ქართული ლეგიონი: "მე ვარ შარლი"

საფრანგეთის ჩემპიონატის ელიტურ, პირველ დივიზიონში მე-16 ტურის ყველა მატჩი წუთიერი დუმილით დაიწყო.

მორაგბეები თეთრ მაისურებში იყვნენ გამოწყობილნი, რომელზეც, ცხადია, ფრანგულად ეწერა: "მე ვარ შარლი". ტრაგედიამ, რომელიც საფრანგეთში დატრიალდა, გულგრილი არავინ დატოვა და საერთო მწუხარებას მორაგბეებიც შეუერთდნენ.

ამასობაში კი, მე-16 ტურის მატჩების შემდეგ პირველ დივიზიონში ორხელისუფლებიანობა დამყარდა.

50-50 ქულით სატურნირო ცხრილის სათავეში ქართველ მორაგბეთა გუნდები - "კლერმონი" და "სტად ფრანსე" არიან. პარიზელებმა ყველაზე ადრე ითამაშეს და შინ აუტსაიდერ "კასტრს" დიდი ანგარიშით მოუგეს - 49:13.

ეს შეხვედრა "სტად ფრანსეს" იტალიელი მესამეხაზელის, სერჯო პარისეს ბენეფისად იქცა.

არგენტინული წარმოშობის პარიზელთა ლიდერმა ჩვეული ფორმა დაიბრუნა და მეტოქეს სამი ლელო გაუტანა.

დავით ქუბრიაშვილი თამაშში 62-ე წუთიდან ჩაერთო, ზურაბ ჟვანია მოედანზე ექვსი წუთის შემდეგ გამოჩნდა.

შინ ითამაშა დავით ზირაქაშვილისა და ვიქტორ კოლელიშვილის "კლერმონმაც". "ვულკანებმა" გოდერძი შველიძის, კარლენ ასეიშვილისა და ანტონ ფეიქრიშვილის "ბრივი" დაამარცხეს - 44:20. სტუმრებმა მეტოქეს საკადრისი წინააღმდეგობა მხოლოდ 31-ე წუთამდე გაუწიეს. მასპინძლები ამ დროისთვის მხოლოდ ექვსი ქულით - 6:0 იგებდნენ. მერე თამაში "გაიხსნა" და გუნდებმა ჯამში ცხრა ლელო გაიტანეს.

ზირაქაშვილი თამაშში 53-ე წუთიდან ჩაერთო, შველიძე ძირითად შემადგენლობაში იყო და 45-ე წუთზე ასეიშვილმა შეცვალა, ფეიქრიშვილი განაცხადში არ იყო, კოლელიშვილი ტრავმირებულია.

ზედიზედ ორი მარცხის შემდეგ მორიგი მოგება მიითვალა მამუკა გორგოძის, ლევან ჩილაჩავასა და კონსტანტინე მიქაუტაძის "ტულონმა". საფრანგეთისა და ევროპის ჩემპიონებმა უშუალო კონკურენტს, დავით ხინჩაგიშვილის "მეტრო რასინგს" უმასპინძლეს და 32:23 მოუგეს. ტულონელები ინიციატივას თავიდანვე დაეუფლნენ და გამარჯვებულის ვინაობა მატჩის განმავლობაში ეჭვქვეშ წამითაც არ დამდგარა.

გორგოძე განაცხადში იყო, თუმცა მოედანზე არ გამოჩენილა, ჩილაჩავა და მიქაუტაძე განაცხადში არ იყვნენ, ხინჩაგიშვილი ტრავმირებულია.

საპლეიოფო ზონაში იმყოფება კიდევ ერთი ქართველის, ზაზა ნავროზაშვილის "ბორდო", რომელმაც შინ დაამარცხა "გრენობლი" - 34:16. შერკინების ქართველ ბურჯს არ უთამაშია.

