იაპონიის დედაქალაქი ტოკიო 2020 წლის ოლიმპიური თამაშების მასპინძლად აირჩიეს. მთავარი სპორტული ფორუმი ამ ქალაქში 56 წლის შემდეგ ბრუნდება.საერთაშორისო ოლიმპიური კომიტეტის 125-ე სესია ბუენოს აირესში მიმდინარეობს. დღის წესრიგში სამი მთავარი საკითხი დგას: 2020 წლის ოლიმპიადის დედაქალაქის არჩევა, ამ თამაშების პროგრამის დამტკიცება და სოკ-ის ახალი პრეზიდენტის არჩევნები.
შაბათი დღე მთლიანად დაეთმო სამ პრეტენდენ ქალაქს - სტამბოლს, ტოკიოსა და მადრიდს შორის არჩევის პროცედურას.
ტოკიო
ამ სამეულიდან ტოკიო ისე ხშირად არ "აწუხებდა" სოკ-ს, როგორც სტამბოლი, რომელიც ბოლო ექვსი ოლიმპიადიდან მეხუთედ იბრძოდა თამაშების მოსაპოვებლად.
რაც შეეხება ტოკიოს განაცხადის სუსტ მხარეს, ეს არის პრობლემა ფუკუსიმას ატომურ ელექტროსადგურთან დაკავშირებით. იაპონელებმა სცადეს საზოგადოების დამშვიდება - რადიაციით დაბინძურებულია პატარა ოლქი, რომელიც დიდი მანძილით არის დაშორებული ტოკიოსგან. თუმცა იმის გარანტია არავის მიუცია, რომ მორიგი ძლიერი მიწისძვრა ახალ რადიოაქტიურ კატასტროფას არ გამოიწვევს.
სტამბოლი
სტამბოლი დიდი ხანია ოცნებობს ოლიმპიადის მიღებაზე. 2000-2012 წლებში, ოლიმპიური დედაქალაქის არც ერთი არჩევნები არ ჩატარებული ამ ქალაქის გარეშე. ასეთი "სიჯიუტე" თურქების განაცხადის ერთ-ერთ დადებით მხარედ უნდა შეფასებულიყო - სოკ-ის წევრთა უმრავლესობას, ალბათ, ზეპირად ექნებოდა შესწავლილი სტამბოლის ყველა არენა და ინფრასტრუქტურა. ამასთან, თურქები კომიტეტს სახელმწიფოს მხრიდან მხარდაჭერასა და უდიდეს ბიუჯეტს დაპირდნენ. ამის დასადასტურებლად, ბუენოს აირესში ჩავიდა თურქეთის პრემიერ-მინისტრი და წარსულში სტამბოლის მერი ერდოგანი.
სოკ-ის წევრებზე შთაბეჭდილების მოსახდენად თურქებმა ოლიმპიადის საინტერესო კონცეპცია მოიგონეს - ქვეყნის უდიდესმა ქალაქმა, რომელიც ერთდროულად აზიასა და ევროპაში მდებარეობს, აღმოსავლეთი და დასავლეთი უნდა გააერთიანოს. სოკ-ის მუსულმან წევრებს კი მუდმივად ახსენებდნენ, რომ აქამდე ოლიმპიადა არასოდეს ჩატარებულა ისლამის ქვეყანაში.
სტამბოლს რამდენიმე მინუსი ჰქონდა: თურქეთის საგარეო პოლიტიკა, რადგან ქვეყანას რთული ურთიერთობები აქვს საბერძნეთთან, სომხეთთან, ისრაელთან, გარდა ამისა, თურქები მხარს უჭერენ სირიის მიმართ სამხედრო აგრესიას. ქვეყნის შიგნით მოგვარებული არ არის ქურთების პრობლემა, რომლებთან კონფლიქტს, შეიძლება ხელი შეეშალა ოლიმპიადის მშვიდად ჩატარებისთვის. და კიდევ, მსოფლიოს სპორტულ საზოგადოებაში თურქეთს სახელი აქვს გატეხილი, რადგან ქვეყანაში ცუდად ებრძვიან დოპინგს.
მადრიდი
მადრიდი აქცენტს აკეთებდა ყველა სპორტული ობიექტის 80-პროცენტიან მზადყოფნაზე და მოკრძალებულ ბიუჯეტზე, რომელიც დანარჩენი 20 პროცენტისთვის იყო საჭირო. ამასთან, ესპანეთის დედაქალაქს არ აქვს პრობლემა სასტუმროებთან და სხვა ტურისტულ ინფრასტრუქტურასთან დაკავშირებით. მადრიდს შეიძლებოდა სოლიდური მხარდაჭერა ჰქონოდა სოკ-ის წევრთა ესპანურენოვანი ჯგუფისგან.
მაგრამ, საერთაშორისო ოლიმპიური კომიტეტი აუცილებლად შეამჩნევდა ესპანეთში 27-პროცენტიან უმუშევრობას და მეშვიდე ადგილს მსოფლიოში საგარეო ვალის რაოდენობით. არ არსებობს იმის გარანტია, რომ შვიდი წლის შემდეგ, ქვეყანა ფინანსურად მყარად დადგება ფეხზე. სწორედ ფინანსური გარანტიების არარსებობის გამო მოხსნა თავისი კანდიდატურა და ვერ მიაღწია ბუენოს არესამდე რომმა. გარდა ამისა, ყველას ახსოვდა ბასკი ტერორისტები და კატალონელი სეპარატისტები, რომელთაგანაც ნებისმიერ დროს არის მოსალოდნელი პროვოკაცია.
არჩევა
რაც შეეხება არჩევნების შედეგებს, პირველ რაუნდში ვერც ერთმა კანდიდატმა ვერ მიიღო ხმების უმრავლესობა: ტოკიოს 42 ხმა ჰქონდა, მადრიდსა და სტამბოლს – 26- 26 ხმა (მათ შორის გაიმართა დამატებითი კენჭისყრა, რომელიც თურქების გამარჯვებით დასრულდა და მეორე რაუნდში სტამბოლი გადავიდა).
ბოლო კენჭისყრა ორ დარჩენილ კანდიდატს შორის დიდი უპირატესობით მოიგო ტოკიომ - 60 ხმა 36-ის წინააღმდეგ. ეს ქალაქი 1964 წლის შემდეგ მეორედ უმასპინძლებს ზაფხულის თამაშებს. გარდა ამისა, იაპონიაში 1998 წელს გაიმართა ზამთრის თამაშები, რომლის ორგანიზატორი იყო ნაგანო.
ყოველდღიური სპორტული გაზეთი "ლელო"
ასევე იხილეთ:
ტოკიო 2020 წლის ზაფხულის ოლიმპიურ თამაშებს უმასპინძლებს
