18 მაისს პირველად მოხდება, რომ დავით ყიფიანის სახელობის საქართველოს თასის ფინალს ქვეყნის დედაქალაქი არ უმასპინძლებს. როგორც ვწერდით, თამაშისთვის ემზადებიან გულშემატკივრებიც. სრული მობილიზაციაა თბილისის "დინამოს" ყველა ფანდაჯგუფებაში. ცხადია, "რამაზ შენგელიაზე" ბოლნისელთა ქომაგებიც იქნებიან. "სიონის" გულშემატკივრებისთვის ადგილობრივმა ხელისუფლებამ სპეციალურად იქირავა ტრანსპორტი და ხალხი ქუთაისის მიმართულებით ბოლნისის თამაზ სტეფანიას სახელობის სტადიონიდან გავიდა. ისინი თეთრი მაისურებით შეიმოსებიან.
ასე რომ, დაპირისპირების შედეგი, მოედნის გარდა, ქომაგებზეც იქნება დამოკიდებული.
ცნობილი ტელეკომენტატორი და სპორტული ჟურნალისტი ლევან სალუქვაძე ამბობს,
"ფეხბურთის განვითარებაზე რომ ვლაპარაკობთ, ხშირად გვავიწყდება, რომ ეს სხვისი გასაკეთებელი არ არის, თითოეული ჩვენგანის ვალი და, გარკვეულწილად, მოვალეობაცაა. გასაგებია, რომ ესპანეთის, ინგლისის, გერმანიის, იტალიის ჩემპიონატები ბევრად უკეთესი სანახავია, მაგრამ ჩვენთანაც ბევრი კარგი თამაში ტარდება, რომელზეც ხალხს წარმოდგენა არ აქვს.
მე დავესწრები საქართველოს თასის ფინალს, რადგან ეს ჩემს ვალად მიმაჩნია და ხალხსაც იმავეს მოვუწოდებ: წავიდეთ ქუთაისში და ვუქომაგოთ ქართულ ფეხბურთს. სტადიონზე ჩვენ თუ არ მივალთ, ტრიბუნებს უცხოელები არ შეავსებენ", - ამბობს სალუქვაძე.
აღსანიშნავია, რომ ფინალს საქართველოს პრეზიდენტი გიორგი მარგველაშვილიც დაესწრება. უცნობია, იქნება თუ არა ქუთაისში პრემიერი გიორგი კვირიკაშვილი.
სწორედ პრეზიდენტის, პრემიერისა თუ სხვა სახელმწიფო ფიგურების დამოკიდებულება უნდა იყოს რიგითი გულშემატკივრისთვის მაგალითი, რომ სახელმწიფო ფეხბურთზე ზრუნავს. თორემ, ისიც გვახსოვს, ფინალის გამარჯვებულს თასი, სფფ-ის პრეზიდენტთან ერთად, სახელმწიფო კანცელარიის თანამშრომელმა რომ გადასცა...
ცხადია, ფინალისთვის ემზადება რამაზ შენგელიას სახელობის სტადიონიც, სადაც საზეიმო ღონისძიებები და შოუც იგეგმება, მაგრამ იმედია, მთავარ შოუს 19 საათიდან მწვანე მინდორზე ვიხილავთ...
(იბეჭდება მცირე ცვლილებით)
ყოველდღიური სპორტული გაზეთი "ლელო"
