ვიქტორ სანიკიძე: როცა შეთავაზებებს მივიღებ, შემდეგ გადავწყვეტ, სად მიჯობს თამაში

ვიქტორ სანიკიძემ და გიორგი შერმადინმა დასავლეთ ევროპაში თავიანთი ადგილი იპოვეს. ისინი "სარაგოსას" ლიდერები არიან და ესპანეთის ჩემპიონატშიც ცხრილის სათავისკენ მიიწევენ.

დაკვირვებული თვალი იმასაც შენიშნავდა, რომ ქართული დუეტის კარგ თამაშზე მნიშვნელოვნადაა დამოკიდებული "სარაგოსას" წარმატება.

ლოგიკურია ჩვენიანებისადმი ესპანელთა მხრიდან გამოჩენილი ყურადღებაც. 25 თებერვალს გაზეთ "ელ პერიოდიკოში" ვიქტორ სანიკიძის ინტერვიუ გამოქვეყნდა, რომელშიც ჩვენი ფორვარდი, ესპანეთის ჩემპიონატის პარალელურად, ევროთასზეც ლაპარაკობს.

ამ შეჯიბრებას "სარაგოსა" მეორე ჯგუფური ეტაპიდან გამოეთიშა: ბოლო მატჩის ბოლო წუთებზე თურქულ "ბეშიქთაშთან" დამარცხდა...

- ევროთასის პლეი ოფამდე ცოტა დაგაკლდათ...
- დასანანია, როცა მიზანთან ძალიან ახლოს ხარ და საბოლოოდ ხელმოცარული რჩები.

"ბეშიქთაშთან" შეხვედრის ბოლო წამებზე ყველაფერი ჩვენ საწინააღმდეგოდ მოხდა. უპატიებელი შეცდომები დავუშვით, თუმცა მთავარი შეცდომა მეორე ეტაპის პირველი შეხვედრის წაგება იყო - შინ "ცედევიტასთან" არ უნდა დავმარცხებულიყავით.

- ევროპულ თავგადასავალს ზოგადად როგორ შეაფასებთ?
- ბევრი კარგი თამაში ჩავატარეთ, დიდი გამოცდილება მივიღეთ. მეამაყება, რომ "სარაგოსას" წევრი ვარ.

- ევროთასზე არაერთ გუნდთან ერთად გითამაშიათ. როგორ ფიქრობთ, ჰქონდა "სარაგოსას" პლეი ოფში თამაშის პოტენციალი?
- ჩემი აზრით, მხოლოდ პლეი ოფში კი არა, ნახევარფინალში გასვლაც შეგვეძლო. ამ შეჯიბრებაში ერთი-ორი გუნდი იყო, რომლებსაც სიძლიერით ვერ დავეტოლებოდით, რუსეთის "უნიქსი" და "ხიმკი". თუმცა არც მათთან შევირცხვენდით თავს. სხვა გუნდები ჩვენი დონისანი არიან.

- "ბეშიქთაშთან" სეზონის საუკეთესო მატჩი ჩაატარეთ. ყოველ შემთხვევაში, ასე ჩანს სტატისტიკიდან - 25 ქულა...
- ყოველთვის ვამბობ: "კარგია, თუ კარგად ვითამაშებ, მაგრამ როცა გუნდი წააგებს, ასეთ შეხვედრას კარგს ვეღარ დავარქმევ". ძალიან მიხარია, როცა გუნდიც გამარჯვებული გამოდის მოედნიდან და ამაში მეც მიმიძღვის წვლილი.

- როგორ ფიქრობთ, ბოლო რამდენიმე კვირის განმავლობაში გააუმჯობესეთ თამაში?
- ვცდილობ, ვმუშაობ, რომ ყოველთვის წინ ვიარო. მწვრთნელთან ერთად ბევრს ვშრომობთ, რაც შედეგს აუცილებლად მოიტანს.

შეიძლება, ცუდი დღე გვქონდეს, მაგრამ ეს ხელს არ გვიშლის პროგრესზე ზრუნვაში. ევროთასიდან გამოთიშვის შემდეგ კონცენტრირება ესპანეთის ჩემპიონატზე უნდა მოვახდინოთ. ახლა მეტ დროს დავუთმობთ ადგილობრივ პირველობას, რადგან არ მოგვიწევს ევროთასის მატჩებისთვის ევროპაში მოგზაურობა.

- ესპანეთის ლიგაზე რისი თქმა შეგიძლიათ?
- იტალიაში რამდენიმე სეზონი გავატარე და როცა ესპანეთზე მეკითხებიან, ყოველთვის იტალიას ვადარებ. ვფიქრობ, ამ ორ ქვეყანას ევროპაში საუკეთესო ლიგები აქვს.

