NBA. რეგულარული ჩემპიონატი: სამქულიანები ლილარდისაა

კობი ბრაიანტი სულ უფრო მეტად ემსგავსება საკუთარ თავს ძველ დროში. "ლეიკერსის" ლიდერმა ბოლო სამ მატჩში მეორედ დააგროვა 21 ქულა. საკმაოდ კარგი შედეგია იმის გათვალისწინებით, რომ კობის წინააღმდეგ თამაშობდა NBA-ს ერთ-ერთი საუკეთესო პერსონალური მცველი ტონი ალენი.

"საბოლოოდ მაშინ მივხვდი, რომ დავბრუნდი, როცა საშუალო ტყორცნების ჩაგდება დავიწყე, - განაცხადა მატჩის შემდეგ კალიფორნიელთა ლიდერმა. - განსაკუთრებით, ისეთი მცველის წინააღმდეგ, როგორიცაა ალენი, რომელიც გასაქანს არ გაძლევს".

ამ ყველაფერმა მოიტანა "ლეიკერსის" რთული გამარჯვება. ახლა კალიფორნიული გრანდი ნელ-ნელა ზემოთ მიიწევს გათამაშების ცხრილში და შეუძლია, მოგება-წაგების ბალანსის გათანაბრებაზეც იზრუნოს, თუ პარასკევს შინ შეძლებს "მინესოტას" დამარცხებას.

* * *
ცნობილია, რომ "დენვერი" ერთ-ერთი საუკეთესო საშინაო გუნდია ლიგაში, მაგრამ ამჯერად ვერაფერი გააწყო ბრწყინვალე ფორმაში მყოფ "ოკლაჰომასთან", რომელმაც ზედიზედ მეშვიდე გამარჯვება ჩაიწერა აქტივში. "თანდერმა" ოთხივე მეოთხედში მცირე უპირატესობა დააფიქსირა და საბოლოოდ, 12 ქულის სხვაობით გაიმარჯვა, რითაც მეორე ადგილზე გადავიდა დასავლეთში.

მატჩის მსვლელობისას იყო რამდენიმე მომენტი, როცა "ნაგეტსმა" მინიმუმამდე შეამცირა სხვაობა, მაგრამ ყოველთვის პასუხად მეტოქის მინი-სპურტს იღებდა.

ორმაგი დუბლი შეასრულეს რასელ უესტბრუკმა და სერჟ იბაკამ, კევინ დურანტმა კი სეზონში მეთორმეტედ მიაღწია 30-ქულიან ზღვარს, რაც ლიგაში საუკეთესო მაჩვენებელია.

* * *
დასავლეთ კონფერენციაში პირველი ადგილი კი კვლავაც "პორტლენდს" ეკუთვნის. შეგახსენებთ, რომ რამდენიმე დღის წინ "ბლეიზერსმა" "ფილადელფიას" წინააღმდეგ საკლუბო რეკორდი დაამყარა ერთ მატჩში ჩაგდებული სამქულიანების რაოდენობით (21). ამჯერად პორტლენდელი სნაიპერების რისხვა "კლივლენდს" დაატყდა თავს.

"დეტროიტთან" წინა შეხვედრაში "პორტლენდის" გამთამაშებელმა დამიენ ლილარდმა შვიდიდან შვიდი სამქულიანი ააცილა. როგორც ჩანს, ამან შარშანდელი სეზონის საუკეთესო ბომბარდირი ძალიან გააბრაზა და მან ჯავრი სწორედ "კლივლენდზე" იყარა. დამიენის 12 შორეული ტყორცნიდან რვამ მიაღწია მიზანს. მათ შორის იყო გამარჯვების მომტანი სამქულიანი სირენამდე 0,4 წამით ადრე.

ბოლო შეტევაში ლილარდმა უკეთესი გაგრძელება ვერ მონახა და მეტოქის აქტიური წინააღმდეგობის მიუხედავად, რვა მეტრიდან ისროლა. ეს ეპიზოდი დღის საუკეთესო მომენტების ჰიტ-აღლუმის სათავეში მოექცა.

შარლოტი-საკრამენტო 95:87
35:22, 21:21, 22:29, 17:15
შ: უოკერი (24), ჰენდერსონი (20).
ს: კაზინსი (30), ტომასი (21).

