ლეგიონერები: ბრეგვაძემ ზე-რაგბის სეზონი ლელოთი გახსნა

სანაკრებო სეზონის გახსნის პარალელურად, სამხრეთ ნახევარსფეროში მსოფლიოს ერთ-ერთი უძლიერესი საკლუბო ჩემპიონატი, ზე-რაგბი დაიწყო და "ბორჯღალოსანმა" ჯაბა ბრეგვაძემ პირველსავე ტურში ლელო გაიტანა.

32 წლის კვაჭის გუნდი, იაპონური "სანვულვზი" საკუთარ მოედანზე ავსტრალიურ "რებელსს" დაუხვდა და ლამაზ სტილში, 36:27 დაამარცხა. იაპონელებმა მეტოქეს 5 ლელო გაუტანეს, თავად კი ოთხი გაუშვეს.

ბრეგვაძე სასტარტო შემადგენლობაში იყო, მე-18 წუთზე ბურთი 5-მეტრიან დერეფანში ააგდო, მის კუდში მოექცა და შეტევა ლელოთი დაასრულა. ქართველი კვაჭი სუპერრაგბიში მესამე სეზონს ატარებს და ამ პერიოდში ლელო მეორედ გაიტანა. "რებელსთან" მატჩში მან მოედანზე 71 წუთი გაატარა, ბურთით ხელში 8-ჯერ შეუტია, ერთხელ ხაზი სუფთად გაჭრა და ჯამში 9 მეტრი მოიგო. დაცვაში მან 11 ბოჭვა შეასრულა. აღსანიშნავია, რომ საათის თავზე "სანვულვზი" მეტოქეს 36:13 ამარცხებდა და ორი ლელო დასკვნით 15 წუთში გაუშვა.

"სანვულვზი" სუპერრაგბის მომდევნო მატჩს 15 თებერვალს გამართავს და ახალზელანდიურ "ჩიფსს" უმასპინძლებს.

საფრანგეთის პრო დე2-ის მე-19 ტურის პირველ შეხვედრაში "ბიარიცმა" "ანგულემი" მიიღო და 20:8 დაამარცხა. მასპინძელთა სასტარტო შემადგენლობაში იყო მარცხენა ბურჯი გიორგი ნუცუბიძე, რომელიც შესვენებისას შეცვალეს, თუმცა 61-ე წუთზე მოედანზე მოუწია დაბრუნება. "ბიარიცის" განაცხადში იყო, მაგრამ არ უთამაშია ვახტანგ ახობაძეს. სტუმართა შორის 57-ე წუთიდან ითამაშა ლუკა გოგინავამ.

"ოიონა" "მონტობანს" ეწვია, 15:21 დამარცხდა და 57 ქულით მე-4 ადგილზე დარჩა. სტუმართა შორის პირველიდან 63-ე წუთამდე ითამაშა ირაკლი მირცხულავამ.

"მონ-დე-მარსანმა" "ორიაკი" მიიღო და 23:20 დაამარცხა. ორივე გუნდის შემადგენლობაში ორ-ორმა ქართველმა ლეგიონერმა ითამაშა. მასპინძლებმა თამაში ქართველი ბურჯებით დაიწყეს. გელა მურუსიძემ მოედანზე 50 წუთი გაატარა. ლაშა მაჭარაშვილმა 38-ე წუთზე ყვითელი ბარათი მიიღო და სინბინის ვადის გასვლის შემდეგ თამაშში აღარ დაბრუნებულა. "ორიაკის" შემადგენლობაში 57-ე წუთიდან გამოჩნდნენ გიორგი ჯავახია და ჯემალ შათირიშვილი.

აუტსაიდერმა "ვალანსმა" ერთ-ერთი ლიდერი "კოლომიე" მიიღო და დიდი ბრძოლა გაუმართა, თუმცა გამარჯვებამდე ქულა დააკლდა. "ვალანსის" შემადგენლობაში 62 წუთი ითამაშა მირიან ბურდულმა.

"ვანმა" "პროვანსი" მიიღო და 16:6 დაამარცხა. "პროვანსის" რიგებში 36-ე წუთიდან გამოჩნდა ზაზა ნავროზაშვილი, ხოლო მასპინძელთა შორის 56-ე წუთიდან ითამაშა ნიკა ნეფარიძემ.

"ნევერი" "გრენობლს" ქართველი ბურჯებით დაუხვდა და 27:18 დაამარცხა. მასპინძელთა სასტარტო შემადგენლობაში იყვნენ ილია კაიკაციშვილი და თორნიკე მატარაძე. პირველმა მოედანზე 50, ხოლო მეორემ 53 წუთი გაატარა.