ევრობასკეტი 2015. მეტოქე ხორვატია: მწვრთნელშეცვლილნი

ფოტოზე: ხორვატია-საქართველო. ანტე ტომიჩის გადამწყვეტი ტყორცნა ევრობასკეტ 2013-ზე

ხორვატიის ნაკრების მთავარმა მწვრთნელმა ველიმირ პესაროვიჩმა გაფართოებული შემადგენლობა დაასახელა. ამ გუნდთან დაკავშირებული თითოეული ინფორმაცია ქართველი გულშემატკივრისთვის საყურადღებოა, რადგან, ჯერ ერთი, ევროპის ჩემპიონატზე C ჯგუფის მასპინძელია, მეორეც - საქართველოს მეტოქეა.

ხორვატიის ნაკრები საშუალო ასაკის გუნდია, თუმცა ვარსკვლავების ნაკლებობას ნამდვილად არ განიცდის: ანტე ტომიჩი "ბარსელონაში" თამაშობს, დარიო სარიჩი - "ეფესში", დამიან რუდესი - "ინდიანაში", ბოიან ბოგდანოვიჩი - "ბრუკლინში"... ასეთი შემადგენლობის გუნდს საფუძვლიანი პრეტენზია უნდა ჰქონდეს ევრობასკეტის საუკეთესო ოთხ გუნდს შორის მოხვედრისა.

სხვათა შორის, 2013 წლის ევროპის ჩემპიონატზე ხორვატები სწორედ მეოთხე პოზიციაზე გავიდნენ.

მათ დიდად დაეხმარება თეთრ-წითელი სავსე ტრიბუნები, რადგან ჯგუფის მატჩები სწორედ ხორვატიის დედაქალაქ ზაგრებში იმართება.

ხორვატია საქართველოს ნაკრებთან მატჩში ფავორიტად კი ჩაითვლება, თუმცა წინასწარ შეგვიძლია ვთქვათ, რომ მასპინძლებთან უშანსოდ არ ვიქნებით. სწორედ ამჟამინდელი შემადგენლობა ჰყავდა მწვრთნელ ჟასმინ რეპეშას, ევრო-2013-ზე საქართველოს ნაკრებთან წაგებული მატჩი რომ შემოატრიალა - 76:75...

2013 წლის ევროპის ჩემპიონატზე ხორვატიასთან თითქმის მოგებული მატჩი წავაგეთ. გიორგი ცინცაძემ მეოთხე, გადამწყვეტ პერიოდში 12 ქულა ჩააგდო და ერთი ისეთი პასი მიითვალა, თამაშის მოგება რომ შეეძლო: ვიქტორ სანიკიძემ საფინალო სირენამდე 21 წამით ადრე სამქულიანით ქართველები 76:75 დააწინაურა. თუმცა საპასუხო შეტევაში ანტე ტომიჩმა მარცხენა ხელით ჩაგდებული ორქულიანით ისევ უკან მოგვიტოვა (76:77). დარჩენილ 8 წამში ცინცაძე მეტოქის ფარქვეშ შეიჭრა, თუმცა, მისმა ნატყორცნმა მიზანს ვერ მიაღწია...

"გიორგი ცინცაძე გამთამაშებელია, მას დიდი პასუხისმგებლობა აკისრია და მრავალმხრივი მოთამაშეა. ექვსი წელიწადია საქართველოს ნაკრებს ვწვრთნი და გიორგის შესაძლებლობებს კარგად ვიცნობ. ასე რომ, მჯერა მისი და ისიც ვიცი, რომ შეუძლია გუნდს გამარჯვებისკენ გაუძღვეს. ხორვატიასთან მატჩში მართლაც მივეცი თავისუფლად თამაშის საშუალება. შეცდომა ყველას მოსდის, თუმცა მთავარია, რომ თავს კომფორტულად გრძნობდა, ენერგიაც საკმარისად აღმოაჩნდა. მიმაჩნია, რომ დიდი მოცულობის სამუშაო შეასრულა და მისი დიდი დამსახურება იყო ხორვატიასთან ბოლო წამებამდე თანაბრად რომ ვითამაშეთ", - აღნიშნა იგორ კოკოშკოვმა 5 სექტემბრის ღამეს.

საინტერესოა ისიც, როგორ იმოქმედებს ხორვატებზე მწვრთნელის ცვლილება. ევრობასკეტი 2015-ის წინ ხორვატიის ნაკრების მთავარ მწვრთნელად რეპეშას ნაცვლად ველიმირ პესაროვიჩი დაინიშნა, რომელიც პარალელურად თორნიკე შენგელიას "ბასკონიაში" გაწვრთნის.

შეიცვალა ლეგიონერიც. 2013 წელს საქართველოს ნაკრებს ხორვატიის მაისურით ამერიკელი დონტა დრეპერი დაუპირისპირდა, 2014-ში კი ბალკანელებმა მის ნაცვლად ნატურალიზებულისთვის განკუთვნილი ერთი ადგილი ოლივიე ლაფაიეტს დაუთმეს. ევრობასკეტი 2015-ზეც სწორედ ეს უკანასკნელი ითამაშებს.

