დორტმუნდის "ბორუსიას" გულშემატკივრებს "სპაიდერმენი" შეუყვარდათ

რობერტ ლევანდოვსკი დორტმუნდის "ბორუსიას" შეუერთდა და ახალი სეზონისთვის მზადებას შეუდგა, მაგრამ 24 წლის პოლონელი თავდამსხმელი დორტმუნდის პუბლიკის ერთ-ერთი უსაყვარლესი ფეხბურთელის სტატუსს ნელ-ნელა კარგავს.

არა მარტო იმიტომ, რომ "ბაიერნში" გადასვლა უნდოდა (არ გაუშვეს), არამედ იმიტომაც, რომ "ბორუსიას" ფანები ახლა "სენტ ეტიენიდან" გადაბირებული ფორვარდით, პიერ-ემერიკ ობამეიანით არიან აღფრთოვანებულები.

ეს უკანასკნელიც 24 წლისაა და დორტმუნდელებს მისი ტრანსფერი 13 მილიონი ევრო დაუჯდათ.

სეზონის გახსნის ღონისძიებას "ბორუსიას" 50 000 (!) ფანი დაესწრო და დორტმუნდის ქომაგები სწორედ ობამეიანის მეტსახელს, "სპაიდერმენს" სკანდირებდნენ. ეს მეტსახელი გაბონელს იმიტომ შეარქვეს, რომ საფრანგეთში გოლი ერთხელ სწორედ "სპაიდერმენის" ნიღბით იზეიმა.

"ვიცოდი, რომ დორტმუნდის "ბორუსია" ძალიან დიდი გუნდია, მაგრამ ასეთ დახვედრას და ამგვარ ატმოსფეროს მაინც არ მოველოდი. კიდევ ერთხელ დავრწმუნდი, რომ აქ გადმოსვლით იდეალური ნაბიჯი გადავდგი. იმედი მაქვს, რომ ქომაგებს ძალიან ბევრჯერ გავახარებ", - უთხრა ობამეიანმა ჩვენს გერმანელ კოლეგებს.

"დორტმუნდის" შეფებმა მისი შეძენით ძალიან ჭკვიანური, დროული და რაც მთავარია, შორს გამიზნული გადაწყვეტილება მიიღეს, რადგან ობამეიანი პირდაპირ ლევანდოვსკის კონკურენტია და ეს იმას ნიშნავს, რომ პოლონელი, რომელსაც "ბაიერნში" გადასვლა სურდა, მაგრამ "ბორუსიაში" დატოვეს, თავს მშვიდად ვერ იგრძნობს.

გამოდის, რომ ახლა "ბორუსიას" თავკაცი იურგენ კლოპიც იდეალურ სიტუაციაშია, რადგან როტაციის საშუალებაც მიეცემა და მხოლოდ ლევანდოვსკის ხასიათზეც აღარ იქნება დამოკიდებული - თანაც, დიდი შანსია, რომ რაკი მიუნხენში გადაბარგება აუკრძალეს, რობერტი ხშირად იყოს უხასიათოდ.

გამორიცხული არც ისაა, რომ ლევანდოვსკიმ "დორტმუნდის" ძირითად შემადგენლობაში ადგილი დაკარგოს. "ბორუსიას" კაპიტანმა სებასტიან კელმა თქვა, რობერტს ამ დღეებში დაველაპარაკები - იმედი მაქვს, რომ "დორტმუნდში" ძველებურად დაიხარჯებაო. კლოპს პოლონელი გოლეადორის მოდუნების საერთოდ არ ეშინია, თავად ლევანდოვსკი კი ჯერჯერობით დუმს...

ყოველდღიური სპორტული გაზეთი "ლელო"

ასევე იხილეთ:
გაიცანით "დორტმუნდის" ახალწვეული: ჭკუამხიარული სპაიდერმენი