NBA: "კლიპერსს" კრის პოლის მუხლი ადარდებს

- "ბოსტონ სელტიქსის" ხელმძღვანელობა ამ ზაფხულს "საკრამენტოს" ცენტრისთვის, დემარკუს კაზინსისთვის ბრძოლას აპირებს. ამ გარიგებისთვის "სელტიქსმა", შესაძლოა, დრაფტზე თავისი ერთ-ერთი არჩევანი გამოიყენოს. შეგახსენებთ, რომ "ბოსტონს" პირველ რაუნდში ორ არჩევანი აქვს და კიდევ ოთხი - 2016 წელს.

- "პორტლენდის" ერთ-ერთი ლიდერი დამიენ ლილარდი არ აპირებს ორეგონული კლუბის დატოვებას. სეზონის დასრულების შემდეგ მხარეები მოლაპარაკებებს დაიწყებენ ახალი მრავალწლიანი კონტრაქტის გასაფორმებლად. "ვაპირებ, მომავალშიც გავაგრძელო გამოსვლა "ბლეიზერსში". რაც ჩემზეა დამოკიდებული, ყველაფერს გავაკეთებ გუნდში დარჩენისთვის", - განაცხადა გამთამაშებელმა.

- "ლოს ანჯელეს კლიპერსის" ერთ-ერთმა ლიდერმა კრის პოლმა მუხლი დაიზიანა "სან ანტონიო სპურსთან" სერიის მეშვიდე მატჩის პირველ მეოთხედში. მართალია, გამთამაშებელმა შეხვედრა ბოლომდე ითამაშა და გამარჯვების ტყორცნაც ჩააგდო, მაგრამ დიდი ალბათობით შეიძლება იმის თქმა, რომ პოლი გამოტოვებს "ჰიუსტონთან" სერიის პირველ მატჩს.

- "სან ანტონიოს" მთავარმა მწვრთნელმა გრეგ პოპოვიჩმა და გენერალურმა მენეჯერმა არ სი ბიუფორდმა უარი თქვეს გუნდის სამომავალო პერსპექტივების შესახებ საუბარზე. კერძოდ, მათ არ უპასუხეს შეკითხვას - გააგრძელებენ თუ არა პროფესიულ კარიერას ტიმ დანკანი და მანუ ჯინობილი.

საერთო ჯამში, "სპურსის" 10 მოთამაშე გახდება 2015 წლის ზაფხულში თავისუფალი აგენტი და გამორიცხული არ არის, მომავალ სეზონში ტექსასური კლუბი სრულიად სახეშეცვლილი ვიხილოთ.

ყოველდღიური სპორტული გაზეთი "ლელო"