ტრანსფერ ONLINE: 18 ივლისის ტრანსფერები და ჭორები

ორშაბათს ევროპაში მორიგი ტრანსფერები გაიჩარხა და ზოგიერთის განხორციელებაში წინსვლაც შეიმჩნევა.

მადრიდულმა "ატლეტიკომ" ახალი ხორვატი წარადგინა; ჟოზე მოურინიო საბოლოოდ ჩამოყალიბდა, ვინ გაყიდოს "მანჩესტერმა". "განსაკუთრებულმა" მხოლოდ ერთ ფეხბურთელზე შეიცვალა აზრი და ის მარუან ფელაინია.

ამასობაში დიამეტრულად განსხვავებული ვერსიები ვრცელდება გონსალო იგუაინისა და დიეგო კოშტას სავარაუდო ტრანსფერებზე. წარმოიდგინეთ, არის თურმე შანსი ალვარო მორატას იტალიაში დაბრუნების, ოღონდ "იუვენტუსში" არა...

პირველ რიგში, ჩამოვთვლით იმ ტრანსფერებს, რომლებიც გუშინ ოფიციალურად გაიჩარხა და მათზე უფრო ჩაღრმავება არ ღირს: "აიაქსის" მცველმა რიკარდო ვან რეინმა 3-წლიანი კონტრაქტი გააფორმა "ბრიუგესთან"; მარტინ ჰარნიკი თავისუფალი აგენტის სტატუსით შეემატა "ჰანოვერს"; უგო ალმეიდამ 2-წლიანი კონტრაქტი გააფორმა თემურ ქეცბაიას გუნდ ათენის აეკ-თან; პიტერ ოდემვინგიე "ჰალშია"...

ჟოზე მოურინიომ "მანჩესტერ იუნაიტედში" რამდენიმე ვარჯიში და ერთი ამხანაგური მატჩი ჩაატარა. ეს დრო საკმარისი აღმოჩნდა "განსაკუთრებულისთვის", რომ კარგად ჩამოყალიბებულიყო, რომელი ფეხბურთელები სჭირდება "მანჩესტერში" და ვის მოუწევს სხვაგან წასვლა.

Daily Record-ი წერს, რომ პორტუგალიელი თავკაცი გაყიდის: დეილი ბლინდს, მარკოს როხოს, ბასტიან შვაინშტაიგერსა და, რა თქმა უნდა, ხუან მატას.

მატას ერთხელ უკვე მოუწია მოურინიოს გუნდიდან წასვლა და ახლა ის არ იჯერებს, რომ კიდევ მოუწევს ეს: "ნუ დაუჯერებთ ჭორებს. ათას სისულელეს წერენ", - როცა ესპანელ ნახევარმცველს ჩააცივდნენ, ნამდვილად დარწმუნებულია თუ არა, რომ "იუნაიტედში" რჩება, ექსვალენსიელმა გადაიხარხარა და კითხვას გაექცა.

სხვათა შორის, საჭოჭმანო სიაში ადრე მარუან ფელაინიც ეწერა, თუმცა ბელგიელმა გადაარწმუნა პორტუგალიელი, ჟოზეს მისი ათლეტიზმი და ფიზიკური სიმძლავრე მოეწონა და მიაჩნია, რომ ფელაინი "წითელ ეშმაკებს" კიდევ გამოადგება.

Goal.com-ი ამტკიცებს, რომ ტურინის "იუვენტუსი" ჩაება მოლაპარაკებაში "ნაპოლისთან" გონსალო იგუაინის შეძენასთან დაკავშირებით, მიუხედავად იმისა, რომ ნეაპოლელები არგენტინელის სანაცვლოდ "კოსმოსურ" თანხას ითხოვენ - 95 მილიონ ევროს. ადრე იმასაც წერდნენ, რომ "იუვე" უკვე შეუთანხმდა თავად ფეხბურთელს 4-წლიან კონტრაქტსა და წელიწადში 7 მილიონ ევროზე, "ბებერმა ქალბატონმა" ფეხბურთელთან უკვე ყველაფერი შეათანხმა. საიტი უფრო შორს მიდის, უახლოეს ხანებში "ნაპოლი" "რეალს" დაელაპარაკებაო... ალვარო მორატას შესახებ, რომელმაც გუნდში იგუაინი უნდა შეცვალოს.

