"ლივერპული": იურგენ კლოპი ჯერ ცხრილავს

"ლივერპულის" მთავარი მწვრთნელი იურგენ კლოპი ამბობს, რომ მარიო ბალოტელიმ ახალი გუნდი უნდა მოძებნოს. ბალო "მილანში" იყო განათხოვრებული, მაგრამ "როსონერიში" მისი მიბრუნება წარუმატებელი გამოდგა და მშვენივრად მოგეხსენებათ, რომ მას ძალიან რთული პერიოდი უდგას, რომელიც ერთობ გაუგრძელდა.

არადა, იტალიელი ჯერ მხოლოდ 25 წლისაა და სანამ დრო კიდევ გაუფლანგავს საკუთარი თავი ხელში უნდა აიყვანოს და ის უდიდესი პოტენციალი, რომელიც უდავოდ გააჩნია, როგორმე უნდა გამოავლინოს. ოღონდ, ზუსტად ვიცით, რომ ეს "ენფილდზე" აღარ მოხდება, რადგან "კლოპო" მასთან თანამშრომლობით დაინტერესებული არ არის.

"მას კარიერაში ახლა ისეთი მომენტი არ უდგას, რომ 4-5 ფეხბურთელს გაუწიოს კონკურენცია ძირითადში ერთი ან ორი ადგილისთვის. შესაბამისად, ჩვენ გვჭირდება გამოსავალი. არაერთი გუნდი იქნება, რომელიც დიდი სიხარულით მიიღებს ახალ მარიო ბალოტელის, რომელსაც ძალიან ბევრი შეუძლია. იგი ვარჯიშებზე უმაღლესი კლასის ფეხბურთელი იყო, თამაშების დროს კი რაღაც არ გამოდიოდა. მისი ნიჭში ეჭვი არავის ეპარება და თავისი თამაში ახლა თავად მარიომ უნდა დაალაგოს" - განაცხადა კლოპმა.

ბარემ ისიც აღვნიშნოთ, რომ გერმანელის თქმით, კლუბი უახლოეს მომავალში მიიღებს გადაწყვეტილებას ჯო ალენის თაობაზე. უელსელს კლუბთან ერთწლიანი კონტრაქტი დარჩა და მხარეები ჯერ ბოლომდე ვერ ჩამოყალიბდნენ, სურთ თუ არა თანამშრომლობის გაგრძელება და რამდენად უღირთ ეს.

ამასობაში, "ენფილდი" დატოვა მარტინ შკრტელმა. სლოვაკეთის ნაკრების 31 წლის კაპიტანი კარიერას თურქულ "ფენერბაჰჩეში" გააგრძელებს. შკრტელს "ლივერპულში" 319 მატჩი აქვს ჩატარებული და გუნდთან განშორება ადვილი არ გახლდათ, მაგრამ კლოპი რომ ცვლილებებს მოახდენდა და კიდევ მოახდენს, ცხადია.

წასვლამდე შკრტელმა მობოდიშება მოასწრო იმის გამო, რომ ჰერ იურგენი სოციალურ ქსელში უხამსი სიტყვით შემოელანძღა. როგორც ინგლისურ პრესაში იწერებიან, "ფენერმა" ამ ტრანსფერში 5 მილიონი გირვანქა გადაიხადა.

ყოველდღიური სპორტული გაზეთი "ლელო"