ძიუდოისტთა ახალგაზრდული ნაკრები: ბერლინურ ბარიერთან

საქართველოს ძიუდოისტთა ახალგაზრდულმა ნაკრებმა ამ უქმეებზე ბერლინში იასპარეზა თანატოლთა ევროპის თასზე, სადაც 8 მედალი მოიპოვა - 1 ოქრო, 3 ვერცხლი და 4 ბრინჯაო.

გუნდურ ჩათვლაში ბიჭებში ჩვენები მესამეზე გავიდნენ. აღსანიშნავია, რომ იქ ქართველ გოგონებს არც უასპარეზიათ.

ჩემპიონი ლევან გუგავა (81) გახდა, ვიცე-ჩემპიონები - თამაზ კირაკოზაშვილი (73), დავით რამაზაშვილი (90) და გურამ თუშიშვილი (+100). მესამეპრიზიორები გიორგი გუგულაშვილი, ბექა შავდათუაშვილი (ორივე - 66), გიორგი კაციაშვილი (73) და გიგა გელაშვილი (+100) არიან.

ახალგაზრდები თანატოლთა ევროპის სასექტემბრო ჩემპიონატისთვის ემზადებიან. ამიტომ მწვრთნელებმა გერმანიაში გაფართოებული შემადგენლობა გააგზავნეს, მაგრამ რამდენიმე წონაში შედეგი ვერ მიიღეს. სამაგიეროდ, 8-დან ოთხი წონის ფინალში გვყავდა მონაწილე. სამწუხაროდ, მათგან სამი წავაგეთ.

ჩვენი ფალავნებიდან ყველაზე უკეთ ევროპისა და მსოფლიოს მესამეპრიზიორი გუგავა გაისარჯა. თავიდან მან გერმანელები დაჩაგრა - ალექსანდრ ვოლკერი ვაზარით, გაბრიელ ბერგი კი იპონით დაამარცხა. წმინდად მოუგო მეოთხედფინალში ებრაელ იდან ვერდისაც და ნახევარფინალშიც - შვედ ვიქტორ ბუშსაც. მან არც ფინალში დაუთმო რამე კიდევ ერთ მასპინძელ რობერტ უნიევსკის, თუმცა მასთან 3 გაფრთხილებაც მიიღო, ოღონდ ეს უფრო ტაქტიკური ნაბიჯი იყო, რადგან მანამდე ვაზარი აუღო და ანგარიშის შენარჩუნებაზე ზრუნავდა.

ჩვენებური ძალიან მობილიზებული ჭიდაობდა და არცთუ ძლიერი მეტოქის შემოტევის თუნდაც მცირე შანსს ყოველთვის კონტრილეთს ახვედრებდა.

1,30-ის შემდეგ გერმანელი ბრუნის გასაკეთებლად ტატამიდან მის აყვანას ცდილობდა, მაგრამ გუგავამ მოგვერდით ვაზარზე გადააგდო და ცოტა დააკლდა, არ შებოჭა. როგორც გითხარით, ამის შემდეგ ქართველმა სამი გაფრთხილება მიიღო, თუმცა მაშინვე პასიურობაზე არ გადასულა, არამედ ტაქტიკურად სწორი ჭიდაობა დაიწყო, როცა კარგად ანეიტრალებდა მეტოქის აქტიურობას და არ აძლევდა შეტევის საშუალებას. აშკარა ჩავარდნები მან მხოლოდ სულ ბოლო წამებზე დაიწყო, მესამე გაფრთხილება კი დასრულებამდე 1 წამით ადრე მიიღო.

გუგავა მეოთხე სეზონს ატარებს ამ ნაკრებში და ერთ-ერთი ყველაზე სტაბილურია - ჯერ კიდევ ჭაბუკებიდან მოყოლებული, სეზონი არ დაუტოვებია უმედლოდ. ეგ კი არა, ევროპა-მსოფლიოზე წყვილ-წყვილად იგებდა ჯილდოებს, თუმცა მის კარიერას ერთი ჩრდილიც ადგას - ჯერ არც ევროპის ჩემპიონია და არც მსოფლიოსი. ჭაბუკებიდან მოყოლებული, ამ ხუთწლიან პერიოდში მხოლოდ ერთხელ გავიდა ფინალში - შარშანწინ, ახალგაზრდულ ევროპაზე, თუმცა ვერცხლს დასჯერდა.

