TimeLine: ხინკლის დროა

"ფეისბუკზე" ესპანელი ჟურნალისტი ხავიერ ბარანკუერო დამიმეგობრდა. მის დოსიეს გადავხედე და აღმოჩნდა, რომ ესპანეთის ჩემპიონატის ოფიციალურ საიტზე წერს. საქართველოს შესახებაც მკითხა და "სარაგოსაში" მოთამაშე სანიკიძე-შერმადინზეც.

არ გასულა დიდი დრო, რომ ჩვენი ქვეყნის შესახებ გიორგი შერმადინის დახმარებით ვრცელი პუბლიკაცია გამოაქვეყნა სათაურით "ხინკლის დროა".

თუნდაც მხოლოდ სათაური მიგვითითებს, რომ ბარანკუეროს პუბლიკაცია ჩვენს რუბრიკა "ტაიმლაინზეა" ზედგამოჭრილი.

ნატახტარი
მცხეთა მტკვრისა და არაგვის შესართავთან მდებარეობს. ქალაქის კედლები არაერთი ლეგენდარული ამბის შესახებ მოგვითხრობს, რომლებიც საუკუნიდან საუკუნემდე მშობლიდან შვილს გადაეცემოდა.

ისტორიული წყაროების მიხედვით მცხეთელი ებრაელი ელიოზი ჯვარცმისას იერუსალიმში იმყოფებოდა და საქართველოში ჩამოიტანა უფლის კვართი.

მისი და სიდონია კვართის შეხებისას გარდაიცვალა და ქრისტეს სამოსთან ერთად დაკრძალეს. საფლავზე მაღალი ლიბანური კედარი გაიზარდა და ოთხი საუკუნის შემდეგ სწორედ იმ ადგილას აღიმართა სვეტიცხოვლის ტაძარი.

იგი დღემდე ამაყად დგას და უამრავ მლოცველსა და ტურისტს იზიდავს.

მცხეთის მეზობლად, სოფელ ნატახტარში დაიბადა გიორგი შერმადინი.

"ნატახტარი მშვენიერი ადგილია, ყოველი სეზონის შემდეგ ვცდილობ მაქსიმალური დრო ჩემს სოფელში გავატარო, ახლობლებსა და ოჯახის წევრებს შორის.

მცხეთაც ძალიან მიყვარს, მას მეორე იერუსალიმს უწოდებენ, წმინდა ქალაქია უამრავი ეკლესია-მონასტრით", - ასე ახასიათებს სამშობლოს 216 სმ სიმაღლის გიორგი შერმადინი, რომლისთვისაც ძალიან მოკლედ მეჩვენება სახელი გიო.

იგი ისევე იზრდებოდა, როგორც ნებისმიერი სხვა ქვეყნის პატარა:

"ჩვეულებრივი ბავშვობა მქონდა, მამაჩემთან, დედაჩემთან, უფროს ძმასთან და უმცროს დასთან ერთად ვცხოვრობდი.

დღე ადრე ადგომით იწყებოდა, სკოლაში მივდიოდი, შემდეგ საშინაო დავალებებს ვასრულებდი, ბევრს ვთამაშობდი და ხანდახან მამაჩემს ვეხმარებოდი. რომ წამოვიზარდე, თბილისში გადავედი".

ნახა, მოეწონა, დაოსტატდა
ხშირად, ასეთი ისტორია იმით მთავრდება, რომ ბავშვი პროფესიად ფეხბურთს ირჩევს. თუმცა არის გამონაკლისი შემთხვევებიც, მოზარდი სიმაღლეში ყველას და ყველაფერს რომ გაასწრებს, ლოგიკურად ჩნდება შეკითხვა: კალათბურთელი ხომ არ უნდა გახდეს?

ასეთი შეკითხვა დაისვა გიორგი შერმადინის შემთხვევაშიც. თამაში გვიან დაიწყო და სამ წელიწადში ბერძნულ "პანათინაიკოსთან" სამწლიანი კონტრაქტი გააფორმა. ეს უკვე საკალათბურთო გადატრიალებაა.

"თამაში 16 წლისამ დავიწყე. რატომ გადავწყვიტე მაინცდამაინც კალათბურთელობა? იმიტომ, რომ სპორტი მიყვარს, თავიდანვე მაღალი ვიყავი.