ხორვატების შემადგენლობაშია მარიო ჰეზონიაც, რომლის გვარიც ბოლო დროს ხშირად ხვდება ჟურნალ-გაზეთების ყდებზე. ეს არც არის გასაკვირი - 20 წლის უკანახაზელი 2015 წლის NBA-ს დრაფტზე მე-5 ნომრად "ორლანდო მეჯიქმა" აირჩია. მანამდე იგი "ბარსელონას" ღირსებას იცავდა.

რა ოდენობის სათამაშო დრო ერგება ჰეზონიას ევროპის ჩემპიონატზე, ამაზე წინასწარ მსჯელობა რთულია, რადგან მის პოზიციაზე გუნდში არაერთი გამოცდილი კალათბურთელია.

ხორვატია
ფიბას რეიტინგი: 12 ფიბას წევრია: 1992
მწვრთნელი: ველიმირ პესაროვიჩი

ნაკრები
მოთამაშე სმ პოზიცია დაბ. გუნდი
ბოიან ბოგდანოვიჩი 203 ფორვარდი 1989 ბრუკლინი (NBA)
მარიო ჰეზონია 202 ფორვარდი 1995 ბარსელონა (ესპანეთი)
დარიო სარიჩი 204 ფორვარდი 1994 ეფესი (თურქეთი)
ანტე ტომიჩი 217 ცენტრი 1987 ბარსელონა (ესპანეთი)
ტომისლავ ზუბჩიჩი 208 ცენტრი 1990 ცედევიტა (ხორვატია)
ლუკა ზორიჩი 211 ცენტრი 1984 ფენერბაჰჩე (თურქეთი)
დამიან რუდეზი 203 ფორვარდი 1986 ინდიანა (NBA)
კრუნისლავ სიმონი 197 ფორვარდი 1985 ლოკომოტივი (რუსეთი)
როკო უკიჩი 196 უკანახაზელი 1984 ცედევიტა (ხორვატია)
ოლივიე ლაფაიეტი 188 უკანახაზელი 1984 ოლიმპიაკოსი (საბერძნეთი)
როკ სტიპჩევიჩი 185 უკანახაზელი 1986 რომა (იტალია)
ფრან პელიპიჩი 193 უკანახაზელი 1989 ცედევიტა (ხორვატია)
ტონი კატიჩი 188 უკანახაზელი 1992 შიროკი (ბოსნია)
ივან რამლიაკი 203 ფორვარდი 1990 ცედევიტა (ხორვატია)
მარკო რამლიაკი 201 ფორვარდი 1993 ზადარი (ხორვატია)
ივან სირისჩევიჩი 198 უკანახაზელი 1987 ციბონა (ხორვატია)
მარკო არაპოვიჩი 207 ფორვარდი 1996 ცედევიტა (ხორვატია)
სტანკო ბარაჩი 216 ცენტრი 1986 ცედევიტა (ხორვატია)
მირო ბილანი 213 ცენტრი 1989 ცედევიტა (ხორვატია)
დუიე დუკანი 208 ფორვარდი 1992 ვისკონსინი (NCAA, აშშ)
ჰროვე პერიჩი 203 ფორვარდი 1985 ვენეცია (იტალია)
ლეონ რადოშევიჩი 208 ცენტრი 1990 ალბა (გერმანია)
იოსიპ სობინი 203 ფორვარდი 1989 ზადარი (ხორვატია)

ევრობასკეტი-2013
ფინალური ეტაპი
05.09.2013
ხორვატია 77:76 საქართველო
17:15, 18:19, 15:18, 27:24
საქართველო: ცინცაძე (36წთ, 25ქ, 3მ, 5პ), შერმადინი (34წთ, 10ქ, 9მ), მარკოიშვილი (34წთ, 4ქ), ფაცაცია (9წთ), სანიკიძე (33წთ, 15ქ, 7მ), ბურჯანაძე (9წთ, 2ქ), ჰიკმანი (27წთ, 20ქ, 3მ), ლეჟავა (10წთ), ცქიტიშვილი (3წთ)

ევრობასკეტი 2015
10.09.2015 ხორვატია-საქართველო

ხორვატიის ნაკრების ისტორია
სეზონი შეჯიბრება ადგილი თ მ წ ქულები
2013 ევრობასკეტი 4 19 16 3 78.4/70.5
2011 ევრობასკეტი 13 5 2 3 79.2/80.8
2009 ევრობასკეტი 6 9 4 5 71.8/72.0
2007 ევრობასკეტი 6 15 8 7 80.1/73.4
2005 ევრობასკეტი 7 11 7 4 79.8/75.8
2003 ევრობასკეტი 11 14 9 5 82.3/73.4
2001 ევრობასკეტი 7 17 13 4 83.1/74.4
1999 ევრობასკეტი 11 16 10 6 78.6/72.8
1997 ევრობასკეტი 11 18 9 9 80.1/70.4
1995 ევრობასკეტი 3 15 13 2 85.1/74.3
1993 ევრობასკეტი 3 9 8 1 96.0/75.4

ყოველდღიური სპორტული გაზეთი "ლელო"