როდის აშენდება ბათუმში სტადიონი?

თბილისისა და ბათუმის დინამოელთა შეხვედრამ გამოაჩინა, რომ ბათუმელებს ურიგო გუნდი არ ჰყავთ, მაგრამ გამოცდილება აკლიათ და უმაღლეს ლიგაში ადგილის შესანარჩუნებლად გაძლიერება სჭირდებათ.

ჩვენ თანადგომა გვჭირდება
"რომელ გუნდსაც ბევრი ფული აქვს, მოახერხა და ძლიერი შემადგენლობა შეკრიბა. მაგალითად საჩხერის "ჩიხურა" აიღეთ: გუნდი პირველი ლიგიდან გადმოვიდა, მაგრამ ძალიან კარგი მოთამაშეები დაიმატა და აშკარად გაძლიერდა.

გაძლიერება ბათუმის "დინამოსაც" სჭირდება, მაგრამ ჯერ ბიუჯეტი ამის საშუალებას არ გვაძლევს.

ბევრი გამოუცდელი ახალგაზრდა გვყავს, რომელთაც დიდი შრომა და პრაქტიკა სჭირდებათ, უმაღლესი ლიგის გუნდებს კონკურენცია რომ გავუწიოთ. მხოლოდ ფიზიკური

მომზადების პრობლემას ვერ ვხედავ, ამით არავის ჩამოვრჩებით.

ახლა ლვოვის "კარპატის" მეკარე და თავდამსხმელი დაგვემატებიან და, იმედია, გაგვაძლიერებენ. მეტი ახალწვეული აღარ გვეყოლება.

ყველაფერს ფინანსები სჭირდება. მალე ახალი ბიუჯეტი დაგვიმტკიცდება და იმედია, სასურველი შემადგენლობის შეკრებას მერე მაინც მოვახერხებთ", - ამბობს ბათუმის "დინამოს" მწვრთნელთა კონსულტანტი გია გურული.

საუკეთესო შემთხვევაში, ბათუმის "დინამო" ქობულეთის სტადიონზე მეტოქეებს 15 სექტემბრის შემდეგ თუ მიიღებს. გურულს ესეც აწუხებს და სხვა სადარდებელიც გაგვიმხილა.

"ცხადია, ხელს ისიც გვიშლის, რომ საკუთარ სტადიონზე ვერ ვთამაშობთ. გამიხარდა, ზესტაფონში თბილისის "დინამოსთან" შეხვედრაზე ბევრი მაყურებელი რომ ჩამოვიდა და ემოციურად გვიჭერდა მხარს.

მაგრამ საკუთარ სტადიონზე ან ქობულეთში ბევრად მეტი გულშემატკივარი მოვიდოდა და ეს სადავო არც არის. საკუთარი ტრიბუნების მხარდაჭერას ჯერ მოკლებულები ვართ.

გვითხრეს, რომ ქობულეთში სტადიონზე აუცილებელი სამუშაოები 15 სექტემბერს დასრულდებაო. ვნახოთ. აჭარაში მეშვიდე ტურში თუ ვითამაშებთ, როდესაც ბევრი რამ გარკვეული იქნება.

სამწუხაროდ, დახმარების ნაცვლად, ბევრს ჩვენი ჩაძირვა სურს. ვლაპარაკობთ, ერთმანეთს მხარში დავუდგეთო, მაგრამ რად გინდა...

ყველას მივმართეთ თხოვნით, რომ ამ პერიოდში მის სტადიონზე გაგვეცვალა ქობულეთში დაგეგმილი საშინაო შეხვედრები, მაგრამ მხოლოდ ბოლნისის "სიონი" დაგვთანხმდა.

ცალკე სალაპარაკო არის ის, რაც მოედანზე ხდება. როდესაც ჩემი მოთამაშეები დაშავდნენ, თბილისის "დინამომ" თამაში არ გააჩერა. მე კი ასეთ რამეს ფეხბურთელებს კატეგორიულად ვუკრძალავ.

მსაჯობას რაც შეეხება, ამ თემაზე არაფერს ვლაპარაკობ, მაგრამ თუ ბოლო ტურში რაიმე შეცდომა მოუვიდათ, ყველამ საკუთარ თავს დააბრალოს".

ისევ სტადიონზე
კიდევ ერთი პრობლემა, რაც ბათუმის "დინამოს" და მთელ ჩვენს საფეხბურთო სამყაროს აწუხებს: რაც უნდა უცნაური იყოს, საქართველოს ერთ-ერთ გამორჩეულ საფეხბურთო კუთხეში დღეისათვის ერთი სტადიონიც ვერ აკმაყოფილებს უმაღლესი ლიგის მოთხოვნებს და ბათუმელები თამაშებს... ზესტაფონში მასპინძლობენ.

ასლან აბაშიძემ ბათუმში მშვენიერი სტადიონი კი ააშენა, რომელიც ერთი ხანობა უეფას მოთხოვნების შესაფერისი ერთადერთი საფეხბურთო არენა იყო საქართველოში, მაგრამ დასავლეთ ტრიბუნა უხარისხოდ აშენდა, გასახდელებში წყალი ჩადიოდა, დაანგრიეს და ხელახლა წამოჭიმვა დააპირეს. 2006 წელს კი ახლის აშენების იმედად მთლიანად დაანგრიეს და მის ადგილზე ბულვარი დააგრძელეს.

