ნახევარფინალში სრული ჰარმონიით

კაცების ფრენბურთში მეოთხედფინალური ეტაპი საკმაოდ წყნარად, ზედმეტი დაძაბულობის გარეშე დაიწყო.

ბრაზილიის, იტალიისა და რუსეთის ნაკრებებმა ეს ბარიერი იოლად გადალახეს.

უცნაური იყო 2008 წლის პეკინის ოლიმპიადის ჩემპიონის - ამერიკის შეერთებული შტატების ნაკრების სუსტი თამაში.

იტალიის ნაკრებს მათ წინააღმდეგობა მხოლოდ პირველ სეტში გაუწიეს, თუმცა მაინც დამარცხდნენ - 26:28.

მომდევნო ორი სეტი იდენტური ანგარიშით დასრულდა - 25:20. ორივეში გამარჯვება "სკუადრა აძურას" დარჩა.

კიდევ უფრო იოლად დაამარცხა პეკინის ოლიმპიადის ვერცხლისმედალოსანმა და წლევანდელი შეჯიბრების უმთავრესმა ფავორიტმა ბრაზილიის ნაკრებმა არგენტინელთა ეროვნული გუნდი - 3:0 (25:19, 25:17, 25:20).

რუსეთის ნაკრებმა, რომელიც ოთხი წლის წინ ჩინეთში მეოთხე იყო, პოლონეთის ნაკრებს გაუსწორდა იოლად - 3:0 (25:17, 25:23, 25:21). პოლონელებისგან, რომელთაც წლეულს მსოფლიოს თასის გათამაშება მოიგეს, სპეციალისტები ბევრად უკეთეს თამაშს და, ცხადია, შედეგსაც შესატყვისს ელოდნენ.

თუმცა დასავლეთსლავებმა აღმოსავლეთელებს მეტ-ნაკლები წინააღმდეგობა მხოლოდ მეორე სეტში გაუწიეს, რომელიც ორი ქულით დათმეს.

კაცები. 1/4-ფინალი
არგენტინა-ბრაზილია 0-3 (19:25, 17:25, 20:25)

აშშ-იტალია 0-3 (26:28, 20:25, 20:25)

პოლონეთი-რუსეთი 0-3 (17:25, 23:25, 21:25)

ბულგარეთი-გერმანია 3-0 (25:20, 25:16, 25:14)

1/2-ფინალი
10 აგვისტო
ბრაზილია-იტალია
რუსეთი-ბულგარეთი

ყოველდღიური სპორტული გაზეთი "ლელო"