ყაზახეთში უმაღლესი ლიგის მე-20 ტურის მატჩები გაიმართა. კახა ცხადაძის "ქაირათმა" შინ ომარ თეთრაძის "ტობოლი" 3:2 დაამარცხა და მიმდინარე ჩემპიონატში პირველად აღზევდა მე-2 ადგილზე. "ქაირათი", რომელსაც 40 ქულა აქვს, ლიდერ "ასტანას" 10 ქულით ჩამორჩება. თეთრაძის "ტობოლი" კი 25 ქულით მე-6 ადგილზეა.
აღსანიშნავია, რომ ცხადაძეს მორიგი დაპირისპირება ისევ თანამემამულის გაწვრთნილ გუნდთან უწევს. ევროპალიგის საკვალიფიკაციო ეტაპზე "ქაირათი" შოთა არველაძის "მაკაბისთან" პირველ მატჩს შინ, 14 ივლისს ჩაატარებს.
ყაზახეთშივე, შოთა გრიგალაშვილის "ირტიში" სტუმრად 0:1 დამარცხდა "თარაზთან". ქართველმა ნახევარმცველმა მეორე ტაიმი ითამაშა.
გოგიტა გოგუასა და ოთარ
* * *
ნორვეგიის უმაღლესი ლიგის მორიგ ტურში გიორგი გოროზიას "სტაბეკმა" სტუმრად 2:1 მოუგო "ლილესტრიომს". ქართველი ნახევარმცველი 83-ე წუთზე შეცვალეს.* * *
ბელორუსის თასის 1/16-ფინალში იმარჯვა მოზირის "სლავიამ" (სტუმრად 2:0 მინსკის "ტორპედოსთან") და შემდგომ სტადიაზე გავიდა. სტუმართაგან ერთი გოლი პაპუნა მოსემღვდლიშვილის ანგარიშზეა. მან 71-ე წუთზე გახსნა ანგარიში. * * *
ესტონეთის ჩემპიონატის 7-გოლიან თრილერში დამარცხდა (3:4) "ფლორა", რომელიც "ინფონეტს" სტუმრობდა. დამარცხებულთა რიგებში 89-ე წუთზე შეცვალეს ზაქარია ბეგლარიშვილი. ევროთასების პირველი საკვალიფიკაციო ეტაპიდან გავარდნილი "ფლორა" ჩემპიონატშიც ცუდად ასპარეზობს - 18 ტურის მერე მხოლოდ მე-4 ადგილზეა 31 ქულით. * * *
ფინეთის იუკონენლიგაში "კპვ კოკოლა" შინ 2:3 დამარცხდა ტპს-თან. მასპინძელთა რიგებში 77-ე წუთზე გოლი გაიტანა ირაკლი სირბილაძემ, რომელმაც ყვითელი ბარათიც მიიღო. კპვ-მ ზედიზედ 4 თამაში წააგო და ლიდერობა დათმო, ახლა სირბილაძის გუნდი 22 ქულით მხოლოდ მესამე ადგილზეა. მიმდინარე ჩემპიონატში ქართველის ანგარიშზე 4 გოლია. გიორგი ოსიტაშვილის კტპ დღეს თამაშობს.
(იბეჭდება მცირე ცვლილებით)
ყოველდღიური სპორტული გაზეთი "ლელო"
