ფოტოზე: გიორგი ნიჟარაძე, ირაკლი ღარიბაშვილი და ტარიელ ხეჩიკაშვილისაქართველოს ნაკრები 19 სექტემბრიდან მსოფლიოს თასის გათამაშებაში ჩაერთვება, რომელიც ერთი დღით ადრე სტარტს ინგლისში აიღებს. "ბორჯღალოსნები" ამჟამად "ნისლიან ალბიონზე" იმყოფებიან და მსოფლიოს რაგბის უდიდეს ფორუმზე ასპარეზობისთვის ემზადებიან.
იქამდე კი ჩვენმა ეროვნულმა გუნდმა თბილისსა და პოლონეთში მზადების ორი ფაზა გაიარა. საქართველოს ნაკრების მზადებისა და სამსოფლიო გეგმების შესახებ რაგბის კავშირის პრეზიდენტს, გიორგი ნიჟარაძეს ვესაუბრეთ, რომელმაც დასაწყისში საფუძვლიანი წყენა გამოხატა, რომელიც, სავარაუდოდ, მხოლოდ მის მიერ აღქმული და განცდილი არაა.
- ძალიან სამწუხაროა, რომ მედიის მხრიდან
მაინტერესებს, რამდენი ნაკრები გუნდი მიდის საქართველოდან მსოფლიოს თასზე საასპარეზოდ. ბოლოს და ბოლოს, პატივი სცენ გულშემატკივრებს, რათა დააკმაყოფილონ ინფორმაციული შიმშილი, რომელიც მათ გააჩნიათ. ცხადია, ეს ყველა მედიასაშუალებას არ ეხება, მაგრამ, ვფიქრობთ, რომ ეს საკმარისი არ არის.
- საქართველოს ნაკრებს წინ თავის ისტორიაში უმნიშვნელოვანესი შეჯიბრება ელის. როგორც უკვე თქვით, "ბორჯღალოსნები" მსოფლიოს თასზე უკვე მეოთხედ იასპარეზებენ. ჩვენი გუნდისგან ქომაგებიც და სპეციალისტებიც მეტს ელიან, ვიდრე აქამდე. გვიამბეთ, როგორ ემზადება ეროვნული ნაკრების ინგლისში საასპარეზოდ?
- მზადება წელწადნახევრის წინათ დაიწყო. ნაკრების მწვრთნელთა შტაბს მაშინ ფიზმომზადებაში მაღალი დონის სპეციალისტი კრეიგ ვაითი ეხმარებოდა. სწორედ იმ პერიოდში დაიგეგმა დეტალურად, თუ როგორ უნდა მომზადებულიყო ჩვენი გუნდი მსოფლიოს თასისთვის. გეგმა იყო დაწვრილებით გაწერილი, იქამდეც კი, რომ იცოდნენ, თითოეულ დღეს რა უნდა ეკეთებინათ.
"ბორჯღალოსნებმა" გაიარეს მზადების ორი ფაზა. პირველ ეტაპზე სამი კვირის განმავლობაში "შევარდენის სანაკრებო ბაზაზე" დრო ფიზიკური კონდიციების გაუმჯობესებას დაეთმო. ვფიქრობ, ჩვენმა არჩევანმა გაამართლა. ინგლისელი სპეციალისტი კელვინ მორისი მაღალი დონის პროფესიონალია. ის მსოფლიოს თასის ორ გათამაშებაში ინგლისის ნაკრების ფიზმომზადების მწვრთნელის ასისტენტი იყო.
ვარჯიშებზე იყო ზეინტენსიური დატვირთვები. თუმცა, ეს საკმაოდ ხალისიანად, თამაშ-თამაშ ხდებოდა. კარგად იყო დაგეგმილი დასვენება-აღდგენითი პროცესი. სამკვირიანი მზადების შემდეგ გუნდმა ერთი კვირა დაისვენა. მერე იყო კიროთერაპია პოლონეთში.
ამჟამად გუნდი ინგლისშია, სადაც სამ საკონტროლო მატჩს გამართავს: ინგლისის პრემიერშიპის გუნდ "ნიუკასლ ფალკონზთან", ასევე კანადისა და იაპონიის ნაკრებებთან.
ამდენად, ამ ეტაპზე მზადების პროცესით კმაყოფილნი ვართ. თუმცა, ისიც ცხადია, მარტო ფიზიკური მომზადებით შორს ვერ წავალთ. ყველაფერი მსოფლიოს თასზე გამოჩნდება და საბოლოო შეფასებასაც ამის მერე გავაკეთებთ, რამდენად სწორად და ნაყოფიერად იმუშავეს მწვრთნელებმა.
- დროის ამ მონაკვეთში რაიმე სერიოზული დაბრკოლება ხომ არ შექმნილა?
- სერიოზული არაფერი მომხდარა. რამდენიმე მოთამაშეს ტრავმა აწუხებდა, მაგრამ ნაკრების სამედიცინო შტაბმა შესანიშნავად იმუშავა. ყველა, ვინც გაფართოებულ შემადგენლობაში იყო, ამჟამად სრულიად განკურნებულია.
