ქართველები საუკეთესოები იყვნენ, "სარაგოსამ" კი იტალიაში 2 ქულით წააგო

ვიქტორ სანიკიძისა და გიორგი შერმადინის კარგი თამაშის მიუხედავად, ევროთასის მორიგი ტურის მატჩში ესპანურმა "სარაგოსამ" იტალიაში, "ვირტუსთან" წააგო.

ვიქტორ სანიკიძის ყოფილმა გუნდმა "ვირტუსმა" სარაგოსელები ბოლო წუთებზე, დაძაბულ ბრძოლაში, 83:81 დაამარცხა.

საერთო სარგებლიანობის ინდექსის გათვალისწინებით, ქართველი კალათბურთელები "სარაგოსაში" საუკეთესოები იყვნენ. შერმადინის ინდექსმა 20 შეადგინა, ხოლო სანიკიძისა - 17. ორივე მათგანი სასტარტო ხუთეულში იყო.

შერმადინმა 23.36 წუთში 14 ქულა, 7 მოხსნა, 1 დაფარება და 1 პასი მიითვალა. გიორგიმ 7-დან 3 ორქულიანი და 8-დან 8 საჯარიმო ჩააგდო.

სანიკიძემ მოედანზე მხოლოდ 18 წუთი გაატარა, თუმცა საკმაოდ სარგებლიანი იყო და ორმაგ დუბლამდე 2 მოხსნა დააკლდა. ვიქტორმა 6-დან 4 ორქულიანი და 2-დან 2 საჯარიმო ჩააგდო, 2 სამიანი კი ააცილა. 10 ქულასთან ერთად, სანიკიძემ 8 მოხსნა, 1 ჩაჭრა და 1 დაფარება მიითვალა.

სარაგოსელები ბოლო მეოთხედის წინ 61:56 იგებდნენ, მაგრამ გადამწყვეტი პერიოდი 20:27 დათმეს და საბოლოოდ ტურნირში მე-4 მარცხი იგემეს. ქართველების გუნდს 5 მოგება გააჩნია და ჯგუფიდან გამსვლელ მე-3 ადგილს ინარჩუნებს.

ჯგუფური ეტაპის ბოლო მატჩში "სარაგოსა" ფრანგულ "გრაველინს" უმასპინძლებს და გამარჯვების შემთხვევაში, შემდეგ ეტაპზე გავა.

წყარო: www.gbf.ge