გიორგი ჭყოიძე: ეს მხოლოდ ციფრებია

"ბორჯღალოსანთა" კვაჭმა გიორგი ჭყოიძემ 11 თებერვალს ამსტერდამში ნიდერლანდებს მეორე ტაიმის დასაწყისში, 8 წუთის ინტერვალით ორი ლელო გაუტანა.

52-ე წუთზე ის მოლს დროულად მოწყდა და დუბლი გაიფორმა. ეს მატჩში საქართველოს მე-4 ლელო იყო და მე-500 რაგბი ევროპის ჩემპიონატში (და მის წინამორბედ ერთა თასზე), რომელშიც საქართველო 2000 წლიდან რეგულარულად თამაშობს და დღემდე 115 შეხვედრა ჩაატარა.

„რა თქმა უნდა, არ ვიცოდი, რადგან მორაგბეები ლელოებს არასდროს ვითვლით. მთავარია, რომ ჩვენ მიერ გატანილმა ლელომ გუნდს მოუტანოს წარმატება, დანარჩენი კი მხოლოდ ციფრებია, რომლებიც ჩვენთვის არაფერს ნიშნავს“ – აღნიშნა ჭყოიძემ, რომელიც რაგბი ევროპამ იმ შეხვედრის საუკეთესო მოთამაშედ დაასახელა.

2023 წლის რაგბი ევროპის ჩემპიონატის მეორე მატჩი "ბორჯღალოსნებმა" 40:8 მოიგო. საქართველომ ნიდერლანდებს ჯამში 6 ლელო გაუტანა, თუმცა, როგორც სამწვრთნელო შტაბი, ასევე თავად მორაგბეები, საკუთარი თამაშის ხარისხით უკმაყოფილო დარჩნენ:

„დავალებები ვერ შევასრულეთ. ვინც უნდა იყოს მეტოქე, იქნება ეს ტიერ1-ის წარმომადგენელი თუ ნიდერლანდები, ჩვენი თავისგან მაქსიმუმს ვითხოვთ. ამსტერდამში ინდივიდუალურად უფრო ვითამაშეთ, ვიდრე გუნდურად, რამაც ხარისხის კუთხით დიდი გავლენა იქონია. ჩვენთვის კი გუნდური თამაში ძლიერი მხარეა და ვიმედოვნებთ, მომდევნო შეხვედრა ბევრად უფრო ხარისხიანი იქნება“ – აღნიშნავს ჭყოიძე,

ის გუნდთან ერთად უკვე ესპანეთშია და მომდევნო შეხვედრისთვის ემზადება, რომელიც 18 თებერვალს ტორელავეგაში, ჩვენი დროით 22 საათზე დაიწყება, მეტოქე კი მასპინძელი ესპანეთი იქნება: