობდა ყველა დისტანციიდან კარის დალაშქვრას. არცაა გასაკვირი, რომ მის მოქმედებას მოყვა ოფი-ს გამარჯვება.

დერბის ცეცხლი შეუნთო მე-6 დამატებულ წუთზე დანიშნულმა პენალტმა, რომელიც არ არსებობდა. ლიკოგიანისთან დუელში მერებაშვილი წაიქცა და კავალელმა არბიტრმა არასწორი გადაწყვეტილება გამოიტანა.

ამასთან, საიტმა გიორგი მერებაშვილის თამაშიც დააფასა და ის მატჩის საუკეთესო ფეხბურთელად დაასახელა:

"ჩვენ საუკეთესოდ ვასახელებთ მერებაშვილს. ეს იყო ოფი-ს რიგებში ქართველის ერთ-ერთი საუკეთესო მატჩი. ერთადერთი ფეხბურთელი, რომელიც არც ბრძოლას გაურბოდა და არც ბურთს ემალებოდა. ის ცდილობდა, თანაგუნდელებიც აეყოლიებინა. მან მოიპოვა პენალტი გუნდისთვის, რომელმაც 3 ქულა მოიტანა".

რაც შეეხება გიორგი ლორიას, მას 2-3-ჯერ მოუწია თამაშში ჩართვა და შეცდომა არ დაუშვია.