უკვე გამოცდილებაც ბლომად დაუგროვდა. თან ის ეროვნული ნაკრების კანდიდატია და პერიოდულად უფროსებშიც გამოდის, თუმცა, სადაც უნდა იჭიდაოს, საკმაოდ ხარისხიანად ასპარეზობს. იმედია, ბერლინური წარმატება ევროპული ჩემპიონობის წინაპირობად ექცევა, თუმცა ახლანდელი კონკურენტებიდან საერთაშორისო რეიტინგის ლიდერებში არავინ შედის.

ამ წონაში მოულოდნელი იყო ახალგაზრდებში მსოფლიოს ჩემპიონ კობა მჭედლიშვილის წაგება პირველივე ბრძოლაში ჰოლანდიელ იესპერ სნიმკთან.

ჩემპიონობასთან ძალიან ახლოს იყო კირაკოზაშვილიც, ვისგანაც ელოდნენ კიდეც ჩემპიონობას. მით უფრო, რაც მერვედფინალში რეიტინგის ერთ-ერთი ლიდერი, რუსი ალექსანდრ კოლესნიკი დააიპონა. მანამდე გერმანელი მარვინ აგარიუსი გაფრთხილებებით ჩამოიშორა, ფრანგი ლუკას ოტმანე დააიპონა, ნახევარფინალში თურქი მურატ ბეკტაშიც წმინდად დაამარცხა, მაგრამ ფინალი წააგო ბელგიელ მატიას გასესთან.

ეს ბელგიელი ბერლინში დაუძლეველ ბარიერად გვექცა - მეორე წრეში კაციაშვილსაც მოუგო ვაზარ-იპონით. არადა, მან ტურნირზე კიდევ 5 შეხვედრა ჩაატარა და ყველაში წმინდად იმარჯვა. ბრინჯაოსთვის ბრძოლაში კაციაშვილმა ზემოხსენებული თურქი ბეკტაში დააიპონა.

ჩვენი სხვა ფინალისტებიდან თუშიშვილი საერთოდ არ გასულა საჭიდაოდ რუს ტამერლან ბაშაევთან, ხოლო რამაზაშვილი მეორე რუსთან, მიხაილ იგოლნიკოვთან ვაზარ-იუკოთი დამარცხდა.

ხელის ტრავმით გამოწვეული ხანგრძლივი შესვენების შემდეგ თუშიშვილი პირველად დაუბრუნდა ტატამს, ოღონდ ამჯერად წონა არ დააკლებინეს და მძიმეში აჭიდავეს. კარგადაც ჩაერთო ტურნირში და ფინალამდე სულ იპონებით მივიდა. თან, რამდენიმე უსწრაფესად მოიგო - პირველივე შეხვედრაში პოლონელ კრშიშტოფ ზალეზნის 15 წამში ვაზარიც აუღო და იპონითაც დაამარცხა, მეოთხედფინალში კი ფრანგი მესიე კატანგა ნახევარ წუთში დააიპონა. შუალედში ჩვენებურმა ძლიერი სერბი ზარკო ცულუმიც წმინდად დაამარცხა, ვინც საერთაშორისო რეიტინგში მეოთხეა.

თუმცა თუშიშვილს ყველაზე სოლიდური მეტოქე მაინც ნახევარფინალში ჰყავდა - რეიტინგის რუსი ლიდერი, ახალგაზრდებში ევროპის შარშანდელი ფინალისტი და მსოფლიოს მესამეპრიზიორი რუსლან შახბაზოვი. ჩვენებურმა მას შარშანაც მოუგო თანატოლთა მსოფლიოს გუნდურ პირველობაზე, როცა ჩვენებმა ნახევარფინალში რუსეთს სძლიეს. ტრადიცია არც ამჯერად დაარღვია, თუმცა ამასობაში კოჭიც იტკინა და ფინალში რუსთა მსოფლიოს კიდევ ერთ ბრინჯაოსმედალოსან ბაშაევთან საჭიდაოდ არ გავიდა.

წინასწარი მონაცემებით, ტრავმა ძალიან რთული არ უნდა იყოს, თუმცა დაველოდოთ გუნდის თბილისში დაბრუნებას, როცა თუშიშვილს საგანგებოდ გამოიკვლევენ.

ამ წონაში საკმაოდ კარგად გამოვიდა გელაშვილიც, რომელმაც ბრინჯაოსთვის პაექრობაში შახბაზოვი გაფრთხილებებით მოახსნევინა, თუმცა ჯაბა მუმლაძეც დაგვიტოვა უმედლოდ - დამამშვიდებელში მოუგო. არადა, მუმლაძე უკვე უფროსებშიც წარმატებით გამოდის.

