მოსკოვის "სპარტაკისა" და "დინამოს" დერბიში (1:0), ექსპერტთა შეფასებით, ყველაზე მთავარი ცვლილება, რომელმაც შედეგზე იმოქმედა, სასტარტო შემადგენლობაში ნახევარწლიანი პაუზის მერე ჯანო ანანიძის გამოჩენა იყო. საფეხბურთო ექსპერტები თანხმდებიან, რომ მურატ იაკინის ამ გადაწყვეტილებამ "სპარტაკს" დერბიში წარმატება მოუტანა - 22 წლის ქართველმა მოედანზე შეხვედრის დიდი დრო გაატარა და ბრწყინვალედ ითამაშა.
"სპარტაკის" ვეტერანი ვალერი რეინგოლდი: "ჯანომ, უბრალოდ, ფანტასტიკური მატჩი ითამაშა. ის მუდამ ამწვავებდა თამაშს, კარგ პასებს არიგებდა, ბურთს ჩინებულად ფლობდა და დრიბლინგიც კარგი შემოგვთავაზა. ქებათა ქება მურატ იაკინს, რომ ასეთ რთულ მატჩში ჯანო დააყენა
დარწმუნებული ვარ, რომ დროთა განმავლობაში, ჯანო საბოლოოდ ამოაგდებს ხურადოს შემადგენლობიდან. ქართველ ნახევარმცველს "სპარტაკისთვის" გაცილებით მეტი სარგებლის მოტანა შეუძლია. ის ახალგაზრდაა, მოტივირებულია და სურს "სპარტაკში" მაღალ დონეზე თამაში. თუ მწვრთნელი მომავალშიც ენდობა, ის მეტად მოინდომებს".
ალექსანდრ მოსტოვოი ("სპარტაკის" და რუსეთის ნაკრების ყოფილი ფეხბურთელი): "ჯანო უკვე დიდი ხანია, ცდილობს "თეთრ-წითლების" სასტარტოში მოხვედრას. გასულ სეზონში მან კონკურენცია წააგო ხურადოსთან, ამ სეზონში კი მისი სწრაფი ზრდა შეაჩერა რუსეთის თასზე მომხდარმა ინციდენტმა. კარგია, რომ ეს უკვე წარსულია და მურატ იაკინი კვლავ ენდობა ქართველს - არ გაუშვა ის იჯარით და დააყენა "დინამოსთან" სასტარტოში.
ანანიძემაც თამაშით დაამტკიცა, რომ ბრწყინვალე ფეხბურთელია. პირველ რიგში, მას სურდა, მწვრთნელს დაენახა, რომ ცდებოდა, როცა მის ნაცვლად კონკურენტს ენდობოდა. არ მინდა ძალიან ვაქო ჯანო, მაგრამ შემიძლია ვთქვა, რომ ანანიძე პოტენციალით არაფრით ჩამოუვარდება ხურადოს. ახლა ყველაფერი ანანიძეზეა დამოკიდებული".
შეგახსენებთ, რომ ჯანო ანანიძეს მოსკოვის "სპარტაკთან" 2017 წლამდე აქვს კონტრაქტი.
