21 მაისს, მოლოდინისამებრ, „ნაღდი“, სამოყვარულო რაგბის ზეიმი გაიმართა "რაგბი პლატოზე". სამოყვარულო პერიოდის დროინდელი, ტრადიციული რაგბის ტურნეს ფარგლებში, თურქეთის უძველესი კლუბი "ისტანბულ ოტომანსი" საქართველოს უძველეს სამოყვარულო კლუბ "დევებს" „რაგბი პლატოზე“ ესტუმრა.თამაშის წინ გუნდები უფრო იმიტომ, რომ შეჩვეულნი არიან და არა იმიტომ, რომ საჭირო იყო, გახურდნენ. ვინაიდან ორივე გუნდში საერთო ასაკი 45-50 წელი იყო, სამოყვარულო რაგბის საუკეთესო ტრადიციების შესაბამისად, "დევები" და "ოსმალოები" მორიგდნენ, რომ შერკინებაში არ მიაწვებოდნენ და რომ შეცვლებიც შეუზღუდავი იქნებოდა. ამ დროს ისიც გაირკვა, რომ სტუმრები სულ 16-ნი იყვნენ.
აღსანიშნავია, რომ ამ დღეს ორმა "დევმა" დიდი ხნის ოცნება აიხდინა – გიორგი ტორონჯაძემ და ლევან ჯაშმა შვილებთან ერთად ითამაშეს.
საბოლოო ჯამში "დევებმა" სტუმრებს 8 ლელო დაუდო და პასუხად 5 მიიღო. თამაშის მერე კი, მესამე ტაიმის ტრადიცია, რომელიც სამოყვარულო რაგბის ყველაზე მნიშვნელოვანი თუ არა, ერთ-ერთი ყველაზე მნიშვნელოვანი ნაწილია, არ დარღვეულა.
სექტემბერში "ოტომანსი" "დევებს" საპასუხო ტურნეზე ელოდება.
rugby.ge
![alt](/pictures/image50/840d57934e67a892403cc573bd138c87.jpg ""დევებმა" "ოტომანსს" პლატოზე აჯობა")
თბილისელი "დევები" "სტამბოლელი ოსმალების" წინააღმდეგ
