თორნიკე შენგელიას, რომელსაც ევროლიგის ტურის MVP-ის ტიტული ორჯერ გადასცეს, ხოლო თვის საუკეთესო მოთამაშედ მარტში დაასახელეს, სეზონის რჩეულად არჩევის შანსი აქვს. ▶ უდიდესი აღიარება! - თორნიკე შენგელია ევროლიგის მარტის MVP გახდა [VIDEO]
ევროლიგამ დაიწყო გამოკითხვა, რომლის მიზანიც სეზონის საუკეთესო მოთამაშისა და სიმბოლური ხუთეულების გამოვლენაა.
ევროლიგის ვებ-გვერდზე უკვე დაიწყო გამოკითხვა, რომელშიც ნებისმიერ გულშემატკივარს შეუძლია მონაწილეობის მიღება. დარეგისტრირებული მომხმარებელი ირჩევს საუკეთესო მოთამაშეს და საუკეთესო ხუთულის დანარჩენ 4 წევრს. საიტზე რეგისტრაციის გავლა სოციალური ქსელის მეშვეობით შეგიძლიათ. ამისთვის საჭიროა, ავტორიზაცია Facebook-ით, Twvitter-ით ან Google Plus-ით
გულშემატკივართა გამოკითხვის ხვედრითი წილი 25%-ია, ხოლო დანარჩენი 75% მასმედიის წარმომადგენლებს აქვთ, რომელთა სიტყვაც, სავარაუდოდ, გადამწყვეტი იქნება. ევროლიგის ვებგვერდზე გამოკითხვის შედეგები ონლაინრეჟიმში იდება და სასიხარულოა, რომ ამ დროისთვის, 4.85%-ით, თორნიკე შენგელია პირველ ხუთეულში იმყოფება. ესპანური "ბასკონიას" ქართველ მძიმე ფორვარდს მხოლოდ ნიკ კალატესი ("პანათინაიკოსი", 12.33%), ლუკა დონჩიჩი ("რეალი", 8.48%), იან ვესელი ("ფენერბაჰჩე", 7.90%) და ჯეიმს გისტი ("პანათინაიკოსი", 6.71%) უსწრებენ.
გამოკითხვაში წარმოდგენილია გიორგი შერმადინიც, რომლისთვისაც ასევე შესაძლებელია ხმის მიცემა და კარგი იქნება, თუკი შენგელიასთან ერთად ხუთეულში მასაც შევიყვანთ. ხმის მიცემის პროცედურა 4 მაისამდე გაგრძელდება და ხმის მიცემა დღეში ერთხელ იქნება შესაძლებელი.