ესპანეთში სამეფო თასის გათამაშების გემოც გავიგე და შემიძლია გითხრათ - შთამბეჭდავია! ყველა ამბობდა: თასი დიდი მოვლენააო, მაგრამ საკუთარი თვალით რომ ვნახე, რეალობამ მოლოდინს გადააჭარბა.

ორგანიზაცია, თამაშები... ყველაფერი შესანიშნავი იყო. დღეს შემიძლია ვთქვა, რომ ევროპაში საუკეთესო კალათბურთი ესპანეთშია.

- კიდევ ერთი ქართველი, გიორგი შერმადინიც კარგად ირჯება "სარაგოსაში"...
- შერმადინიც, მეც, მთელი გუნდი მოტივირებული ვართ, ჟურნალისტებიც მხარში გვიდგანან, გულშემატკივრებიც... ატმოსფერო ისეთია, გვიჩნდება სურვილი, აქ რაც შეიძლება დიდი ხნით დავრჩეთ.

განსაკუთრებით, მადრიდის "რეალთან" მატჩში ჩვენი მხარდაჭერა მახსენდება. ბოლო წამებზე დავმარცხდით.

- ამბობენ, შერმადინმა შეიძლება "სარაგოსა" დატოვოსო...
- გიორგის ყოველივე კარგს ვუსურვებ. თუ მისთვის "ოლიმპიაკოსში" გადასვლა უკეთესი იქნება, მეც გამიხარდება. რაც უნდა გადაწყვიტოს, ყველამ უნდა გავიგოთ მისი.

- ორი ქართველის "სარაგოსაში" გადასვლა ამ გუნდისთვის დიდი ტრანსფერი იყო...
- კონტრაქტი სექტემბერში გავაფორმე. სარაგოსაში რომ ჩამოვედი, გიორგი დამხვდა (რამდენიმე თვით ადრე ჩაირიცხა), რაც უთუოდ დადებითი ამბავი იყო - ყოველთვის სასიამოვნოა გუნდში თანამემამულესთან და ამავე დროს, მეგობართან თამაში. ვფიქრობ, აქ ჩამოსვლით ჩვენც მოვიგეთ და გუნდმაც.

- რას იტყვით მთავარ მწვრთნელ ხოსე ლუის აბოსზე?
- იგი ყოველთვის გვეუბნება და ცდილობს, რომ თითოეულ მატჩს ბოლომდე მობილიზებულები შევხვდეთ. ჩვენი გუნდის წარმატების ერთ-ერთი მიზეზი სწორედ ეს არის. თუმცა მხოლოდ მთავარ მწვრთნელზე ნუ ვილაპარაკებთ - მთელი სამწვრთნელო შტაბი გვეხმარება და ჩვენც ვცდილობთ, იმედები გავუმართლოთ.

- როგორც ამბობთ, "სარაგოსაში" თავს კომფორტულად გრძნობთ. კონტრაქტის გაგრძელებაზე თუ გიფიქრიათ?
- კარგი გუნდია და კარგი ქალაქი. სიამოვნებით ვიცხოვრებდი და ვითამაშებდი კიდევ ერთი სეზონი. დიახ, მინდა კონტრაქტის გაგრძელება, მაგრამ არავინ იცის, რა მოხდება სეზონის ბოლოს. როცა შეთავაზებებს მივიღებ, შემდეგ გადავწყვეტ, სად მიჯობს თამაში. თუმცა გპირდებით, თუ არაგონიდანაც მექნება წინადადება, "სარაგოსას" ასარჩევ კლუბებს შორის პრიორიტეტს აუცილებლად მივანიჭებ.

- ჩაიარა ესპანეთის თასმა და ევროთასმა. ახლა რა მიზანს ისახავთ?
- ესპანეთის ჩემპიონატში საუკეთესო რვა გუნდს შორის მოხვედრისა და პლეი ოფისთვის ვიბრძვით.

რვაეული თავისთავად გულისხმობს მეოთხედფინალში თამაშს, რაც მთლად დიდ მიღწევად არ უნდა ჩაითვალოს. უნდა ვეცადოთ, რეგულარული ეტაპიც მაღალ საფეხურზე დავასრულოთ და პლეი ოფში რაც შეიძლება წინ წავიდეთ.

"რეალის" დაჭერა დღეს ბევრისთვის შეუძლებელია, თუმცა სატურნირო ცხრილს თუ გადავხედავთ, "ბარსელონა" მხოლოდ ორი მოგებით გვისწრებს, ისევე, როგორც მალაგის "უნიკახა". ესპანეთის თასზე მალაგელთა დამარცხების შემდეგ ხალხსა და მეტოქეებში პატივისცემა მოვიპოვეთ. ყველამ იცის, რომ ძნელია ჩვენი ძლევა. ეს ბოლო ტურში "ვალენსიამაც" დაინახა.

ყოველდღიური სპორტული გაზეთი "ლელო"