თენგიზ გაჩეჩილაძე სოჭიდან: სასტუმროს ნომერი საშინლად დაბინძურებული დაგვხვდა

ზამთრის 2014 წლის ოლიმპიადაზე აკრედიტებულ ჟურნალისტებს სოჭში რთული სამუშაო პირობები დახვდათ. როგორც გაზეთ "ლელოს" მთავარი რედაქტორი თენგიზ გაჩეჩილაძე სოჭიდან იუწყება, ჟურნალისტთა დასახლებაში სასტუმროს რემონტი დასრულებული არ არის და გაუმართავია ინტერნეტის მუშაობა.

"პირველი პრობლემა, რაც სასტუმროში შესახლების დროს დაგვხვდა, ის არის, რომ სასტუმროს შენობებს ჯერ კიდევ გარედან არემონტებდნენ. თურმე, შიგნითაც ბევრი რამ არის გასაკეთებელი.

სასტუმროს ნომერი, სადაც ჩვენამდე, როგორც ჩანს, ვიღაც ცხოვრობდა, საშინლად დაბინძურებული და არეული დაგვხვდა. ყველაზე მთავარი ის არის, რომ გამართულად არ მუშაობს ინტერნეტი და გაზეთისთვის მასალის გადმოსაცემად დიდი ძალისხმევა დამჭირდა", - აცხადებს გაჩეჩილაძე.

მისი თქმით, ჟურნალისტები, რომლებიც სოჭის ოლიმპიადაზე იმყოფებიან, ერთ დასახლებაში ცხოვრობენ და ყველას ერთნაირი პრობლემები აქვს.

ამასთან, "ლელოს" რედაქტორის თქმით, სოჭის ოლიმპიადაზე მყოფ ქართულ დელეგაციას განსაკუთრებული ყურადღებით ექცევიან, რასაც დელეგაციის წევრებიც ადასტურებენ.

"ოლიმპიურ სოფელში, სადაც სპორტსმენები იმყოფებიან, როგორც ჩვენმა ხელმძღვანელებმა აღნიშნეს, შედარებით კარგი პირობებია. საცხოვრებელ პირობებთან დაკავშირებით, პრობლემები არ აქვთ. რაც შეეხება დამოკიდებულებას, მათ აღნიშნეს, რომ ძალიან გულთბილი დამოკიდებულებაა ჩვენი დელეგაციისადმი, როგორც ოლიმპიურ სოფელში, ისე გარეთ", - განაცხადა თენგიზ გაჩეჩილაძემ.

წყარო: interpressnews.ge

ასევე იხილეთ:
თენგიზ გაჩეჩილაძე სოჭიდან: 50 წუთი... ოლიმპიადამდე [PHOTO]