ლევან ყიფიანი: ბესიკ ლიპარტელიანი ცდილობს შეცდომები სხვას გადააბრალოს

იყო დრო, კალათბურთის ფედერაციის მიერ ორგანიზებული ღონისძიებები სპორტის სამინისტროს დარბაზში იმართებოდა. 13 სექტემბერს კი პრესკონფერენცია კალათბურთის ფედერაციაში, პრეზიდენტის, ბესიკ ლიპარტელიანის კაბინეტში შედგა.

ამას ობიექტური და არცთუ სასიამოვნო მიზეზი აქვს - ფედერაციასა და სპორტის სამინისტროს შორის შავმა კატამ გაირბინა.

აქამდე დაპირისპირების დეტალების სააშკარაოზე გამოტანას ერიდებოდნენ, ახლა კი ბევრი რამ გაცხადდა და ბრალდებებიც მოვისმინეთ.

კალათბურთის ფედერაციაში ჩატარებულ ლიპარტელიანის პრესკონფერეციას (იხილეთ ვრცლად) სპორტის მინისტრის ლევან ყიფიანის ბრიფინგი მოჰყვა.

მან ვრცლად ილაპარაკა კალათბურთის ფედერაციასთან ურთიერთობაზე და ჟურნალისტების კითხვებსაც უპასუხა. მოვუსმინოთ სპორტის მინისტრს:

- ამ შეხვედრის მიზეზი კალათბურთის ფედერაციის პრეზიდენტის მიერ გაცხადებული "სიახლეებია". ეს არის ტყუილების კასკადი და ტალახი სამინისტროს მიმართულებით.

მთავრობაში მოსვლისთანავე განვაცხადეთ, რომ ამა თუ იმ ფედერაციის საქმეში ჩაურევლობის პრინციპი იყო ამომავალი წერტილი და ახლაც ასეა. ამ მიმართულებით ვმუშაობთ ყველა ფედერაციასთან.

რაც შეეხება კალათბურთის ფედერაციასთან ურთიერთობას, მედიის საშუალებით გავიგე, თურმე ყველაფერი კარგადაა და ამ ორგანიზაციას შეფერხება არ ჰქონია და ამის შემდეგ ფედერაციის პრეზიდენტმა გააკეთა განცხადება, რომ თურმე ვლობირებ კონკრეტულ პიროვნებებს და ა.შ.

რომელია სიმართლე, ეს თავად განსაჯეთ, თუმცა მინდა გითხრათ, ეს არის აბსურდული ბრალდებები გაჟღერებული იმ ადამიანის მიერ, რომელიც ცდილობს თავისი შეცდომები სხვას გადააბრალოს.

მზად ვარ გაგცეთ პასუხი ყველა კითხვაზე. მათ შორის იმაზეც, თითქოს მე ჰაერში ვცვლი მწვრთნელებს. თუ ლევან ყიფიანს, ან რომელიმე ჩვენს თანამშრომელს აქვს იმის ბერკეტი, რომ მართლაც ასე ცვლიდეს მწვრთნელებს ან ხელმძღვანელებს, ალბათ, ჩვენ ვართ წარმოუდგენელი მონსტრები, ან ყოვლისშემძლეები.

რა თქმა უნდა, ესეც ტყუილია და სარკაზმით იმიტომ ვლაპარაკობ, ეს განცხადებები უბრალოდ არაარგუმენტირებულია და მოვითხოვ: ყველა ბრალდებაზე წარმოადგინონ პირდაპირი დასაბუთება. ეს ჩემი პირადი ინტერესია და ბოლომდე მივყვები, რათა გავარკვიო, თუ სად, ვისთან ვილაპარაკე, ვინ მოვხსენი, ვინ არის ჩემი კლასელი, ჩემი ნათესავი რომელიც ამ მიმართულებით მუშაობს. ეს ყველაფერი უნდა იყოს ნათელი.