ვასილ კაკოვინის "ტულუზმა" მძიმე გამარჯვება მოიპოვა შინ აუტსაიდერთან, ლექსო ყაულაშვილის "ლა როშელთან" - 29:26. ტულუზელები 47-ე წუთისთვის 16 ქულის სხვაობით იგებდნენ - 26:10, თუმცა სტუმრებს, რომლებსაც დასაკარგი აღარაფერი აქვთ, თითქოს მეორე სუნთქვა გაეხსნათ. თუმცა ფრანგული რაგბის გრანდმა მაინც შეძლო მისთვის სასურველი ანგარიშის შენარჩუნება.

კაკოვინი თამაშში 56-ე წუთიდან ჩაერთო, ყაულაშვილი მოედანზე 13 წუთის შემდეგ გამოჩნდა.

მიხეილ ნარიაშვილის "მონპელიემ" სტუმრად წააგო "ოიონაქსთან" - 13:20. საქართველოს ნაკრების შერკინების ბურჯი ძირითად შემადგენლობაში იყო და 55-ე წუთზე შეცვალეს.

I დივიზიონი
XVI ტური
სტად ფრანსე-კასტრი 49:13, ტულონი-მეტრო რასინგი 32:23, ბაიონი-ლიონი 23:22, ბორდო-გრენობლი 34:16, ოიონაქსი-მონპელიე 20:13, ტულუზი-ლა როშელი 29:26, კლერმონი-ბრივი 44:20.

სატურნირო მდგომარეობა
1. კლერმონი - 50 ქულა, 2. სტად ფრანსე - 50, 3. ტულონი - 47, 4. მეტრო რასინგი - 41, 5. ბორდო - 40, 6. გრენობლი - 38, 7. ტულუზი - 37, 8. მონპელიე - 35, 9. ოიონაქსი - 33, 10. ბაიონი - 32, 11. ბრივი - 31, 12. ლიონი - 31, 13. კასტრი - 28, 14. ლა როშელი - 26.

XVII ტური
ბრივი-გრენობლი, კასტრი-ტულუზი, ლა როშელი-კლერმონი, ლიონი-მეტრო რასინგი, მონპელიე-ბორდო, სტად ფრანსე-ოიონაქსი, ტულონი-ბაიონი.

მეორე დივიზიონში მე-16 ტურის მატჩების შემდეგ ლიდერთა შორის ცვლილება არ მომხდარა. აქ პირველობას არავის უთმობს გიორგი ნაცარაშვილის "პო", რომელმაც სტუმრად დაამარცხა "დაქსი" - 20:3. ნაცარაშვილი ძირითად შემადგენლობაში იყო.

ლიდერს კვალში უდგას ვახტანგ მაისურაძისა და ბექა შეყლაშვილის "ალბი", რომელმაც შინ მოუგო "ბურგუენს" - 16:9. მაისურაძემ სრულად ითამაშა, შეყლაშვილი მოედანზე 28-ე წუთიდან გამოჩნდა.

საპლეიოფო ზონას მიუახლოვდა მერაბ შარიქაძის, ლევან დათუნაშვილისა და ნიკოლოზ ხატიაშვილის "ორიაკი", რომელმაც ლიდერთა ჯგუფის წარმომადგენელ "ბიარიცს" სძლია - 24:20.

შარიქაძემ თავიდან ბოლომდე ითამაშა, დათუნაშვილს ოთხკვირიანი დისკვალიფიკაცია აქვს, ხატიაშვილი განაცხადში არ იყო.

პლეი ოფში მოხვედრის შანსი ჯერ კიდევ აქვს თამაზ მჭედლიძისა და გიორგი თეთრაშვილის "აჟენს", რომელმაც შინ დაამარცხა გიორგი ნემსაძის, კახაბერ კობერიძისა და ირაკლი მირცხულავას "ტარბი" - 31:9.

მჭედლიძე ძირითად შემადგენლობაში იყო და 41-ე წუთზე შეცვალეს, თეთრაშვილი მატჩში 54-ე წუთიდან ჩაერთო, მირცხულავა მე-60 წუთზე კობერიძემ შეცვალა, ნემსაძე განაცხადში არ იყო.

