"ბათუმი" ოთხთა ფინალშია | "ოლიმპი", "დელტა" და თსუ დაწინაურდნენ

საქართველოს თასის გათამაშების პირველი ოთხთა ფინალისტი ცნობილია. "ბათუმსა" და "ქუთაისს" შორის მეოთხედფინალური სერიის მატჩები ისეა კალენდარში ჩასმული, რომ მეორე მატჩი მაშინ ჩატარდა, როცა 2 სერიაში პირველი შეხვედრები გაიმართა. შედეგად, რეგიონულ დერბიში 2 მატჩის შედეგად გამარჯვებული და შესაბამისად, ოთხთა ფინალისტი გამოვლინდა. ეს გახლავთ ბუბა ბერიშვილის გაწვრთნილი აჭარული გუნდი, რომელმაც სერიის პირველი შეხვედრა 8 მარტს ქუთაისში 2 ქულით მოუგო მასპინძლებს, საპასუხო მატჩში კი უფრო მეტი სხვაობით – 90:79 იმარჯვა და ოთხთა ფინალში გავიდა.

ქუთაისელები ბოლო პერიოდამდე შედეგიანად თამაშობდნენ. კოტე ტუღუშის გაწვრთნილი გუნდი 30 წუთის შემდეგ 3 ქულით იგებდა, თუმცა ბოლო ათწუთეული 16:30 დათმო და თასის გათამაშებას გამოეთიშა. ბათუმელებს კაილი რიდლიმ ულიდერა 24 ქულით, 7 პასითა და 6 ჩაჭრით. 12-12 ქულა სამმა კალათბურთელმა – ჯორდან სეშენმა, ლაშა მიქელაძემ და გიორგი ოჩხიკიძემ დააგროვეს.

"ბათუმი" ოთხთა ფინალში მეტოქეს ელოდება. მისი ნახევარფინალური მეტოქე "დელტასა" და "კაკტუსის" დაპირისპირებაში უნდა გამოვლინდეს. დღეს თბილისის ოლიმპიურ სასახლეში ამ გუნდების მეოთხედფინალური სერიის პირველი მატჩი გაიმართა, რომელშიც გამარჯვებული ბოლო პერიოდში გამოვლინდა. თანაბრად მიმდინარე მატჩი საბოლოოდ გურჯაანის "დელტამ" – 90:82 მოიგო და სერიის საპასუხო მატჩის წინ 8-ქულიანი ჰანდიკაპი შეიქმნა. თუ "კაკტუსი" 22 მარტს 8-ქულაზე მეტით არ იმარჯვებს, ოთხთა ფინალში "დელტა" გავა. 8-ქულიანი გამარჯვების შემთხვევაში კი დამატებითი დრო – ოვერტაიმი დაინიშნება.

დღეს გამართულ თასის გათამაშების მესამე მატჩში ბენეფისი ჰქონდა გივი ბაქრაძეს. "ოლიმპის" და ეროვნული ნაკრების წევრმა შეხვედრა 35 ქულითა და 11 პასით დაასრულა. მას ვერაფერი მოუხერხეს "კავკასიის" მოთამაშეებმა, რომელთა რიგებშიც 25 ქულითა და 14 მოხსნით აიზია ელისი გამოირჩა, თუმცა ეს საკმარისი არ აღმოჩნდა. სუპერლიგაში აპრობირებული დაუმარცხებელი სერია ოლიმპელებმა თასზეც გააგრძელეს და საკმაოდ მძლავრ ოპონენტს 92:85 მოუგეს.