სუპერლიგის მეორე წრის მესამე ტურის დასკვნით მატჩში ერთმანეთს "სოხუმი" და "რუსთავი" დაუპირისპირდნენ. პირველ წრეში ამ გუნდების შეხვედრისას ფავორიტი უპირობოდ "სოხუმი" იქნებოდა, თუმცა რაც გუნდში ფინანსური პრობლემებია, სოხუმელები ლეგიონერების გარეშე თამაშობენ და შესაძლებლობებიც შეეკვეცათ."რუსთავსაც" დააკლდა 2 ძლიერი მოთამაშე, მაგრამ ოთარ ხმელიძის გუნდი პირველ წრესთან შედარებით გაცილებით უკეთ და გუნდურად თამაშობს.
15 თებერვალს გამართულ მატჩში რუსთაველები მესამე პერიოდამდე ლიდერობდნენ - რაც მალხაზ აბაიშვილის სამქულიანებისა და ლევან ხმელიძის სწრაფი გარღვევების დამსახურება იყო.
მეორე ტაიმიდან სოხუმელები ზონურ დაცვაზე გადაერთნენ და შედეგიც მოიმკეს. სტუმრებს
გადამწყვეტ მეოთხედში სოხუმელებმა მოპოვებული ლიდერობა აღარ დათმეს. რუსთაველები ეცადნენ, მაგრამ თამაშის ეშხში შესულ სოხუმელებს ვეღარ წამოეწივნენ და მე-8 დამარცხება განიცადეს - 65:79.
"სოხუმში" 25 ქულითა და 7 პასით საუკეთესო შედეგი ირაკლი ჩლაიძემ დააფიქსირა. 18 ქულა-11 მოხსნა ჰქონდა ქადარიას, რატი ბააკაშვილის ანგარიშზე კი 10 ქულასთან ერთად 7 პასიც დაგროვდა.
ქვემოქართლელთა გუნდში 18 ქულით ქაქუცა აბაიშვილი გამოირჩა, 17 ქულა დააგროვა ლევან ხმელიძემ, გიორგი ყველაშვილმა კი მწირ 3 ქულას ბლომად მოხსნები (19) მოაყოლა.
სუპერლიგის მორიგი ტურის მატჩები 21 და 22 თებერვალს, რუსთავში, ქუთაისსა და თბილისში გაიმართება.
მატჩისშემდგომი პრესკონფერენცია
ვაჟა კვარაცხელია ("სოხუმის" მთავარი მწვრთნელი): "დიდი მადლობა რუსთავის გუნდს, წინასამატჩო პრესკონფერენციაზეც ვთქვი, რომ თანაბარი შანსები გვქონდა. მართლაც საინტერესო შეხვედრა გამოვიდა. ჩვენს გუნდს უჭირს იმ პრობლემების გადალახვა, რაც დღეს გუნდშია, მაგრამ იმედია, ყველაფერი გამოსწორდება. კიდევ ერთხელ მოვუწოდებ კლუბის პრეზიდენტს, მინდია გულუას, რომ დროა გუნდს მიხედოს. მადლობას ვეტყვი ჩვენს ბიჭებს, რომლებიც ასეთ პირობებში ბოლომდე იბრძვიან და მაინც თამაშობენ".
ოთარ ხმელიძე ("რუსთავის" მთავარი მწვრთნელი): "პირველ რიგში, მივულოცავ "სოხუმს" გამარჯვებას. მინდა აღვიშნო, რომ ჩვენს გუნდშიც არაერთი პრობლემაა. რაც შეეხება უშუალოდ თამაშს, ნორმალურად დავიწყეთ, თუმცა "სოხუმმა" ზონური დაცვის მეშვეობით გვაჯობა, ავირიეთ, სროლები არც გარედან წაგვივიდა და არც შიგნიდან და თამაშის შემობრუნება ვერ მოვახერხეთ. მინდა გავამხნევო სოხუმი, იყო პერიოდი, როცა ჩვენ 11 თვე არ აგვიღია ხელფასი, თუმცა არ გავტყდით. ისინიც ასე იქცევიან, ბოლომდე სცემენ გუნდს პატივს, უყვართ თავიანთი გუნდი და ის, რასაც ეს ბიჭები აკეთებენ, გმირობის ტოლფასია. დარწმუნებული ვარ, ადრე თუ გვიან, მათი პრობლემები მოგვარდება და ყველაფერი კარგად იქნება".
რატი ბააკაშვილი ("სოხუმი"): "მინდა მადლობა ვუთხრა "რუსთავს" და აღვნიშნო, რომ როგორი შემადგენლობითაც არ უნდა გამოდიოდნენ, ეს გუნდი ყოველთვის მებრძოლი და ანგარიშგასაწევი მეტოქეა. რაც შეგვეხება ჩვენ, ბიჭებს უკვე გვეუხერხეულება ერთსა და იმავეზე ხუთი თვის განმავლობაში საუბარი. უნდა ვთქვა, რომ მწვრთნელიც და თითოეულ მოთამაშეც ბოლომდე ვიბრძვით და სათამაშოდ გამოვდივართ იმის გამო, რომ ფორმაზე იმ ქალაქის სახელი გვაწერია, რომელიც თოთეულ ჩვენგანს სტკივა. ეს გვაერთიანებს და ამ პრობლემების მიუხედავად ვთამაშობთ და გულშემატკივარს ჩვენი გუნდი ახსენებს იმ მხარეს, რომელიც მთელი ქვეყნის ტკივილია. მოვუწოდებ მინდია გულუას, ან მალევე მოაგვაროს არსებული ფინანსური პრობლემები, ან ის მაინც გვითხრას, რომ გუნდს ვეღარ დააფინანსებს და შევეცდებით, ალტერნატიული საშუალებები მოვძებნოთ. სირცხვილია დღეს ასეთ პირობებში ყოფნა. ბიჭები მაინც გავაგრძელებთ თამაშს და ჩვენს მაქსიმუმს გავაკეთებთ".
წყარო: superleague.ge