რაც შეეხება ურთიერთობას, ბესიკ ლიპარტელიანთან უფრო დიდი ხნის ნაცნობობა მაქვს, ვიდრე მის მიერ დასახელებულ პიროვნებებთან. მოსვლის დღიდან ვცდილობ, ყველა ფედერაციასთან დავამყარო კარგი ურთიერთობა და დაცული იქნას სამართლიანობის პრინციპი. ასეთი პოლიტიკა კვლავაც გაგრძელდება და ვერავინ შეძლებს ტყუილებით ხელის შეშლას.

კალათბურთელებს ჩემი მხარდაჭერა ყოველთვის ჰქონდათ. მათ შევხვდი კიდეც, უბრალოდ, მას მერე შეკრებაზე გაემგზავრნენ და ამიტომაც ვერ მოხერხდა გუნდთან შეხვედრა. კარგი დამოკიდებულება მაქვს კალათბურთელებთან და არ მინდა ეს თემა მათზე გადავიდეს.

ის, რომ სლოვენიაში არ ვაპირებდით წასვლას, ესეც ტყუილია, რადგან ნაკრების მეორე ეტაპზე გასვლის შემთხვევაში ჩვენი დელეგაცია აუცილებლად გაემგზავრებოდა სლოვენიაში. მე წავიდოდი, თუ არა, ეს არ მქონდა გადაწყვეტილი, რადგან მხოლოდ კალათბურთი არ შედის ჩვენი საქმიანობის არეალში.

როგორც ფედერაციის პრეზიდენტმა ბესიკ ლიპარტელიანმა თქვა, სპორტის მინისტრმა ლევან ყიფიანმა მას მისსავე კაბინეტში უთხრა, რომ პოსტიდან უნდა წასულიყო. მინისტრის კომენტარი ასეთია:

- ეს არის ტყუილი. კალათბურთის ფედერაციაში არ ვყოფილვარ. ვერც ერთ დღეს, ვერც ერთ ადგილს, ვერც ერთ გამოცემას ვერ დამისახელებთ, რომელშიც რომელიმე კანდიდატს ვლობირებ. არც მიხეილ ახვლედიანზეა ლაპარაკი და არც ბესიკ ლიპარტელიანზე.

ვეცადეთ დაგვესვა ორი დაპირისპირებული მხარე, ემსჯელათ და საერთო ენა გამოენახათ. ორივემ წარმოადგინა ადვოკატი, რომლებმაც ჩვენს იურისტებთან ერთად განიხილეს ყველა დეტალი, რაც მნიშვნელოვანი იყო არჩევნების ჩატარებისთვის.

მინისტრი საბონისთან შეხვედრასა და იქ მოყვანილ პროგრამასაც შეეხო:

- ეს იყო ზოგადი ჩარჩო პროექტისა, რომელიც წარმოადგინა ბატონმა არვიდას საბონისმა. ლიტველ სტუმართან ერთად შევთანხმდით, რომ ეს პროცესი კიდევ უფრო გაღრმავებულიყო. მაგრამ ამ პროგრამას სრულყოფილი სახე უნდა მისცეს კალათბურთის ფედერაციამ და არა სპორტის სამინისტრომ.

ჩვენ ყოველთვის ვიყავით მხარდამჭერნი იმ პროექტებისა, რომლებსაც წარმოადგენენ კონკრეტული ფედერაციები. ამის მაგალითია თუნდაც ის დაფინანსება, რომელსაც ვაძლევთ კალათბურთის ფედერაციას. რაზეც ბესიკ ლიპარტელიანმა თქვა კიდეც - არც ერთ შეკრებაზე, თუ სხვა საქმეზე, ფინანსური პრობლემა არ შეგვქმნიაო.

ყოველდღიური სპორტული გაზეთი "ლელო"

ასევე იხილეთ:
ბზარი კალათბურთის ფედერაციაში - ამის დროა წინასაევრობასკეტოდ?!
"ვეტერანთა კავშირი" "კალათბურთელთა კავშირს" სიცრუეში ადანაშაულებს
"კალათბურთელთა კავშირი": ჩვენი ამოცანა ქართული კალათბურთის ღრმა კრიზისიდან გამოყვანაა!
დაპირისპირება ქართულ კალათბურთში - ბესიკ ლიპარტელიანს შეუტიეს