კლივლენდი-პორტლენდი 116:119
28:26, 31:29, 29:37, 28:27
კ: ირვინგი (25+10 პასი), უეიტერსი (25).
პ: ლილარდი (36+10 პასი), ოლდრიჯი (26+15 მოხსნა).

მემფისი-ლეიკერსი 92:96
24:34, 23:18, 20:15, 25:29
მ: რენდოლფი (18), ალენი (16).
ლ: ბრაიანტი (21), გასოლი (21).

დენვერი-ოკლაჰომა 93:105
24:29, 20:23, 21:23, 28:30
დ: ჰიქსონი (20), ლოუსონი (17).
ო: დურანტი (30), უესტბრუკი (21+13 მოხსნა), იბაკა (17+10 მოხსნა).

გ. სტეიტი-ნ. ორლეანი 104:93
26:19, 31:20, 31:26, 16:28
გ-ს: კარი (28+12 პასი), ლი (21+17 მოხსნა).
ნ-ო: ანდერსონი (21), ჯ. სმიტი (12).

გთავაზობთ ეროვნული საკალათბურთო ასოციაციის რეგულარულ ჩემპიონატში გასულ კვირის მნიშვნელოვანი მომენტების ჩამონათვალს...

კვირის გუნდი - "ოკლაჰომა"
სკოტ ბრუქსის შეგირდებმა ბოლო 14 მატჩიდან 13 მოიგეს, მათ შორის, ოთხივე შეხვედრა, რომელშიც გასულ კვირას მიიღეს მონაწილეობა. ამასთან, "თანდერი" საშუალოდ მატჩში 110 ქულას (მესამე მაჩვენებელი ლიგაში) აგროვებდა და თამაშიდან 47.8 პროცენტის სიზუსტით ისროდა.

კევინ დურანტისა და კომპანიის მსხვერპლნი გახდნენ არავარსკვლავური, მაგრამ არც ისე იოლად დასამარცხებელი გუნდები "ატლანტას", "მემფისის", "ლეიკერსისა" და "ორლანდოს" სახით.

კვირის მოთამაშე - ლამარკუს ოლდრიჯი (პორტლენდი)
როგორც კი გამოაქვეყნეს "ყველა ვარსკვლავის მატჩის" მონაწილეთა გამოსავლენი ხმის მიცემის საშუალედო შედეგები, "პორტლენდის" ფორვარდი შეუჩერებელი გახდა (ოლდრიჯი მხოლოდ მერვეა ხმების რაოდენობით ფორვარდებს შორის). დღეს ის საუკეთესოა თავის პოზიციაზე ლიგაში და თავის გუნდს სამიდან სამი მატჩის მოგებაში დაეხმარა, როცა 26.0 ქულასა და 17.7 მოხსნას აგროვებდა და თამაშიდან ტყორცნების 53.2 პროცენტს ათავსებდა კალათში.

კვირის ახალბედა - ვიქტორ ოლადიპო (ორლანდო)
სანამ კარტერ-უილიამსი დერმატიტის ავადმყოფობას მკურნალობს, ბერკი კი არასტაბილურობას ებრძვის, ოლადიპო ამყარებს თავის შანსებს წლის საუკეთესო ახალბედას ტიტულისთვის ბრძოლაში. გასულ კვირას ის კვლავ ყველაზე შედეგიანი იყო დებიუტანტებს შორის. მან საშუალოდ 15.0 ქულას (თამაშიდან ტყორცნების რეალიზაცია – 46.8 პროცენტი, სამქულიანები – 37.5 პროცენტი) მოუყარა თავი, რასაც 3.8 მოხსნა და 3.3 შედეგიანი პასი დაუმატა.

ოვერტაიმების მეფე
"დეტროიტთან" მატჩის ოვერტაიმის ბოლო წამზე დამიენ ლილარდმა ზუსტი ტყორცნით გამარჯვება აჩუქა "პორტლენდს". მატჩის შემდეგ NBA.com-მა გამოიკვლია ახალგაზრდა გამთამაშებლის სტატისტიკა და გაირკვა, რომ შარშანდელი სეზონის საუკეთესო ახალბედა თითქმის იდეალურად თამაშობს დამატებით ხუთწუთიანებს. შარშანდელი სეზონიდან მოყოლებული დღემდე, ლილარდმა რვა ოვერტაიმი ითამაშა და აქედან შვიდი მისმა გუნდმა მოიგო.

