NBA. პლეი ოფი: "კლივლენდზე" შთამბეჭდავი "მაიამი"

გუშინდელი ოთხი მატჩის შედეგებს თუ გადავხედავთ, ყველაზე მეტად აღმოსავლეთის ლიდერს "კლივლენდს" გაუჭირდა სერიის პირველი მატჩის მოგება.

"დეტროიტთან" საშინაო შეხვედრაში, ლიდერი 17-ჯერ შეიცვალა და 21-ჯერ დაფიქსირდა თანაბარი ანგარიში. ასე რომ, მატჩის ბედი ისეთმა წვრილმანებმა გადაწყვიტა, როგორიც იყო, მაგალითად, შეხვედრის ბოლოს რეჯი ჯექსონის ტექნიკური ჯარიმა, რამაც "კლივლენდს" დამატებით ერთი მნიშვნელოვანი ქულა მისცა.

ეს და სხვა შეცდომები სტენ ვან განდის გუნდს შვიდქულიან ჩამორჩენად დაუჯდა, რომელიც სტუმრებმა ვერ გააბათილეს.

რთული გამარჯვების მიუხედავად, "კლივლენდის" გულშემატკივრებს ოპტიმიზმის საბაბს აძლევს "დიდ ტრიოს" წევრების შედეგიანობა და შეთამაშება. ლებრონ ჯეიმსმა, კაირი ირვინგმა და კევინ ლავმა გუნდური 106 ქულიდან 81 თავის ანგარიშზე ჩაიწერეს. ბევრ შეტევაში ლებრონს თავის მხარეს გადაყავდა მეურვეები და ბურთს უგდებდა თავისუფალ პარტნიორებს.

ამით ჯეიმსმა 11 შედეგიანი პასით ორმაგი დუბლი შეასრულა. ხოლო ლავი ბრწყინვალედ იბრძოდა ფარქვეშ და მეტოქეს მთელი მატჩის განმავლობაში, შეტევაში მხოლოდ ხუთი ბურთი მოახსნევინა.

კლივლენდი-დეტროიტი 106:101
27:25, 26:33, 23:20, 30:23
კ: ირვინგი (31+6 პასი+5 მოხსნა), ლავი (28+13 მოხსნა), ჯეიმსი (22+11 პასი+6 მოხსნა+2 დაფარება), სმიტი (9+3 პასი), დელავედოვა (7), ჯეფერსონი (5), ტომპსონი (2+6 მოხსნა), შამპერტი (2).
დ: კოლდუელ-პოუპი (21+3 პასი), მორისი (20+5 პასი), ჯექსონი (17+7 პასი), დრამონდი (13+11 მოხსნა), ჯონსონი (9+მოხსნა), ჰარისი (9+10 მოხსნა), ბალოკი (8), ბეინსი (3), ბლეიკი (1+6 პასი).
რეალიზაციის პროცენტი: თამაშიდან (44.3/50.7), სამქულიანები (34.3/51.7), საჯარიმოები (76.2/75).
სერია: 1-0

* * *
"მაიამიმ" პირველ მეითხედში გადაწყვიტა მატჩის ბედი, როცა სასტარტო 12-წუთეული 19 ქულით მოიგო, თან გაიმეორა ერთ მეოთხედში დაგროვილი ქულების პირადი რეკორდი (41 ქულა).

ფლორიდელებმა არც მეორე მეოთხედში დააგდეს ტემპი. განსაკუთრებით კარგად ერიკ სპოელსტრას შეგირდებს მეტოქის სამწამიანში თამაში გამოსდიოდათ, საიდანაც 28 ბურთი ჩააგდეს. ამდენი ზუსტი ტყორცნა მის მეტოქეს მთლიანად მატჩში ჰქონდა. ამ ყველაფერმა ის გამოიწვია, რომ "ჰიტმა" საკლუბო რეკორდი დაამყარა - გუნდს პლეი ოფის მატჩში 123 ქულა აქამდე არასოდეს დაგროვებია.

მაიამი-შარლოტი 123:91
41:22, 26:28, 30:24, 26:17
მ: დენგი (31+7 მოხსნა), უაიტსაიდი (21+11 მოხსნა+3 დაფარება), უეიდი (16+7 პასი), ჯონსონი (11+6 მოხსნა+3 პასი), სტაუდმაიერი (11), დრაგიჩი (9+10 პასი), რიჩარდსონი (8+5 მოხსნა+3 პასი), რაიტი (8), უინსლოუ (8).
შ: ბატუმი (24), უოკერი (19), ჯეფერსონი (13+5 მოხსნა), ზელერი (9+7 მოხსნა), ლინი (9+3 პასი), ლი (8), ლემბი (4), ჰოსი (3), უილიამსი (2).
რეალიზაციის პროცენტი: თამაშიდან (57.6/43.1), სამქულიანები (50/35.3), საჯარიმოები (76.2/78.4).
სერია: 1-0

ეროვნულმა საკალათბურთო ასოციაციამ 2015-16 წლების რეგულარული ჩემპიონატის ლაურეატების დასახელება დაიწყო. გუშინ, ცნობილი გახდა, რომ სეზონის საუკეთესო დამცველი გახდა "სან ანტონიოს" მსუბუქი ფორვარდი კავაი ლეონარდი. მან ეს პრიზი ზედიზედ მეორედ მოიპოვა.

ხმის მიცემის შედეგად, ლეონარდმა 547 ქულა დააგროვა და 126 ქულით გაუსწრო უახლოეს მდევარს - დრეიმონდ გრინს "გოლდენ სტეიტიდან". 83 ქულით მესამეზეა - "მაიამის" ცენტრი ჰასან უაიტსაიდი.
დასრულებულ რეგულარულ სეზონში 24 წლის ლეონარდმა 72 მატჩი ჩაატარა და საშუალოდ, 21.2 ქულა, 6.9 მოხსნა და 2.6 შედეგიანი პასი დააგროვა.

"კლივლენდისა" და "დეტროიტის" გუშინდელ შეხვედრას თან ახლდა სკანდალური მინი-ინტერვიუ, რომელიც ერთ-ერთი შესვენებისას მისცა "პისტონზის" მთავარმა მწვრთნელმა სტენ თან განდიმ. მან მსაჯების მოქმედებაზე გამოთქვა კრიტიკა, რადგან მიიჩნია, რომ მათ ორი აშკარა ჯარიმა ვერ დაინახეს ლებრონ ჯეიმსის მხრიდან.

"ზოგიერთმა გადაწყვეტილებამ წყობიდან გამოიყვანა ჩემი ბიჭები. მათ უნდა ესმოდეთ, რომ ლებრონი - ეს არის ლებრონი და არავინ დაუსტვენს მის წინააღმდეგ შეტევაში. ჯეიმსს ყველაფრის კეთების უფლება აქვს და ამას უნდა შევურიგდეთ", - თქვა ვან განდიმ, რომელსაც, ამ სიტყვებისთვის, სოლიდური ფულარი ჯარიმა ელოდება.

ყოველდღიური სპორტული გაზეთი "ლელო"