მერე ზედ "დინამოს" სავარჯიშო მოედანიც (ე.წ ბე-ენ-ზეს სტადიონი) მიაყოლეს და ადგილობრივი გუნდები ანგისას, ადელისა და ქობულეთის სტადიონების იმედად დარჩნენ.

დღემდე მთელი საქართველოს საფეხბურთო სამყარო ელის, როდის დაიწყება მრავალტენდერგამოცხადებული ბათუმის სტადიონის მშენებლობა. სამწუხაროდ, უამრავი დაპირების, პროექტისა და იმედის მიუხედავად, 2006 წლიდან დღემდე, ეს საფეხბურთო კუთხე სტანდარტული სტადიონის გარეშეა დარჩენილი.

ბათუმს ვინ ჩივის, "დინამო" სტუმრებს ქობულეთშიც ვერ იღებს. "შუქურას" სტადიონზე ძველი, ბუნებრივი მოედანი აიღეს და ხელოვნური საფარი დააგეს, მაგრამ ჯერ არც კეთილმოწყობილი ტრიბუნებია და არც გასახდელები. არადა, ფეხბურთის ფედერაცია უმაღლესი ლიგის მატჩების ჩატარების ლიცენზიას მინიმალური მოთხოვნების დაკმაყოფილების შემთხვევაშიც გასცემს.

უცნაურია, რომ სტადიონების რეკონსტრუქცია ხშირად სეზონის დაწყებას ემთხვევა და არა დასრულებას. ასე მოხდა ფოთში, გორში, ახლა უკვე ქობულეთსა და ლანჩხუთში. გაუგებარია, სეზონის დაწყებამდე რას ველოდებით.

სამი წლის წინ, ჰოლანდიელების მონაწილეობით, შედგა მაკეტი, რომ ბათუმის გარეუბანში, ანგისის დასახლებაში, 12 ათას მაყურებელზე გათვლილ სტადიონთან ერთად, 8 ჰექტარზე სავარჯიშო მოედანი, სავაჭრო ცენტრი და 100-ნომრიანი სასტუმრო კომპლექსი 2011 წელს წამოიჭიმებოდა, მაგრამ პროექტი ღირებულების გამო (40 მილიონი დოლარი) დაიწუნეს.

იყო დაპირება, რომ ქობულეთის სტადიონი ზაფხულში განახლდებოდა, ბათუმში კი ოლიმპიური სტადიონის მშენებლობა 2012 წელს დაიწყებოდა.

დრო გადის და ჯერ ამ ძვირად ღირებული პროექტის განხორციელება არ დაწყებულა. ქობულეთშიც მინიმალური მოთხოვნების დაკმაყოფილებას და გასახდელების აშენებას დიდი დრო არ სჭირდება. არადა, საქმე ადგილიდან ვერ დაიძრა - როდის მოესწრება ქობულეთის სტადიონის განახლება?

ამ კითხვით ბათუმის "დინამოს" დირექტორს, სულხან გოგიბერიძეს მივმართეთ.

"სტადიონის რეკონსტრუქცია დაწყებულია, მაგრამ მასზე სახელმწიფოს თანხა იხარჯება და საამისოდ გარკვეული პროცედურების დაცვა აუცილებელია.

ლაპარაკია ტენდერზე, რომელიც სწრაფად ვერ ჩატარდება. მაგალითად, პროექტირების ტენდერი ორჯერ ჩაიშალა, მაგრამ მშენებლები დაგვპირდნენ, რომ სტადიონი 15 სექტემბრისთვის მზად იქნება, მაქსიმუმ, სექტემბრის ბოლოსთვის", - ამბობს გოგიბერიძე.

აჭარაში ბევრი ცნობილი ფეხბურთელი გაიზარდა - რევაზ ჩელებაძე, ვახტანგ ქორიძე, მალხაზ მახარაძე, ალექსანდრე კანტიძე (ჭაბუკთა შორის ევროპის ჩემპიონი), გელა შეყილაძე, პაატა მაჭუტაძე, ლევან ხომერიკი, შალვა აფხაზავა, კახა მჟავანაძე, ჯანო ანანიძე, გუჯა რუხაია.

სტადიონის აშენებამდე უნდა შევეგუოთ, რომ ამ რეგიონის პოტენციალი სრული დატვირთვით ვერ ამოქმედდება. მხოლოდ იმედს ვიტოვებთ, რომ ასე დიდხანს არ გაგრძელდება.

ყოველდღიური სპორტული გაზეთი "ლელო"

ასევე იხილეთ:
ბათუმის "დინამო" უკრაინელ ფეხბურთელებს იმატებს
ბათუმის "დინამოს" ბიუჯეტს გაუორმაგებენ?
აჭარაში ორი ახალი სტადიონი აშენდება
ბათუმის "დინამოს" ლვოვის "კარპატის" მეპატრონე, უკრაინელი მილიარდერი ყიდულობს