დიდი 10: "ლელო-სარასენსმა" ზედიზედ მესამე გამარჯვება მოიპოვა

თბილისის "ლელო-სარასენსმა" დიდი 10-ის მიმდინარე გათამაშებაში ზედიზედ მესამე შეხვედრა მოიგო და პირველი წრე ლიდერთა სიახლოვეს დაასრულა.

დიდი 10-ის დებიუტანტმა "იუნკერებმა" პირველი წრის ყველა შეხვედრაში ბოლომდე იბრძოლა და მართალია, 9-დან 7 თამაშში დამარცხდა, მაგრამ ყველა მათგანში ნუგეში (7 და ნაკლები ქულის სხვაობით მარცხისთვის) აიღო.

„ლელო არენაზე“ მასპინძლებმა ანგარიში მე-2 წუთზე, ნიკა სვიმონიშვილის სწრაფი ლელოთი გახსნეს და ირაკლი ყიასაშვილიც გარდასახვიდან ზუსტი იყო. რამაზ ხარაზიშვილმა მალევე ჯარიმით უპასუხა, ხოლო მე-14 წუთზე ლევან გომიაშვილმა სტუმრები ლელოთი დააწინაურა და ხარაზიშვილმა გარდასახვით უპირატესობა გაზარდა - 7:10.

ყიასაშვილმა ჯარიმით წონასწორობა 3 წუთში აღადგინა. "ლელო-სარასენსმა" ლიდერობა 33-ე წუთზე დაიბრუნა, როდესაც ყიასაშვილმა ლელო გაიტანა და გარდასახვაც თავადვე შეასრულა. ტაიმის ბოლოს "იუნკერებმა" ვახტანგ კავთიძის ლელოთი უპასუხა, მაგრამ გარდასახვა არაზუსტი იყო და მასპინძლები შესვენებაზე 2-ქულიანი უპირატესობით გავიდნენ.

მეორე ტაიმის დასაწყისში "ლელო-სარასენსმა" გამარჯვება, პრაქტიკულად, დაიბევა. არჩილ აბესაძისა და თენგიზ პერანიძის ლელოებს ყიასაშვილის ზუსტი გარდასახვები მოჰყვა და ანგარიში 31:15 გახდა. "იუნკერები" არ დანებდა და 57-ე წუთზე საჯარიმო ლელო გამოიმუშავა. 75-ეზე ხარაზიშვილმა ჯარიმა გაიტანა და სხვაობა 6 ქულამდე დაიყვანა, რითაც საკუთარ გუნდს ქულა მოუპოვა - 31:25.

"ლელო-სარასენსი" 26 ქულით "აკადემიასთან" მესამე-მეოთხე ადგილებს იყოფს და 3 ქულით ჩამორჩება ლიდერს, ხოლო "იუნკერები" 15 ქულით მე-7 პოზიციაზეა.