შესაძლოა, დიდი მოტივაცია იმიტომაც მქონდა, რომ კარიერა გვიან დავიწყე და ვაცნობიერებდი, რომ მაღალი მიზნების მიღწევა შეიძლებოდა, ოღონდ ბევრი შრომა სჭირდებოდა.

"მაქაბიში" ჩემს ძმა სოსოსთან ერთად ვთამაშობდი. მაშინ იოლი არ იყო პროგრამის ბოლომდე შესრულება, შეუსვენებლივ ვარჯიში, მაგრამ დღეს ის პერიოდი კარგად მახსენდება".

სამ წელიწადში სამი ინდივიდუალური ტიტული. სიმაღლე შერმადინს ძალიან ეხმარებოდა საქართველოს ჩემპიონატში წარმატებით თამაშში. იგი სწრაფად უმატებდა.

"გიორგი 16 წლისა იყო, როცა ვამბობდი - იგი ვარსკვლავად იქცევა-მეთქი, მაგრამ ჩემი არავის სჯეროდა", - ამბობს "მაქაბის" პრეზიდენტი და მწვრთნელი ჯამლეტ ხუხაშვილი.

გიორგიმ საქართველოს თასის გათამაშებაში ქვეყნის რეკორდი დაამყარა - 76 ქულა ჩააგდო, ახალგაზრდულ ჩემპიონატში კი 89 ქულა მოაგროვა. ბოლო სეზონში იგი საშუალოდ 35.8 ქულას, 16.4 მოხსნასა და 4.7 პასს აგროვებდა.

"საქართველოს პირველობის ბომბარდირი გავხდი. მაშინ მთელი გუნდი ჩემზე იყო აწყობილი, რომ თამაში მეგრძნო და თავდაჯერება შემმატებოდა. ბევრს ვტყორცნიდი, ბევრს ვთამაშობდი და საქართველოდან კარგად მომზადებული წავედი".

"პანათინაიკოსში" 2008 წელს ჩაირიცხა და 2009-ის მაისში გუნდთან ერთად ევროლიგა მოიგო. "მწვანეებში" გატარებულ პერიოდში ქართველ ცენტრს უამრავი გასახსენებელი აქვს. მათ შორის კურიოზიც:

"ლარისაში გამართული მატჩის შემდეგ მთელი გუნდი ავტობუსში ავიდა და ათენში გავემგზავრეთ. მხოლოდ ფოცისი წავიდა საკუთარი ავტომობილით მეგობრის ქორწილში.

კეცმანმა და დიამანტიდისმა მირჩიეს ფოცისს გავხუმრებოდი და სალანძღავი სიტყვებით სავსე შეტყობინება გამეგზავნა.

ნომერიც ჩავიწერე და მესიჯი გაიგზავნა თუ არა, ამოვარდა მწვრთნელ ჟელიმირ ობრადოვიჩის გვარი. დიამანტიდისს მწვრთნელის ნომერი მოუცია...

მეორე დღეს ვარჯიშისას ობრადოვიჩმა მოედნის ცენტრში დასტვინა და იკითხა: შეურაცხმყოფელი შეტყობინება ვინ გამომიგზავნაო?

გავშრი, დანარჩენები კი სიცილისგან იატაკზე დავარდნენ".

ორმაგი გვირგვინი
ახალგაზრდა შერმადინმა სათამაშო დროის საძიებლად სლოვენიის "ოლიმპიას" მიაშურა.

ევროლიგის ტოპ-16-ში 10 ქულასა და 5.2 მოხსნას აგროვებდა.

ევროპის 2011 წლის ჩემპიონატზე მისი მონაგარი 5 ქულა და 3.1 მოხსნა იყო.

სწორედ ამის შემდეგ მიაშურა იტალიურ "კანტუს", სადაც მისი თანამემამულე მანუჩარ მარკოიშვილი თამაშობდა და ევროლიგაზე ესპანური გუნდების რისხვად იქცა: "კახა ლაბორალს" ჯერ 11 ქულა ჩაუგდო, შემდეგ - 17; "ბილბაოს" - 16 და 21, "ბარსელონას" 14 და 19.

"ევროლიგაზე ბევრი საინტერესო მატჩი გვქონდა, რომელთაგან ყველაზე უკეთ მომავალი ჩემპიონის, "ოლიმპიაკოსის" დამარცხება მახსენდება.

