ზაზა ფაჩულია - რას მოუტანს ის "გოლდენ სტეიტს"?

ზაზა ფაჩულია საქართველოს ნაკრებთან ერთად წარმატებით იბრძვის ევრობასკეტის ფინალურ ეტაპზე გასასვლელად. ამერიკულ მედიაში კი ხშირად წერენ ქართველ ცენტრფორვარდზე. დაინტერესება მას შემდეგ გაორმაგდა, რაც ზაზა "საჩემპიონო" "გოლდენ სტეიტის" წევრი გახდა.

გთავაზობთ ოდნავ შეკვეცილ სტატიას "ზაზა ფაჩულია - რას მოუტანს ის "გოლდენ სტეიტს", რომლის ავტორიც მაიკ ბრეიდია, სტატია თავიდან goldenstateofmind.com-ზე გამოქვეყნდა.

"13-წლიანი გამოცდილების მქონე ვეტერანი საქართველოდან, აქამდე ნაკლებად გამოირჩეოდა, მიუხედავად იმისა, რომ შარშან ლამის "ოლ სტარზე" მოხვდა. მოდი, ჩავუღრმავდეთ მის შესაძლებლობებს, რას უნდა ელოდოს ვარსკვლავებით გაჭედილი "უორიორსი" მისგან.

ვიწყებთ მოხსნებთ, რაც ისედაც ხელისგულზეა. ყველამ იცის, რომ ზაზა მოხსნებში დიდებულია. 2013 წელს მან "მილუოკის" რეკორდი დაამყარა, როცა ერთ თამაშში 18 ბურთი მოხსნა მეტოქის ფარზე! ეს, რა თქმა უნდა, ყოველ მეორე თამაშში არ განმეროდება, მაგრამ გასულ სეზონში "დალასში" ის საშუალოდ 9,4 მოხსნას აგროვებდა, რაც ლიგაში მე-14 შედეგია.

იმ კალათბურთელებს შორის, რომლებიც საშუალოდ 30 წუთზე ნაკლებს თამაშობენ (როგორც ზაზა) ქართველი მხოლოდ ჰასან უაითსაიდს, ჯულიუს რენდლს, ტრისტან ტომპსონსა და იონას ვალანჩუნასს ჩამორჩება.

მეტიც, ფაჩულია ლიგაში მე-4 ადგილზეა მეტოქის ფარზე მოხსნებით, რაც ასე უჭირდა "გოლდენ სტეიტს". შედარებისთვის, "გოლდენ სტეიტის" ცენტრი ენდრიუ ბოგუტი ამ მაჩვენებლით მხოლოდ 45-ე იყო. ფაჩულია ერთ-ერთი საუკეთესოა ლიგაში, როცა მეტოქის ფარზე ასხლეტილი სადავო ბურთისთვის იბრძვის.

ფაჩულია ჭკვიანი მოთამაშეა, მან ყოველთვის იცის, სად არის მისი გუნდელი მოედანზე. მან ყოველთვის იცის, როგორ გამოიყენოს ტანი ბრძოლაში და არასოდეს ეშინია ინიციატივის ხელში აღება, თუნდაც საეჭვო ტაქტიკას იყენებდეს. ის ამაში ძალიან ჰგავს ბოგუტს, მაგრამ დიდი სხვაობა ამ ორში ფაჩულიას მოწადინებაა. ზაზა უბრალოდ არ ჩერდება მაშინაც კი, როცა ბურთი დაკარგულია. მოკლედ, ზაზა ფაჩულია ფარქვეშ მაღალი საკალათბურთო IQ-ს და მონდომების ხარჯზე იბრძვის.

ფაჩულიას ყოფილი თანაგუნდელები მას დიდ მებრძოლად მიიჩნევენ, დევინ ჰარისი ზაზას როკის ადარებს: "ყოველ ჯერზე, როცა გასახდელში შევდივართ, ვხედავთ ზაზას დასისხლიანებულს, ის პარკეტზე ნამდვილი მებრძოლია. ეს ის არის, რაც ასე სჭირდება გუნდს".

