პოლონური მედია: ძვირფასო ვაკო, გაგვეცნობი ოდესმე?

weszlo.com-მა გამოაქვეყნა სტატია ვარშავის "ლეგიას" ახალწვეულ ვაკო ყაზაიშვილზე, სათაურით: "ძვირფასო ვაკო, გაგვეცნობი ოდესმე?" ოდნავ შემოკლებულ სტატიას აქვე გთავაზობთ:

"გვინდა მოგიყვეთ ვაკო ყაზაიშვილზე, მაგრამ როგორ? ჩვენ ის თითქმის არ გვინახავს. ფეხბურთელი, რომელმაც ჰოლანდიის ერედივიზიეს ბოლო ორ სეზონში 21 გოლი გაიტანა და 10 საგოლე პასი გააკეთა, პოლონეთის ჩემპიონატში უნდა ბრწყინავდეს.

არადა, ყაზაიშვილი, უკვე ორი თვე ხდება, "ლეგიაშია". როგორც ჩანს, ის მარიან ანტოლოვიჩის ("ლეგიას" ყოფილი მეკარე) შემდეგ გუნდის ყველაზე დიდი იმედგაცრუებაა. ციფრები საშინელია - ვაკომ გასულ სეზონში უფრო მეტი გოლი და პასი მიითვალა, ვიდრე "ლეგიაში"... სათამაშო წუთი. "ლეგიას" ახალი ვარსკვლავისგან" არც არაფერი ისმის.

მოდი, გავიხსენოთ მოვლენები, რომლებიც ვაკოს "ლეგიაში" ტრანსფერს მოჰყვა:
- 31 აგვისტო: გაფრინდა ვარშავაში და კონტრაქტი გააფორმა.
- შემდეგ წავიდა ნაკრების შეკრებაზე ავსტრიასთან თამაშის წინ.
- 9 სექტემბერს პირველად ივარჯიშა "ლეგიაში".
- 10 სექტემბერს "ლეგიამ" "ტერმალიცასთან" ვაკოს გარეშე ითამაშა.
- 14 სექტემბერს ვაკომ ჩემპიონთა ლიგაზე "დორტმუნდის" წინააღმდეგ ითამაშა.
- 18 სექტემბერს ის უკვე აღარ იყო "ზაგლებიესთან" მატჩის განაცხადში.

ჰასიმ მაშინ ახსნა, რომ ყაზაიშვილი იმიტომ არ ათამაშა, რომ "ბორუსიასთან" მატჩში გუნდელებს ნომრებით ეძახდა, რადგან მათი სახელებიც კი არ იცოდაო. ეს ცოტა აბსტრაქტული მტკიცებაა, რადგან ვაკო ვარჯიშებზე გუნდელებთან ერთად ემზადებოდა.

ბოლო მატჩის საფინალო სასტვენსაც არ დაელოდა ვაკო, რომ ტაქსით გაემართა სტადიონიდან. ასეთი საქციელი კი კლუბში არ მოსწონთ.

- 23 სექტემბერს "ვისლასთან" მატჩი სათადარიგოთა სკამზე გაატარა.
- 27 სექტემბერს (უკვე მწვრთნელი მაგიერაა) "სპორტინგთან" მატჩის 18 კაცში ვერ მოხვდა.

მაშინ ახალმა მწვრთნელმა თქვა, რომ "სპორტინგთან" მოსამზადებლად ცოტა დრო ჰქონდა და ვაკოს ვერ გამოუნახა პოზიცია. წარმოიდგინეთ, "ლეგიას" თავკაცმა არ იცის, რას ელოდოს ქართველისგან. ყველაზე ცუდი ის არის, რომ ამ ამბიდან ერთი თვის მერეც არ ვიცით, რას ველოდოთ ქართველისგან.

ვაკო ლისაბონში მაინც წაიყვანეს, მიუხედავად იმისა, რომ იცოდნენ, არ ითამაშებდა. ის ჩანდა ახალ გუნდელებთან ერთად, ხუმრობდა მათთან ერთად, მოკლედ, პოზიტიური სიახლე მაინც იყო...

ვაგრძელებთ:
- 1-ელ ოქტომბერს "ლეხიასთან" მატჩის ბოლო 13 წუთი ითამაშა. თითქოს, მისი კარიერა ნელ-ნელა აეწყო "ლეგიაში". წავიდა ნაკრების შეკრებაზე.
- 14 ოქტომბერს "პოგონთან" წაგებულ მატჩში 24 წუთი ითამაშა.
- ოთხ დღეში, 18 ოქტომბერს 16 წუთი ითამაშა "სანტიაგო ბერნაბეუზე" "რეალის" წინააღმდეგ.

ისე ჩანდა, რომ "ლეხთან" მატჩში ვაკო სასტარტოში უნდა ყოფილიყო, მაგრამ შანსი ფინელ ჰამალაინენს მიეცა. თვე-ნახევრის განმავლობაში ვაკომ ჩემპიონატში 37 წუთი ითამაშა! მისმა კონკურენტმა ჰამალაინენმა 101, ლანგილმა - 180, "ბულგარელმა კრიშტიანო რონალდომაც" (ალექსანდროვი) კი მასზე მეტი ითამაშა - 54 წუთი.

სულ უფრო და უფრო ეჭვი გვეპარება, რომ ყაზაიშვილი "ლეგიას" მოწინავე ფეხბურთელი გახდება. ტრანსფერის შემდეგ ვაკოს ფრჩხილიც კი არ ასტკიებია, მცირე ტრავმაც არ მიუღია.

პოლონეთში ელიან, როდის გაარღვევს ვაკო ამ წარუმატებელ წრეს, მაგრამ უსასრულოდ ვერ დაელოდები...