"ლილიდან" წამოსული მიკელ ლანდრო უგუნდოდ დიდხანს არ ყოფილა - 33 წლის კიპერმა "ბასტიასთან" 6-თვიანი კონტრაქტი გააფორმა და კორსიკულ გუნდს სეზონის ბოლომდე დაეხმარება. შეგახსენებთ, რომ ლანდრომ, რომელსაც საფრანგეთის ნაკრებში 11 მატჩი აქვს ჩატარებული, "ლილთან" კონტრაქტი 6 დეკემბერს გაწყვიტა.
"გვინდა, ჩვენს გუნდში მიკელ ლანდროს ჩარიცხვის შესახებ გამცნოთ. კონტრაქტი მომავალ კვირას გაფორმდება, ფეხბურთელის პრეზენტაცია კი 31 დეკემბერს შედგება" - წერია "ბასტიას" ოფიციალურ საიტზე.
კორსიკული კლუბი სატურნირო ცხრილში მე-13 პოზიციას იკავებს და გასავარდნ ზონაში მყოფ "სოშოს" 6 ქულით უსწრებს.
ყოველდღიური სპორტული გაზეთი "ლელო"
