როგორც პრემიერმა აღნიშნა, 8 მედალი ისტორიული შედეგია დამოუკიდებელი საქართველოს ისტორიაში.
„ჩემთვის დიდი პატივია დღეს აქ ყოფნა და თქვენთან შეხვედრა. მივესალმები პლანეტის ყველაზე ძლიერ ადამიანს, ლაშა ტალახაძეს, მივესალმები ლაშა ბექაურს, ვაჟა მარგველაშვილს, ლაშა შავდათუაშვილს, იაკობ ქაჯაიას, გენო პეტრიაშვილს, ანტონ პლესნოის, გურამ თუშიშვილს, რომელიც საპატიო მიზეზით ვერ გვესწრება დღეს.
ძვირფასო ოლიმპიელებო, ჩვენო საამაყო გმირებო. თქვენ, მართლაც საოცარი შედეგი დადეთ. 8 მედალი, მართლაც ისტორიული შედეგია დამოუკიდებელი საქართველოს ისტორიაში. მედლების რაოდენობის მიხედვით, საქართველო მსოფლიოში ტოპ 10-ეულში შევიდა. მადლობა ამისთვის თქვენ, მადლობა გამარჯვებისთვის. მთავრობის სახელით მადლობას მოგახსენებთ.
მაქვს პატივი, გაგაცნოთ ჩემი გადაწყვეტილება. მოგეხსენებათ, რომ წასვლის წინ გაგაცანით, რომ ოქროს მედლის მფლობელი მიიღებს 1 მლნ ლარს, ახლა რაც შეეხება ვერცხლის მედლის მფლობელებს, მინდა გაცნობოთ, რომ 500 000 ლარი იქნება თქვენი ჯილდო, ბრინჯაოს მედლის მფლობელი მიიღებს - 250 000 ლარი “,-აღნიშნავს პრემიერი.
როგორც პრემიერმა აღნიშნა, ისინი მომავალი თაობისთვის მაგალითს წარმოადგენენ.
„მინდა, მადლობა გადავუხადო ყველას, ექიმებს, მწვრთნელებს, ყველა იმ ადამიანს, ვინც თქვენს გვერდით იდგა. მე კარგად მესმის, რას ნიშნავს, ოლიმპიელობა, მთელი ქვეყნის სახელით წარსდგე მსოფლიო არენაზე და მოიპოვო ასეთი ბრწყინვალე გამარჯვება. მე ისიც ვიცი, თუ რა დგას ამ შედეგის უკან. ამ შედეგის მიღმა დგას თქვენი თავდაუზოგავი შრომა, თავდადება და თავგანწირვა ჩვენი ქვეყნის და ხალხის სახელით. მადლობა თქვენ, ჩვენი მომავალი თაობისთვის მაგალითი ხართ, შვილებისთვის, რომლებიც თქვენ გიყურებენ, სწორედ თქვენს მაგალითებზე უნდა აღიზარდონ. ღმერთი იყოს თქვენი მფარველი“,-აღნიშნა პრემიერმა.
წყარო: IPN.GE
ლაშა ტალახაძე ოლიმპიური ჩემპიონია! [VIDEO]