ამ ვერსიის საწინააღმდეგოდ, Kiss Kiss Napoli ავრცელებს ცნობას, რომ "იუვენტუსი" უარზეა, "ნაპოლის" 95 მილიონი გადაუხადოს გონსალოს სანაცვლოდ. რომელს ვენდოთ? ყველაზე პოპულარულ საფეხბურთო საიტს თუ ადგილობრივ რადიოსადგურს?

Mundo Deportivo ამტკიცებს, რომ დიეგო კოშტას სურს ინგლისიდან ესპანეთში დაბრუნება და "ატლეტიკოსაც" სურს თავისი ყოფილი გოლეადორის დაბრუნება. სხვათა შორის, "ჩელსის" ახალ თავკაცს, იტალიელ ანტონიო კონტეს კოშტას შენარჩუნება სურს, მაგრამ თავად გაესპანელებულ ბრაზილიელს უნდა მადრიდში დაბრუნება. გამოცემა ამტკიცებს, რომ მალე "ატლეტიკო" ოფიციალური წინადადებით მიმართავს "ჩელსის" კოშტას შეძენაზე.

ესპანური მედიისგან განსხვავებული ვერსია აქვს ბრიტანულ Sportsmail-ს,  რომლის თანახმადაც, კოშტას ლა ლიგაში დაბრუნების სურვილი არ კლავს.

მადრიდის "ატლეტიკომ" იტალიური "სასუოლოს" ხორვატი ლეგიონერი შიმე ვრსალიკო წარადგინა. "მანჯუკიჩი ყოველთვის კარგად იხსენებდა აქაურობას. ერთი სული მაქვს, როდის დავიწყებ ვარჯიშს გუნდთან ერთად", - განაცხადა ხორვატმა პრესკონფერენციაზე.

ვრსალიკოსთან კონტრაქტი 2021 წლამდეა გათვალისწინებული. 24 წლის ვრსალიკოს ნაცვლად "ატლეტიკომ" "სასუოლოს" 16 მილიონი ევრო გადაუხადა, რასაც ბონუსები დაემატება. ევრო 2016-ზე ვრსალიკომ ორ მატჩში მიიღო მონაწილეობა.

***
რუსულმა "ზენიტმა" სლოვაკი ნახევარმცველი რობერტ მაკი შეიძინა. ბერძნულმა პაოკ-მა ტრანსფერი უკვე დაადასტურა. რუსები მის სანაცვლოდ 3,5 მილიონ ევროს იხდიან. მისი ხელში ჩაგდება იტალიურ "ფიორენტინასა" და ბელგიურ "ანდერლეხტს" სურდათ.

***
"ბარსელონამ" ამ ზაფხულს უკვე გააკეთა სამი ტრანსფერი - ლუკას დინი, დენის სუარესი და სამუელ უმტიტი შეიძინა, მაგრამ კატალონიური გრანდი გაჩერებას არ აპირებს. "ბარსელონას" კიდევ აქვს საამისო თანხა და სურვილი, რომ კიდევ განახორციელოს ტრანსფერები. იგივე გაუმეორა "ბარსას" ვიცე-პრეზიდენტმა Mundo Deportivo-ს.

***
Daily Mail-ი ამტკიცებს, რომ ალვარო ნეგრედო იმიტომ არ იყო "ვალენსიის" ამხანაგურ მატჩში, რომ "მიდლსბროსთან" მოლაპარაკებას აწარმოებდა. დიდი ალბათობით, 30 წლის ფორვარდი აიტორ კარანკასთან იჯარის წესით გადავა და თუ გაამართლებს ინგლისში, სეზონის ბოლოს "მიდლსბროს" მისი გამოსყიდვა 10 მილიონ ევროდ შეეძლება.

ყოველდღიური სპორტული გაზეთი "ლელო"