ტრენჩინი VS ტორპედო - სტუმრად ცუდ მასპინძლებთან

დღეს, 29 ივნისს, ქუთაისის "ტორპედო" ევროპალიგის პირველ საკვალიფიკაციო ეტაპზე სლოვაკურ "ტრენჩინთან" პირველ შეხვედრას სტუმრად გამართავს. მატჩი ხელოვნურსაფარიან "ნა სიჰოტიზე" თბილისის დროით 19:20 საათზე დაიწყება და მის ტრანსლაციას სლოვაკური ტელეკომპანია DAJTO გეგმავს.

თამაშისთვის "ტორპედო" ტრენჩინიდან 30 კილომეტრის მოშორებით, პიეშტანიში მოემზადა. თეორიულ მეცადინეობასთან ერთად, ტორპედოელებმა 28 ივნისს მატჩისწინა ბოლო ვარჯიშიც გამართეს. საბედნიეროდ, სლოვაკეთში ჩასული ყველა ფეხბურთელი ჯანმრთელადაა.

- ქუთაისის "ტორპედო": 16-საათიანი მგზავრობა და ვარჯიში სლოვაკეთში [PHOTO]

გაურკვეველი მიზეზების გამო მატჩისწინა პრესკონფერენცია სლოვაკეთში არ ჩატარებულა. ქუთაისელთა მთავარ მწვრთნელ კახა ჩხეტიანს სლოვაკეთში დავუკავშირდით და მოახლოებულ მატჩთან დაკავშირებით კომენტარის გაკეთება ვთხოვეთ. მწვრთნელის თქმით, შანსები 50/50-ზეა, მისი გუნდის ყველა ფეხბურთელი კი თამაშისთვის მზადაა. ჩხეტიანმა სლოვაკური მხარის ცუდ მასპინძლობაზეც გაამახვილა ყურადღება.

- კახა ჩხეტიანი: სლოვაკები ცუდად გაგვიმასპინძლდნენ
- ევროთასები 2017/18. ჩვენ და სლოვაკები: აქაც უარყოფითი ბალანსი...

მომავალ მატჩთან დაკავშირებით კომენტარები "ტორპედოს" ფეხბურთელებმაც გააკეთეს:

გიორგი კუხიანიძე: "მეტოქე მეტ-ნაკლებად შევისწავლეთ. ვფიქრობ, რთული და დაძაბული მატჩი იქნება. შანსებს მაინც თანაბრად ვაფასებ. სტუმრად გატანა უნდა შევძლოთ, რაც საპასუხო თამაშში გამოგვადგება".

ბექა ტუღუში: "ურთულესი თამაში გვექნება, მაგრამ ჩვენ საბრძოლველად მზად ვართ. ყველამ თავი უნდა დავდოთ. შანსები 50/50-ზეა".

თორნიკე კაპანაძე: "ძალიან საპასუხისმგებლო თამაშია. მეტოქის არ გვეშინია. ვიმედოვნებ, ორი მატჩის ჯამში დადებით შედეგს მივაღწევთ და მომდევნო ეტაპზე გავალთ".

ანრი ჭიჭინაძე: "დაძაბული ბრძოლა იქნება. უნდა მოვინდომოთ, საკუთარი ძალის ვირწმუნოთ და შეხვედრა სასურველი შედეგით დავასრულოთ. შემდეგი თამაში ქუთაისშია და "ტრენჩინზე" ნაკლები შანსი ნამდვილად არ გვაქვს".

გრიგოლ დოლიძე: "საკუთარ შესაძლებლობებს თუ სრულად გამოვავლენთ, არ გაგვიჭირდება. "ტრენჩინი" ახალგაზრდული, მოძრავი გუნდია, მაგრამ დადებითი მხარეები ჩვენც გვაქვს და მგონია, რომ სასურველ შედეგს მივაღწევთ".

აქამდე "ტრენჩინი" ევროტურნირებზე მეზობელი "ჟილინას" სტადიონით სარგებლობდა, საკუთარ არენაზე თამაშის უფლება კი "ტორპედოსთან" დაპირისპირებამდე მოიპოვა. მეტოქე ახალგაზრდული და ინტერნაციონალური გუნდია. "ტრენჩინს" 12 ლეგიონერი ჰყავს. მათ შორისაა ქართველი გიორგი ბერიძე, რომელსაც იჯარა ახლახან გაუხანგრძლივეს.

- ბერიძის წინააღმდეგ - რა გუნდია ქუთაისის "ტორპედოს" მეტოქე "ტრენჩინი"

ქუთაისის ტორპედო
მეკარეები: 89 - როინ კვასხვაძე; 1 - მაქსიმე ქვილითაია; 12 - კახაბერ მეშველიანი;
მცველები: 2 - ვაჟა ტაბატაძე, 5 - დავით ხურცილავა, 3 - გურამ ადამაძე, 4 - ანრი ჭიჭინაძე, 17 - გიორგი გურული, 23 - გიორგი ქიმაძე, 25 - შალვა ბურჯანაძე;
ნახევარმცველები: 6 - ოლეგ მამასახლისი, 77 - მერაბ გიგაური, 8 - შოთა ბაბუნაშვილი, 30 - მათე კვირკვია, 80 - დავით ხურციძე, 22 - გრიგოლ დოლიძე, 88 - ბექა ტუღუში, 18 - ნიკო კვასხვაძე, 10 - გიორგი კუხიანიძე;
თავდამსხმელები: 9 - თორნიკე კაპანაძე, 99 - ლაშა კუჭუხიძე, 7 - გაბრიელ საღრიშვილი.