ნაკრები ბრეშაში ჩავიდა - შენგელია ბოლონიის კლინიკაშია

საქართველოს კალათბურთელთა ეროვნული ნაკრები იტალიაში დღეს, გამთენიისას გაემგზავრა და ქალაქ ბრეშაში, სადაც 27 აგვისტოს მსოფლიოს ჩემპიონატის საკვალიფიკაციო ტურნირის მორიგი მატჩი უნდა ჩაატაროს, ადგილობრივი დროით 15:00 საათზე ჩავიდა. ნიდერლანდების დამარცხების შემდეგ ჩვენმა ნაკრებმა ცოტა დაისვენა და იტალიისკენ გეზი შუაღამისას აიღო.

ნაკრებს თან გაჰყვა თორნიკე შენგელია, რომელმაც ნიდერლანდებთან მატჩში მხრის მძიმე ტრავმა მიიღო. ეროვნული გუნდის კაპიტანი ბოლონიაში, მსოფლიოში ერთ-ერთ საუკეთესო ტრავმატოლოგიურ კლინიკაში სამკურნალოდ გაემგზავრა და ქალაქ ბერგამომდე საქართველოს ნაკრებთან ერთად იმგზავრა. თორნიკე შენგელია მედიკოსთა მიერ სპეციალური საშუალებებით დაფიქსირებული მხრით მგზავრობდა, რა თქმა უნდა, ტკივილგამაყუჩებლით. მას მხრის ძვლის მაღალი ხარისხის დისლოკაცია და იოგების დაზიანება აქვს და გამოსაჯანმრთელებლად რა სახის მკურნალობა და რა დრო დასჭირდება, ამას ბოლონიელი მედიკოსები გადაწყვეტენ.

ბერგამოს აეროპორტიდან ბოლონიაში შენგელიას საქართველოს კალათბურთის ეროვნული ფედერაციის პრეზიდენტი ვიქტორ სანიკიძე და ნაკრების ექიმი თემურ ხვედელიძე გაჰყვნენ. საქართველოს ნაკრები ბერგამოდან ბრეშაში ავტობუსით, არასრულ ერთ საათში ჩავიდა და სასტუმრო “ნოვოტელში” დაბინავდა. ჩვენი ნაკრები დღეს დაისვენებს და ხვალ, გეგმის მიხედვით, ორჯერ – დილას და საღამოს ივარჯიშებს.