მიუნხენის "ბაიერნი": არიენ რობენი "პორტუსთან" არ იქნება

მიუნხენის "ბაიერნის" ნახევარმცველმა არიენ რობენმა დაწვრილებითი სამედიცინო შემოწმება გაიარა, რის შემდეგაც დადგინდა მისი მოედანზე დაბრუნების სავარაუდო თარიღი. როგორც გერმანული პრესა წერს, 31 წლის ჰოლანდიელი მინიმუმ ექვსი კვირა ვერ შეძლებს თამაშს.

ასე რომ, რობენი გამოტოვებს არა მხოლოდ უახლოეს ორ სანაკრებო შეხვედრას, არამედ ვერ დაეხმარება "ბაიერნს" "პორტუსთან" ჩემპიონთა ლიგის ორივე მეოთხედფინალურ მატჩში.

შეგახსენებთ, რომ ბუნდესლიგის ბოლო ტურში მიონხენგლადბახის "ბორუსიას" წინააღმდეგ რობენმა მუცლის კუნთი გაიწყვიტა.

* * *
ამასობაში, გავრცელდა ჭორები "ბაიერნის" სატრანსფერო პრიორიტეტების შესახებ. როგორც გამოცემა Daily Express-ი საკუთარ წყაროზე დაყრდნობით წერს, რეკორდმაისტერი დაინტერესდა "ტორინოსა" და იტალიის ნაკრების 25 წლის მცველით, მატეო დარმიანით, რომელსაც, ასევე, "მანჩესტერ იუნაიტედი" ეპატიჟება. მიმდინარე სეზონში დარმიანიმ ყველა ტურნირზე 38 მატჩი ჩაატარა და ოთხი გოლითა და სამი შედეგიანი პასით გამოიჩინა თავი.

გარდა ამისა, "ბაიერნის" ინტერესთა სფეროში მოექცა "ჩელსის" განაპირა მცველი ბრანისლავ ივანოვიჩი. პეპ გვარდიოლას გუნდი 31 წლის სერბის შეძენას უახლოესი სატრანსფერო ბაზრის პერიოდში ეცდება. ამ სეზონში ივანოვიჩის მონაგარია ექვსი გოლი და ოთხი შედეგიანი პასი (40 მატჩში).

ყოველდღიური სპორტული გაზეთი "ლელო"