- მზადების მეორე ეტაპი, რომელიც ორად იყო დაყოფილი, საქართველოს ნაკრებმა პოლონეთში გაიარა. იქ ჩვენმა მორაგბეებმა კიროთერაპია გაიარეს, რაც იაფი სიამოვნება ნამდვილად არაა. მთლიანად მზადების პროცესიც, სავარაუდოდ, საკმაოდ დიდ თანხებთან იქნებოდა დაკავშირებული. შეგიძლიათ გვითხრათ, რა რაოდენობის თანხა დაიხარჯა და ვინ გაიღო ის?
- როგორც უკვე გითხარით, მზადება წელწადნახევრის წინათ დაიწყო, როცა საქართველოში მოთამაშე ნაკრების მორაგბეებისთვის მზადების სპეციალური პროგრამა შეიქმნა. მთელი ამ დროის განმავლობაში 2 მილიონი ლარი დაიხარჯა. ცხადია, ეს უპრეცედენტო ფაქტია. ხარჯი მთლიანად სახელმწიფომ გაიღო.
სიამაყით შეიძლება ვთქვა, რომ საქართველოს ნაკრებს ზუსტად ისეთივე მაღალი დონის პირობები ჰქონდა მოსამზადებლად, როგორიც ახალ ზელანდიას, არგენტინას, ავსტრალიას და სხვა ელიტურ გუნდებს.
ჩვენს ნაკრებს ჰქონდა თანამედროვე სამეცნიერო სისტემაზე დამყარებული სამედიცინო მომსახურება, კვება, უცხოელი მაღალკვალიფიციური სპეციალისტების კონსულტაციები და ბევრი სხვა აუცილებელი ატრიბუტი.
- საინტერესოა, რას ემსახურება ყოველივე ეს?
- იმას, რომ საქართველოს ეროვნულმა ნაკრებმა ინგლისში გასამართავ მსოფლიოს თასზე აჩვენოს მაქსიმალური შედეგი და ითამაშოს თვისობრივად განსხვავებული რაგბი, როგორიც აქამდე არ უთამაშია.
ქომაგებმა იციან, რომ ჯგუფურ ტურნირზე ოთხი თამაში გვაქვს გასამართავი. პირველი მეტოქე ტონგას ნაკრებია, რომელიც, რატომღაც, არაადეკვატურადაა აღქმული. ეს გუნდი ობიექტურად ჩვენზე ძლიერია. არ უნდა დაგვავიწყდეს, რომელ გუნდებში ასპარეზობენ ტონგელი მორაგბეები, სად იმყოფება ეს გუნდი მსოფლიოს კლასიფიკაციაში. ისინი თითქმის ყველანი ახალზელანდიელები არიან, რომლებიც "ოლ ბლექსის" შემადგენლობაში ვერ მოხვდნენ.
თუმცა ეს არ ნიშნავს, რომ მათთან თამაშში შანსი არ გვაქვს. უბრალოდ, ბევრი გარემოება უნდა დაემთხვეს ერთმანეთს, მათ შორის, იღბალიც, რომ მეტოქე დავამარცხოთ. ერთი ვიცი, საამისოდ ჩვენი ბიჭები ყველაფერს გააკეთებენ.
- ერთი მნიშვნელოვანი დეტალი - ცნობილია, რომ სხვადასხვა ქვეყნის წარმომადგენელ არბიტრებს მსაჯობის განსხვავებული სტილი აქვთ. ტონგასთან ჩვენი ნაკრების მატჩს მსოფლიოს ერთ-ერთი საუკეთესო რეფერი, უელსელი ნაიჯელ ოუენსი განსჯის. თუ აქვთ ნაკრების მწვრთნელებს შესწავლილი მისი მსაჯობის სტილი?
- ინგლისის შეკრებაზე ნაკრებს ეწვევა ირლანდიის რაგბის კავშირის მსაჯთა კომიტეტის წევრი, ერთ-ერთი საუკეთესო ირლანდიელი სპეციალისტი, რომელიც მწვრთნელებს ოთხივე მატჩის მსაჯობის სტილის შესწავლაში დაეხმარება. ცხადია, ნაიჯელ ოუენსზე ბევრი რამ იქნება დამოკიდებული. კარგად გვახსოვს, ოთხი წლის წინანდელ მსოფლიოს თასზე მსაჯების სერიოზული შეცდომების მსხვერპლნი როგორ გავხდით. იმედი გვაქვს, რომ მსაჯობის ხარისხი ამჟამად გაცილებით კარგი იქნება.
- ჯგუფურ ტურნირში მეორე თამაში არგენტინის ნაკრებთან გვაქვს...