ამ რვა ოვერტაიმში მან ჯამში 40 წუთი გაატარა მოედანზე, გამოიყენა 19-დან 15 ტყორცნა და სულ 45 ქულა დააგროვა. მას არც ერთი საშუალო ტყორცნა არ აუცილებია (10/10), აგრეთვე, ჩააგდო ცხრიდან ხუთი სამქულიანი. როცა ლილარდი მოედანზე იყო, ოვერტაიმებში "პორტლენდმა" 31 ქულის სხვაობით მოიგო.

კვირის გმირობა
"ორლანდოს" ფორვარდი გლენ დევისი ისე დაიღალა ტრავმებისგან, რომ მხრის ამოვარდნა მისთვის პრობლემას არ წარმოადგენს. "ოკლაჰომასთან" მატჩის დასრულებამდე ორი წუთით ადრე, მან დატოვა მოედანი, მაგრამ სათადარიგოთა სკამზე მხარი ჩაუსვეს და სირენამდე 13 წამით ადრე დაბრუნდა თამაშში, მაგრამ მისი გადამწყვეტი სროლა არაზუსტი აღმოჩნდა.

კვირის საჯარიმო
"საკრამენტოსთან" მატჩში ჯეიმს ჰარდენმა მარცხენა კოჭის ტრავმა მიიღო, მაგრამ თამაშში დაბრუნების საშუალება რომ არ დაეკარგა, მან ცალ ფეხზე მდგომმა შეასრულა საჯარიმო ტყორცნები. ორივე სროლა ზუსტი იყო. ჰარდენი მოედანზე მეოთხე მეოთხედში დაბრუნდა, მაგრამ თამაშის რიტმიდან ამოვარდნილი იყო და მისმა "როკეტსმა" წააგო.

კვირის უკმაყოფილება
"გოლდენ სტეიტის" მთავარი მწვრთნელი მარკ ჯექსონი უკმაყოფილოა თავისი შეგირდების თავდადებითა და საბრძოლო განწყობის დაბალი დონით, რამაც ბოლო 10 მატჩში ექვსი წაგება გამოიწვია. განსაკუთრებით განაწყენებული იყო ჯექსონი "ფინიქსთან" მატჩის შემდეგ.

"ჩვენი გუნდი არ იხარჯება მთელი 48 წუთის განმავლობაში, არ არის სათანადო მონდომება. ეს ჩემთვის იმედგაცრუებაა. ვერ ვიტყვი, რომ მთელი თამაში ცუდად გამოგვდის, მაგრამ საქმის ბოლომდე მისაყვანად რაღაც არ გვყოფნის. უნდა მოვაგვაროთ ეს საკითხები ინდივიდუალურ და გუნდურ დონეზე. მაგალითად ავიღოთ "ფინიქსი". ყველა ხედავს, რამდენად ნიჭიერი და შრომისუნარიანია ეს გუნდი. ისინი ბოლომდე იხარჯებიან მატჩის დროს", - აღნიშნა მარკ ჯექსონმა.

კვირის გუნდი
გამთამაშებელი: კაირი ირვინგი (კლივლენდი), კრის პოლი (კლიპერსი)
შემტევი მცველი: გორან დრაგიჩი (ფინიქსი), დუეინ უეიდი (მაიამი)
მსუბუქი ფორვარდი: კევინ დურანტი (ოკლაჰომა), ლებრონ ჯეიმსი (მაიამი)
მძიმე ფორვარდი: ლამარკუს ოლდრიჯი (პორტლენდი), კევინ ლავი (მინესოტა)
ცენტრი: დემარკუს კაზინსი (საკრამენტო), ნიკოლა პეკოვიჩი (მინესოტა)

ყოველდღიური სპორტული გაზეთი "ლელო"

ასევე იხილეთ:
NBA. რეგულარული ჩემპიონატი: სენსაცია "დეტროიტისგან"