გიორგი შერმადინმა სეზონი "რეალთან" 21 ქულით დაასრულა [VIDEO]

გიორგი შერმადინმა სეზონი საკადრისად, მოწოდების სიმაღლეზე ჩაატარა.

მისი "ანდორა" ღირსეულ ბრძოლაში დამარცხდა მადრიდის "რეალთან" და ესპანეთის ჩემპიონატში ასპარეზობა მეოთხედფინალურ ეტაპზე დაასრულა.

სერიის გადამწყვეტ, მე-3 მატჩში ანდორელები სტუმრად ბოლომდე ებრძოლნენ "სამეფო კლუბს", დასკვნით მეოთხედში ანგარიშიც გაუთანაბრეს (71:71), თუმცა მასპინძლებმა გადამწყვეტ წუთებში ანდორელებს გამარჯვება გამოგლიჯეს და ნახევარფინალში გავიდნენ - 95:84.

შერმადინი ტრადიციულად, სასტარტო ხუთეულში იყო და 31:35 წუთში 21 ქულა, 6 მოხსნა (3 შეტევაში), 2 პასი და 1 ჩაჭრა მოაგროვა. ქართველმა ცენტრმა 13-დან 8 ორქულიანი და 6-დან 5 საჯარიმო ჩააგდო, ბურთი 3-ჯერ დაკარგა, 2-ჯერ დაუფარეს, 3 პერსონალური ფოლი მიიღო, მის წინააღმდეგ კი თამაშის წესები 6-ჯერ დაირღვა.

შედეგად, შერმადინის სარგებლიანობის კოეფიციენტი 22-ს გაუტოლდა, რაც სტუმართა რიგებში საუკეთესო მაჩვენებელი იყო, მასპინძელთაგან კი მას მექსიკელმა ცენტრმა გუსტავო აიონმა (25) აჯობა – 15 ქულა, 9 მოხსნა, 2 პასი, 1 ჩაჭრა და 1 დაფარება.

სამწუხაროდ,, ისევ ვერ ითამაშა ბექა ბურჯანაძემ, რომელსაც ფეხის ტრავმა აქვს და მისი მიზანი ახლა სანაკრებო შეკრებისთვის მწყობრში ჩადგომაა. 15 ივლისამდე საკმარისი დროა, ბურჯანაძემ ტრავმა მოიშუშოს, ხოლო გიორგი შერმადინმა მომქანცველი და წარმატებული სეზონის შემდეგ - დაისვენოს.

მომზადებულია gbf.ge-ს მიხედვით