სხვათა შორის, გელაშვილმა პირველ წრეში გერმანელი ლუკას როლვაგეც მოახსნევინა, ანუ ტაქტიკურად კარგად ჭიდაობს. ძირითად ბადეში ის ებრაელ ვიაჩესლავ ობედინთან დამარცხდა.

რუსი იგოლნიკოვი წლეულს გადმოვიდა 90-ში, სადაც ადაპტაციის გარეშე ჩაერთო და მორიგი ფალავანი დაგვიმარცხა - რამაზაშვილმა მასთან ვაზარ-იპონით წააგო. ჩვენებურმა ორი იპონით დაიწყო ტურნირი - გერმანელი ალი აღა ნაზაროვი და ბრაზილიელი ენრიკე ფრანკინი ბეჭებზე დააგდო. გერმანელი სიდნეი მაი 2 იუკოთი დაამარცხა, ნახევარფინალში კი მანაც და კიდევ ერთმა მასპინძელმა დავიდ ტეკიჩმა ვაზარი დაკარგეს, თუმცა ჩვენებურმა იუკოც მოიპოვა, რაც გამარჯვების წინაპირობა გახდა.

ამავე წონაში ინტერესით ველოდით გიორგი გველესიანის გამოსვლასაც, როგორც ნიჭიერი ახალგაზრდისა, თუმცა ის პირველივე პაექრობაში დამარცხდა ბრაზილიელ ტიაგო ჩიოდისთან.

სამწუხაროდ, ვერც უფროსებში საქართველოს პრიზიორმა ნოდარ ბერიანიმ გამოიჩინა თავი, მანაც პირველივე პაექრობა დათმო ბელგიელ ჯელე ჰოსტესთან.

ჩვენთვის საკმაოდ წარმატებული გამოდგა 66 კილოგრამი, სადაც ეროვნული ნაკრების ორი კანდიდატი - გუგულაშვილი და ბექა შავდათუაშვილი ავიდნენ კვარცხლბეკზე. საინტერესოა, რომ ორივე ნახევარფინალში გავიდა და იქ დამარცხდა.

იქამდე უფრო ძლიერად ოლიმპიური ჩემპიონის უმცროსი ძმა - შავდათუაშვილი მივიდა, რომელმაც წინასწარ ეტაპზე სამი ბრძოლიდან 1 სუფთად მოიგო, ერთიც - ვაზარით და ერთში დასჯერდა იუკოს. სამაგიეროდ, გუგულაშვილმა ნახევარფინალამდე 4 შეხვედრა გამართა და 2-ჯერ ვაზარით მოიგო, თითოჯერ კი გაფრთხილებით და იუკოთი.

უცნაურია, მაგრამ ნახევარფინალში ორივე ჩვენებური გაფრთხილებით დამარცხდა - გუგულაშვილმა ერთით მეტი მიიღო შვეიცარიელ ნილს შტუმპზე, ხოლო შავდათუაშვილი მოხსნეს რუს პაველ პატოკოვთან. ჩვენებურმა ბრინჯაოსთვის შეხვედრაშიც სამი გაფრთხილება მიიღო გერმანელ დავიდ კარლესთან, თუმცა მას იუკოც აუღო; გუგულაშვილმა კი ბრაზილიელ დანიელ კარგნინთან ვაზარი დაკარგა, მაგრამ გაფრთხილებებით მოახსნევინა. ისე კი, ამ ბრაზილიელს შავდათუაშვილმაც მოუგო მეოთხედფინალში.

ჩვენები უმედლოდ დარჩნენ 60-ში, სადაც ირაკლი კუპატაძე და ილია შუბითიძე ჭიდაობდნენ. აგრეთვე - 100-ში, სადაც ვითარებას ისევ თუშიშვილი თუ გამოასწორებს. ამჯერად აქ ნიკა აბულაძე გამოვიდა, მაგრამ წარუმატებლად.

ამათ გარდა, ბერლინში ჩვენგან ბექა უდესიანი, თორნიკე ნაგლიაშვილი, ჯამბულ ქურდიანი, ზვიად ხუბულური (ოთხივე - 66), აპოლონ ზურაბიანი (73), გიორგი ქურდიანი (81) და გიორგი ლაზუაშვილიც (+100) გამოდიოდნენ, მაგრამ წარუმატებლად იჭიდავეს.

(იბეჭდება მცირე ცვლილებით)
ყოველდღიური სპორტული გაზეთი "ლელო"