ლაშა ლომიძის "ბეზიემ" შინ დაამარცხა "კოლომიე" - 22:6. საქართველოს ნაკრების მესამეხაზელს არ უთამაშია.

მნიშვნელოვანი გამარჯვება მოიპოვა შინ შალვა სუთიაშვილის, ელიზბარ ყუფარაძის, დავით აშვეთიას, დავით დადუნაშვილისა და ვახტანგ ახობაძის "მასიმ". პარიზელებმა საკმაოდ საინტერესო ბრძოლაში "მონ დე მარსანი" დაამარცხეს - 39:32. აშვეთია და სუთიაშვილი ძირითად შემადგენლობაში იყვნენ, ყუფარაძე მოედანზე მეორე ტაიმში გამოჩნდა, დადუნაშვილსა და ახობაძეს არ უთამაშიათ.

II დივიზიონი
XVI ტური
აჟენი-ტარბი 31:9, ალბი-ბურგუენი 16:9, ორიაკი-ბიარიცი 24:20, ბეზიე-კოლომიე 22:6, ნარბონი-მონტობანი 28:24, დაქსი-პო 3:20, მასი-მონ დე მარსანი 39:32.

სატურნირო მდგომარეობა
1. პო - 53 ქულა, 2. ბიარიცი - 44, 3. ალბი - 44, 4. პერპინიანი - 41, 5. ორიაკი - 40, 6. მონ დე მარსანი - 39, 7. მონტობანი - 39, 8. აჟენი - 39, 9. ბეზიე - 35, 10. კოლომიე - 35, 11. კარკასონი - 32, 12. ტარბი - 31, 13. მასი - 30, 14. ნარბონი - 25, 15. დაქსი - 22, 16. 16. ბურგუენი - 21.

XVII ტური
ბეზიე-მასი, კარკასონი-ორიაკი, მონტობანი-დაქსი, პო-ნარბანი, ტარბი-ბურგუენი, ბიარიცი-ალბი, კოლომიე-პერპინიანი, მონ დე მარსანი-აჟენი.

ინგლისის ჩემპიონატის მე-13 ტურში საქართველოს ნაკრების შერკინების კვაჭის, შალვა მამუკაშვილის "სეილ შარქსმა" შინ დაამარცხა გათამაშების ლიდერი "ნორსჰემპთონი" - 20:7.

აღსანიშნავია, რომ ამ ტურში ყველა შეხვედრა მასპინძლების გამარჯვებით დასრულდა, რაც ძალზე იშვიათობაა. მამუკაშვილი განაცხადში არ იყო. "ზვიგენები" 34 ქულით ახლა მე-8 ადგილზე არიან.

ინგლისი
XIII ტური
გლოსტერი-სარასენზი 24:23, სეილ შარქსი-ნორსჰემპთონი 20:7, ბასი-ვოსფსი 39:26, ჰარლიქვინზი-ლესტერ ტაიგერზი 32:12, ნიუკასლი-ლონდონ ველში 38:7, ლონდონ აირიში-ექსეტერი 28:26

სატურნირო მდგომარეობა
1. ნორსჰემპთონი - 48 ქულა, 2. ბასი - 47, 3. სარასენზი - 39, 4. ვოსფსი - 36, 5. ლესტერ ტაიგერზი - 35, 6. ექსეტერი - 34, 7. ჰარლიქვინზი - 34, 8. სეილ შარქსი - 34, 9. გლოსტერი - 29, 10. ნიუკასლი - 21, 11. ლონდონ აირიში - 20, 12. ლონდონ ველში - 1.

XIV ტური
ექსეტერი-ნიუკასლი, ლესტერი-გლოსტერი, ნორსჰემპთონი-ლონდონ აირიში, ვოსფსი-ჰარლიქვინზი, ლონდონ ველში-სეილ შარქსი, სარასენზი-ბასი.

ყოველდღიური სპორტული გაზეთი "ლელო"