"ლობუშები" - "ბორჯღალოსნების" ყველაზე უხერხული მეტოქე ერთა თასზე

"საწყის ათ წუთში ზუსტად ის თამაში ვაჩვენეთ, რაზეც გამუდმებით ვმუშაობთ. ყველაფერი გამოგვდიოდა და ლელოც გავიტანეთ. ამის გამო, შეიძლება ითქვას, ზედმეტად თავდაჯერებულები გავხდით, მორაგბეებმა ინდივიდუალურად დაიწყეს თამაში. შედეგად, პირველი ტაიმის ბოლო 20 წუთი საშინელება იყო", - თქვა ნამატჩევს საქართველოს ნაკრების ახალზელანდიელმა მთავარმა მწვრთნელმა მილტონ ჰეიგმა.

საწყისი ათი წუთი მართლაც ფანტასტიკური იყო. "ბორჯღალოსნები" ისე გაისარჯნენ, ისე იოლად გამოსდიოდათ ფაზების აკინძვა, როგორც ამას ერთ ჩვეულებრივ ვარჯიშზე აკეთებენ. მერე კი კარგა ხნის განმავლობაში ყველაფერი აირია.

მართალია, მეტოქეს 22-მეტრიან ზონაში შესვლის საშუალება პირველად 30-ე წუთზე მისცეს, მაგრამ ფაქტია - რაიმე ღირებულის შექმნას ვერც ჩვენი გუნდი ახერხებდა. ამის მიზეზი კი, უწინარესად, ტექნიკური წუნი იყო".

ასე იწყება "ლელოში" გაკეთებული მატჩის რეპორტაჟი, რომელიც შარშან თბილისში, მიხეილ მესხის სახელობის სტადიონზე გაიმართა. მაშინ საქართველოს ნაკრებმა პორტუგალიის ეროვნულ გუნდს უმასპინძლა და 25:12 მოუგო.

საქართველო-პორტუგალია 25:12 - ბევრი შრომა გვჭირდება, გუნდი იზრდება [VIDEO]

ის სეზონი "ლობუშებმა" აშკარად ჩააგდეს. მათ ხუთი მატჩიდან მხოლოდ ერთი მოიგეს, ერთი ფრედ დაამთავრეს და სამი წააგეს. შედეგად, პორტუგალიის ნაკრებმა შვიდი ქულა დააგროვა და ახლა ერთა თასის გათამაშებაში ადგილის შესანარჩუნებლად იბრძვის.

ცხადია, "ლობუშებისთვის", რომლებმაც 2007 წლის მსოფლიოს თასის გათამაშებაში იასპარეზეს და შვიდკაცა რაგბიში ძალიან ძლიერი გუნდი ჰყავთ, ასეთი მდგომარეობა მიუღებელია.

არადა, ერთა თასის წლევანდელი გათამაშების კალენდარი იმდენად რთული აქვთ, ადვილი შესაძლებელია, ბოლო ადგილს გამოჰკრან ხელი.

მივყვეთ თანმიმდევრულად. პირველ მატჩს პორტუგალიის ნაკრები სტუმრად გამართავს ბუქარესტში რუმინეთის ნაკრებთან. ცხადია, ამ მატჩში ლუზიტანელების გამარჯვების შანსი მიზერულია.

მეორე ტურში კი მეტოქედ ლისაბონში საქართველოს ნაკრები ეყოლებათ. პორტუგალიელები, სავარაუდოდ, ყველა ღონეს იხმარენ, რათა ჩვენი გუნდი შინაურ კედლებში დაამარცხონ, რადგან მომდევნო ორ თამაშს სტუმრად ბელგიისა და რუსეთის ნაკრებებთან გამართავენ. გამარჯვება მათ ორივე ვიზავის ჰაერივით სჭირდება და, ძნელი სავარაუდოა, პორტუგალიელები ამ ქვეყნებიდან გახარებულნი წამოვიდნენ.

ბოლო მატჩში პორტუგალიის ნაკრების მეტოქე შინ მეზობელი ესპანეთი იქნება. ეგრეთ წოდებული პირინეული დერბი ყოველთვის დაძაბულ, უშეღავათო ბრძოლაში მიმდინარეობს და "ლობუშებს", ცხადია, გამარჯვების გარანტიას ვერავინ მისცემს, მით უფრო, რომ ერთა თასზე ადგილის შენარჩუნებას ესპანეთის ნაკრებიც შეეცდება.

ერთი სიტყვით, პორტუგალიის ნაკრებმა გადასარჩენად შინ ორივე თამაში უნდა მოიგოს, მათ შორის, საქართველოს ნაკრებთანაც. ეს კი იმის დასტურია, რომ ლისაბონში იოლი გასეირნება არ გვექნება და არც არასდროს გვქონია.

"ლობუშები" ერთა თასზე ჩვენთვის ყველაზე უხერხული მეტოქეა, თუმცა მაინც ვფიქრობთ, რომ დროა, გადავლახოთ ეს თავსმოხვეული პირობითობა და მეტოქეს სათამაშო კლასის ხარჯზე წარმატების მიღწევის იოტისოდენა იმედიც არ დავუტოვოთ.

საამისოდ კი იმ ტექნიკური წუნის მინიმუმამდე დაყვანაა საჭირო, რომელზეც შარშანდელი მატჩის რეპორტაჟში ვსაუბრობდით. ამასთან ერთად, შესანიშნავი საწყისი ათი წუთი მინიმუმ სამოც წუთად უნდა გადავაქციოთ.

ევროპის ერთა თასი
სატურნირო მდგომარეობა
ა გ თ მ ფ წ ბ ქ
1. საქართველო 5 4 1 0 +74 19
2. რუმინეთი 5 4 1 0 +49 19
3. რუსეთი 5 3 0 2 -6 14
4. პორტუგალია 5 1 1 3 -21 7
5. ბელგია 5 0 1 4 -39 5
6. ესპანეთი 5 0 2 3 -57 5

2014 წელი. 8 თებერვალი
პორტუგალია-საქართველო

ყოველდღიური სპორტული გაზეთი "ლელო"

ასევე იხილეთ:
"ბორჯღალოსნები" გაბრაზებულები არიან - ჭკუის სასწავლებელი გაკვეთილი "შავი ეშმაკებისგან"