ბოლო წამებზე ერთი ჯარიმა ამიცდა, თუმცა მაინც მოვასწარი, სწრაფ შეტევაში გაჭრილ კაილ ჰაინსს დავეწიე და დავუფარე.
ამით მატჩიც დასრულდა", - სიამაყით იხსენებს შერმადინი, რომელიც ევროლიგის ტოპ-16-ში "კანტუს" მაისურით 13.2 ქულასა და 6.3 მოხსნას აგროვებდა.

საინტერესოა, რას ფიქრობს იგი NBA-ზე.

"ევროპაში თამაშს ვამჯობინებ და ამით კმაყოფილი ვარ. NBA-ში მოხვედრაზე ფიქრი გვიანი არ არის, თუმცა ყველაფერი ჩემზეა დამოკიდებული, სათამაშო დრო და კარგი სტატისტიკა მჭირდება".

"კანტუდან" შერმადინი ისრაელის "მაქაბიში" გადავიდა, თუმცა კონკურენციის გამო შუა სეზონში კარიერის "ოლიმპიაკოსში" გაგრძელება გადაწყვიტა.

როგორც თავად იხსენებს, იმავე სეზონში "მაქაბიზე" შურისძიების შანსი მიეცა: 20132 წლის 25 იანვარს "ოლიმპიაკოსმა" თელ-ავივში დამაჯერებლად გაიმარჯვა.

იმ მატჩში გიორგიმ 9-9 ქულა-მოხსნა მოაგროვა. ამავე წელს პირეოსულ გუნდთან ერთად ევროლიგა მოიგო.

"მოხარული ვარ კარიერაში გადადგმული თითოეული ნაბიჯით. ვითამაშე ძლიერ გუნდებში: "პანათინაიკოსში", "ოლიმპიაში", "კანტუში", "მაქაბიში", "ოლიმპიაკოსში". მათთან ბევრი კარგი მოგონება მაკავშირებს".

ახალი სეზონის დასაწყისში გიორგი შერმადინმა "სარაგოსასთან" კონტრაქტს მოაწერა ხელი.

"შემოთავაზება ევროლიგის გუნდებისგანაც მქონდა, მაგრამ "სარაგოსა" ერთი მარტივი მიზეზის გამო ავარჩიე - საკმარისი სათამაშო დრო და გუნდის ლიდერობა მინდა".

ესპანეთის ჩემპიონატში შერმადინმა ხმაურით შეაბიჯა, სტუმრად "ბილბაოსთან" მოგებულ მატჩში 20 ქულა ჩააგდო.

"სარაგოსას" მაისურით ეს იყო ჩემი საუკეთესო თამაში, დარწმუნებული ვარ, კიდევ უფრო კარგი მატჩები წინაა, - იმედოვნებს კალათბურთელი, - აქ თავს შესანიშნავად ვგრძნობ. კარგი თანაგუნდელები, გულშემატკივრები, მწვრთნელები გვყავს. ჩემთვის ასევე ბევრს ნიშნავს ის, რომ ვიქტორ სანიკიძეც "სარაგოსას" ღირსებას იცავს".

სადილად ხინკალი
გიორგის ოჯახი საქართველოშია ჯერჯერობით და მას რესტორანში უწევს კვება.

"უქმეებზე ვიქტორთან ერთად მაღაზიებში დავდივარ. როცა ჩემი ოჯახი მეწვევა, თავისუფალ დღეებს მასთან დავგეგმავ".

როგორც შერმადინი ამბობს, საქართველოში კალათბურთი ნელ-ნელა ვითარდება. როგორც ყოველთვის, ნიჭიერი სპორტსმენები ახლაც არიან. იგი ასახელებს 5 ძმა რევაზაშვილებს, რომელთაგან ასაკით მეორე, ლევანი საქართველოს ჩემპიონატის ბომბარდირთა შორისაა.

რაზე ოცნებობს გიორგი?

"ცხოვრებისეულ სიმშვიდესა და ოჯახურ კეთილდღეობაზე. ასევე მინდა, საკუთარი სახელი ქართველთა ინტერესებს მოვახმარო".

როგორც კალათბურთელი ამბობს, ქართული კულტურის ნაწილია ეროვნული კერძები. მას ძალიან უყვარს ხინკალი და მისი მომზადების საიდუმლოც გამანდო: ცომში უნდა გავახვიოთ ხორცი, შევაზავოთ სანელებლებით, მოვხარშოთ მდუღარე წყალში და როცა ხინკალი გამზადდება, პილპილი არ უნდა დაგვავიწყდეს!

ყოველდღიური სპორტული გაზეთი "ლელო"