კიდევ როდის გამოჩნდება ფორმულა 1-ში ქალი პილოტი? თამამი შეკითხვაა AUTOSPORT-ის ახალი ნომრის გარეკანისთვის, ხოლო რედაქტორმა ედ სტრომ თამამი სვლა გააკეთა, როცა ქალ პილოტებს ცალკე გამოშვება დაუთმო. ეს დიდი პატივია, - ასე დაიწყო თავისი მონოლოგი "უილიამსის" ტესტპილოტმა სიუზი ვოლფმა.
ჩვენს სახეობას, ქალების მონაწილეობის მხრივ, ისტორიის მხოლოდ რამდენიმე ფურცელი გააჩნია. დღეისთვის, ქალთა სპორტმა კარგი იმპულსი მიიღო - უბრალოდ, შეხედეთ ქალთა ფეხბურთში ამასწინანდელ მსოფლიოს თასს, რომელიც კანადაში გაიმართა. ეჭვგარეშეა, რომ დროება შეიცვლება ავტოსპორტშიც.
ადრე ჩვენ ვხედავდით პიონერებს - დივინ გალიკისა და ლელა ლომბარდის.
საბოლოოდ, ყველაფერი დადის იქამდე, რომ უნდა არსებობდეს შესაძლებლობა - დაბალ სარბოლო სერიებში მეტი შანსი მიეცეთ ნიჭიერ გოგონებს. ეჭვგარეშეა, რომ საწყის ეტაპებზე ქალებს უფრო მეტი მუშაობა სჭირდებათ ნდობის მოსაპოვებლად, რადგან არსებობს დიდი ეჭვი ჩვენს შესაძლებლობებზე.
თუ გადავხედავთ ჩემი კარიერის განვითარებას, ყოველ ეტაპზე მიწევდა პირველი ნაბიჯის გადადგმა და ორივე ხელით შანსისთვის ჩაბღაუჭება. DTM-ში ჩემი მონაწილეობა დაიწყო "მერსედესის" მანქანით ტესტებში გამოსვლით. ამის შემდეგ გუნდში ადგილი მივიღე, გერმანული ენა ვისწავლე და პროგრამაში ჩავერთე. იმ მანქანით, რომელიც ჩემს განკარგულებაში იყო, უდიდესი სამუშაო გავწიე.
იგივე იყო "უილიამსში": იქაც ტესტების ჩატარების შანსი მომცეს და ჩემი გამოსვლით დავამტკიცე, რომ ვიმსახურებ თანამშრომლობის გაგრძელებას.
არასოდეს დამავიწყდება 2013 წელს, სილვერსტოუნში, ახალგაზრდულ ტესტებში მონაწილეობა, როცა ინჟინრები ვერ ჩამოყალიბდნენ მუშაობის საბოლოო გეგმაზე, რადგან, უბრალოდ, არ იცოდნენ, რამდენი წრე უნდა გამევლო. მაგრამ კარგად მოვემზადე, ბევრს ვვარჯიშობდი და სრულფასოვანი დღე ჩავატარე.
რა თქმა უნდა, ერთ-ერთი განსახილველი თემაა ფიზიოლოგიური ასპექტი, რადგან ქალის კუნთის მასა, 30 პროცენტით ნაკლებია მამაკაცისაზე. მაგრამ, ბარსელონაში წინასასეზონო ტესტებისას, სრულფასოვანი სარბოლო დისტანცია გავიარე და საკუთარი შესაძლებლობები გამოვავლინე.
ასი პროცენტით ვარ დარწმუნებული, რომ ფორმულა 1-ში ქალების მონაწილეობისთვის ფიზიკური წინაღობები არ არსებობს.
სინანულის გრძნობა არასოდეს მქონდა იმის გამო, რომ კარიერის მსვლელობისას, საკუთარ გენდერულ კუთვნილებას ვიყენებდი. რატომ უნდა უარვყო საკუთარი ქალურობა იმის გამო, რომ შევესაბამებოდე სარბოლო სამყაროს მოლოდინს? მე ქალი ვარ, ვმართავ სარბოლო მანქანას და თუ სპონსორობისა და მხარდაჭერის მხრივ, ეს გარკვეულ უპირატესობას მაძლევს, მას მაქსიმალურად ვიყენებ.
ასეთია რბოლები: თქვენ ეძებთ უპირატესობას მეტოქეებზე და იყენებთ მას. ამან, შეიძლება გახსნას ახალი კარი ჩემთვის და სხვა ქალი მრბოლელებისთვის, რაც მართლაც შესანიშნავია.
რეალურად ვაფასებ ამჟამინდელ საკუთარ მდგომარეობას. თუ წესები არ შეიცვლება და ტესტებსა და რბოლებში შანსს მხოლოდ გამოცდილების მქონე პილოტები მიიღებენ, რთული იქნება შემდეგი ნაბიჯის გადადგმა.
როცა რბოლებში კარიერას ვიწყებდი, არ მომწონდა იდეა - ვყოფილიყავ მისაბაძი მაგალითი სხვებისთვის, რადგან ბევრი რამ მქონდა დასამტკიცებელი. ახლა, სოციალურ მედიას დადებით მაგალითად მოვყავარ, და ეს შესანიშნავია. ბევრი გოგონა ოცნებობს, მოხვდეს ფორმულა 1-ში, როგორც ეს სიუზი ვოლფმა გააკეთა.
ვგრძნობ, რომ უნდა გამოვიყენო მიღებული გამოცდილება, დავეხმარო დამწყებ გოგონებს, რათა მათ თავიდან აიცილონ მოსალოდნელი შეცდომები, გადავცე აღმაფრენა და ოცნებისკენ სწრაფვა.
ქალების მონაწილეობა ფორმულა 1-ში დადებითისკენ შეცვლის აზროვნებას. რაც უფრო მეტი ახალგაზრდა გოგონა დაკავდება რბოლებით, მით მეტი იქნება უმაღლეს დონეზე გამოსვლის შანსი.
ისე უნდა გაკეთდეს, რომ გოგონებმა იცოდნენ - მათ აქვთ შანსი ავტოსპორტში. როცა ვიგრძნობ, რომ ამისთვის დრო მოვიდა, მთელ ძალას მოვახმარ სპორტში ქალების მოზიდვის პროექტს და დავეხმარები მათ. მაგრამ, ჯერჯერობით, მაინც ადრეა.
აუცილებელია ჩვენს სპორტზე ზრუნვა, რომელმაც ბევრი რამ მოგვცა. და ჩვენც რაღაც უნდა მივცეთ საპასუხოდ, დავეხმაროთ მას განვითარებაში. შორეულ პერსპექტივაში, უფრო მრავალფეროვანი სპორტი კიდევ უფრო მდიდარი გახდება, ჯანსაღი და კონკურენტუნარიანი, ვიდრე დღესაა.
უნდა წავახალისოთ მონაწილეობა და მივცეთ შანსი ახალგაზრდა პილოტებსა და ინჟინრებს, რადგან მათია მომავალი ავტოსპორტში. ეს ეხებათ ქალებსაც, რომლებიც მოსახლეობის 50 პროცენტს შეადგენენ.
შესანიშნავია, რომ AUTOSPORT-იც აღიარებს ამის აუცილებლობას.
ყოველდღიური სპორტული გაზეთი "ლელო"