როცა საკუთარი კალათის დაცვაზე მიდგება საქმე, ზაზა ფაჩულია კალათბურთის სოლიდური ცოდნისა და მებრძოლი სულის ხარჯზე გადის ფონს, რადგან მას არც ათლეტიზმი და არც სისწრაფე არ უწყობს ხელს, ებრძოლოს ლიგის მთავარ ვარსკვლავებს. ისინი მას ხშირად ჯაბნიან, ამიტომაც "გოლდენ სტეიტისთვის" ბოგუტის წასვლა და ფაჩულიას მოსვლა დაღმასვლაა. ზაზა ბოგუტისგან განსხვავებით, ფარის დამცველი არ არის, მაგრამ მასაც შეუძლია ბრძOოლა და არც ის არის ცუდი დამცველი.

დაცვაში ზაზა ყოველთვის მობილიზირებულია, თან ცდილობს, ფოლები თავიდან აიცილოს. ის პოზიციურად კარგად თამაშობს და სისწრაფის ნაკლის კომპენსირებას ამით აკეთებს. ვეტერანს რეზერვში საკმაოდ ბევრი ტრიუკი აქვს იმისთვის, რომ შემტევს მოუმზადებელი ტყორცნა შეასრულებინოს ან ბურთი დააკარგვინოს. ის ალბათ, არასოდეს გახდება დაცვაში საუკეთესო, მაგრამ ზაზა არასოდეს ნებდება.

როცა ქულების მოტანაზეა ლაპარაკი, ზაზა "ოლ სტარის" ვარსკვლავებს ბევრად ჩამორჩება, სისწრაფის და ათლეტიზმის ნაკლის გამო, ზაზა ისევ და ისევ, კალათბურთის კარგ ცოდნასა და ვეტერანის გამოცდილებას ეყრდნობა. ზაზა ფეხზე მყარად დგას და ცრუმოძრაობების არსენალსაც კარგად ფლობს, მას შეუძლია თანაგუნდელებს კარგი სატყორცნი სიტუაცია შეუქმნას. აგრეთვე, მას აქვს საკმაოდ კარგად დაყენებული ტყორცნა საშუალო მანძილიდან.

თუკი დაცვაში ბოგუტი აშკარად ჯობს ფაჩულიას, შეტევაში ზაზას მეტი რამის შემოთავაზება შეუძლია. აგრეთვე აღსანიშნავია, რომ ქართველი ცენტრი ჯარიმებსაც ნორმალურად ისვრის - 77%.

ზაზას სროლის პროცენტმა შესაძლოა, მოიმატოს. მიზეზი ვარსკლავური "გოლდენ სტეიტია", მეტოქეები უფრო ოთხეულზე (კარი, ტომპსონი, დურანტი, გრინი) იქნებიან გადართული და ფაჩულიას მეტად გამოუთავისუფლდება სასროლად პოზიცია.

შეტევაში ზაზას კიდევ ერთი პლუსი ხშირად რჩება შეუმჩნეველი - ზაზა კარგად აყენებს ბლოკს თანაგუნდელისთვის.

დაბოლოს, პასები - ბოგუტი ბრწყინვალე იყო თანაგუნდელებისთვის კარგი სასროლი სიტუაციების შექმნაში, მაგრამ ფაჩულიაც ცენტრისთვის კარგი მეპასეა. გასულ სეზონში მეორად პასებში ბოგუტი მესამე ადგილზე იყო, ზაზა კი მეხუთეზე ლიგაში.

და კიდევ ერთი, ზაზა გუნდის ინტერესებიდან გამომდინარე თამაშობს და არ არის ეგოისტი, დირკ ნოვიცკი იხსენებს, რომ ხანდახან მას უფრო უხარია, როცა თანაგუნდელი გამოიჩენს თავს და თავად ჩრდილში დარჩება.

შოტლანდიაში არის ასეთი გამონათქვამი - ბებერი ძაღლი უფრო სწრაფად იკბინებაო. მართლაც, გამოცდილებას ბევრი მოაქვს, "ბებერი ძაღლები" უფრო მონდომებულნი არიან".