- არგენტინის ნაკრები დღესდღეობით მსოფლიოს რეიტინგში მე-8 გუნდია. ის მუდმივად პროგრესირებს და ელიტაში დიდი ხანია დაიმკვიდრა ადგილი. არგენტინელები ყოველწლიურად ეთამაშებიან ახალი ზელანდიის, ავსტრალიისა და სამხრეთ აფრიკის ნაკრებებს. ამათგან ბოლო ორს თითოჯერ მოუგო კიდეც. 2007 წლის მსოფლიოს თასზე "პუმებმა" მესამე ადგილი დაიკავეს. ყოველივე აქედან გამომდინარე, ნათელია, რა დონის გუნდთან გვაქვს საქმე.
თუ პირველ მატჩში ტონგასთან გამარჯვებას მივაღწევთ, ვფიქრობ, არგენტინასთან სერიოზული ბრძოლა გვექნება. მათი თამაშის სტილს ვიცნობთ. მსოფლიოს თასზე ორჯერ ვეთამაშეთ. გვქონდა ტესტი ბუენოს აირესში. დარწმუნებული ვარ, ღირსეულად ვეთამაშებით.
- ახალი ზელანდიის ნაკრებთან თამაში ჩვენი რაგბისთვის მოვლენაა...
- ახალი ზელანდიის ნაკრების წინააღმდეგ თამაში ნებისმიერი მორაგბის ოცნებაა. ვინც რაგბი იცის, ესმის, რომ მოგების შანსი არ გვაქვს. თუმცა ჩვენი ბიჭების მოტივაცია ის იქნება, რომ ახალზელანდიელებს და მსოფლიოს დაუმტკიცონ, რომ რაგბის თამაში იციან და მსოფლიოს თასზე შემთხვევით არ მოხვდნენ.
დარწმუნებული ვარ, ეს იქნება ჩვენი გუნდის საუკეთესო თამაში. ამასთან ერთად, თითოეული ჩვენი მორაგბისთვის ეს იქნება უდიდესი გამოცდილება, რომელსაც მომავალ კარიერაში გამოიყენებენ.
- მეოთხე მეტოქე, ნამიბიის ნაკრები, ის გუნდია, რომელსაც, წესით, აუცილებლად უნდა მოვუგოთ...
- არ მიმაჩნია სწორად, როცა რომელიმე გუნდს უდიერად ექცევიან და გამარჯვება წინასწარ დაბევებული ჰგონიათ. ამ გუნდთან მოგებული მაშინ ვიქნებით, თამაში რომ დამთავრდება და ტაბლოზე ჩვენთვის სასარგებლო ანგარიში იქნება დაფიქსირებული. ნამიბია ძალიან კარგი გუნდია და ისიც გასათვალისწინებელია, რომ მასთან თამაში ჯგუფში ბოლოს გვიწევს. ამიტომ ძალთა 100-პროცენტიანი კონცენტრაცია დაგვჭირდება ნამიბიელთა დასამარცხებლად.
- ოფიციალურადაა გამოცხადებული, რომ საქართველოს ნაკრების 31-კაციანი შემადგენლობა, რომლითაც ჩვენი გუნდი მსოფლიოს თასზე წარდგება, 1-ელ სექტემბერს გამოცხადდება. რატომ ასე გვიან?
- პირველი მიზეზი ისაა, რომ ოფიციალურად გვაქვს ვადა 31 აგვისტომდე. მერე იქამდე, 28 აგვისტოს, ჩვენს ნაკრებს აქვს საკონტროლო თამაში "ნიუკასლ ფალკონზთან". მწვრთნელები კიდევ ერთხელ შეხედავენ, შეამოწმებენ მოთამაშეებს და საბოლოო გადაწყვეტილებას სწორედ ამის მერე მიიღებენ. ასე სწორედ მათ გადაწყვიტეს. თუმცა, ვინც ნაკრების გასაცილებლად აეროპორტში მივიდა, თავად იხილა, რა შემადგენლობით გაემგზავრა ნაკრები.
ცხადია, გაჩნდება კითხვები, რატომ ვერ მოხვდა კონკრეტული მორაგბე საბოლოო განაცხადში. ერთი შემიძლია თამამად ვთქვა: ნებისმიერი გადაწყვეტილება არის მწვრთნელთა შტაბის დიდი და სერიოზული განსჯის შედეგი. ამასთან ერთად, ის შვიდი მორაგბე, რომელიც გუნდში ვერ მოხვდება, სრულ მზადყოფნაში უნდა იყოს, რათა თუ ვინმე ტრავმას მიიღებს, ჩაენაცვლოს.
მინდა მივმართო გულშემატკივრებს, მათი მხარდაჭერა, თუნდაც საქართველოდან, ძალიან მნიშვნელოვანია. აღარაფერს ვამბობ მათზე, ვინც ინგლისში გაემგზავრება. დიდი მადლობა მინდა გადავუხადო იმათ, ვინც მთელი ამ დროის განმავლობაში გვეხმარებოდა. სახელმწიფოს, საქველმოქმედო ფონდ "ქართუს" და "კავკაზუსის" გვერდში დგომამ ქართულ რაგბის დიდი სამსახური გაუწია.
(იბეჭდება მცირე ცვლილებით)
ყოველდღიური სპორტული გაზეთი "ლელო"
